A schan̈il bꞌit yic cuscꞌolal
4
Ina val tas ix aj sqꞌuicꞌbꞌi yilji scopopial qꞌuen oro te vachꞌ. Masanil qꞌuen qꞌueen vachꞌ yilji dꞌa templo, sacleminac ix ajcanbꞌat qꞌuen dꞌa yoltac calle.2 A ebꞌ quelemtac dꞌa chon̈abꞌ Sion, te nibꞌabꞌil ebꞌ dꞌa yichan̈ qꞌuen oro vachꞌ. Axo ticnaic jun, lajan tzꞌutaj ebꞌ icha junoc lum comon chen.
3 A nocꞌ nun oques syacꞌ chunoc yuneꞌ nocꞌ, axo pax ebꞌ ix vetchon̈abꞌ tic, maxtzac ocꞌ scꞌol ebꞌ ix, lajan ebꞌ ix icha nocꞌ avestruz tzꞌecꞌ dꞌa taquin̈ luum syactejcan sn̈olobꞌ.
4 A ebꞌ unin vanto schuni scham ebꞌ yuj taquin̈tial, sqꞌuecan lotzan yacꞌ ebꞌ dꞌa sjoom. Scꞌan svael ebꞌ unin chiꞌ, palta malaj mach tzꞌacꞌan dꞌa ebꞌ.
5 A ebꞌ anima tzijtum tas sva dꞌa pecaꞌ, van scham ebꞌ yuj vejel dꞌa yoltac calle ticnaic. A ebꞌ ix qꞌuibꞌ dꞌa yoltac pat te vachꞌ yilji, van sayan ebꞌ tas syabꞌlej dꞌa scaltac cꞌalem.
6 A yaelal ix javi dꞌa yibꞌan̈ in chon̈abꞌ yuj schucal, te ecꞌto dꞌa yichan̈ yic ebꞌ aj Sodoma. A Sodoma chiꞌ, junn̈ej rato satnaqueli, malaj mach cusnac yuuj.
7 A ebꞌ yajal dꞌa co cal, copopi yilji ebꞌ dꞌa yichan̈ qꞌuen sacbꞌacom, te sac yilji ebꞌ dꞌa yichan̈ lech. Te chac yilji snivanil ebꞌ dꞌa yichan̈ qꞌuen coral. Te vachꞌ yilji ebꞌ dꞌa yichan̈ qꞌuen zafiro.
8 Axo ticnaic, te qꞌuicꞌ yilji ebꞌ dꞌa yichan̈ qꞌuicꞌbꞌalil. A mach tzꞌilan ebꞌ dꞌa yoltac calle, maxtzac nachaj yuj ebꞌ mach ebꞌ. Toxo ix och lotzan stzꞌumal ebꞌ dꞌa sbꞌaquil, taquin̈xon̈ej ebꞌ icha teꞌ cꞌatzitz.
9 Te vachꞌ yic mach ix cham dꞌa oval dꞌa yichan̈ mach cꞌojancꞌolal ix cham yuj vejel.
10 Yuj vejel ix javi dꞌa yibꞌan̈ in chon̈abꞌ yuj oval, a ebꞌ ix ix vachꞌ spensar smilcham yuneꞌ ebꞌ ix, stzꞌan̈an ebꞌ ix schiꞌa.
11 Ix elcꞌoch jantac yoval scꞌol Jehová, ix yacꞌcot scꞌacꞌalcꞌolal. Ix yacꞌanoch scꞌacꞌal chon̈abꞌ Sion, masanto ix yal slajviem cimientoal.
12 A ebꞌ sreyal juntzan̈ chon̈abꞌ dꞌa yolyibꞌan̈qꞌuinal tic yedꞌ ebꞌ cajan dꞌay, maj sna ebꞌ tato ay ebꞌ ajcꞌol ol yal yoch dꞌa yol chon̈abꞌ Jerusalén.
13 Icha chiꞌ ix uji yuj smul ebꞌ syaloch sbꞌa schecabꞌoc Dios yedꞌ ebꞌ sacerdote. Ix tobꞌcanbꞌat schiqꞌuil anima malaj smul yuj ebꞌ.
14 Axo ticnaic, ton̈ej smachlej ebꞌ tzꞌecꞌ ebꞌ dꞌa yoltac calle icha ebꞌ max uji yilani. Quen̈echtac spichul ebꞌ yuj chicꞌ, man̈xa mach syal scꞌol syaman spichul ebꞌ chiꞌ.
15 Man̈ ex javoc dꞌa co tzꞌey, yujto te chicꞌtac ex, man̈ on̈ eyamaꞌ, xchi ebꞌ yetchon̈abꞌ ebꞌ dꞌay. Yuj chiꞌ ix bꞌat ebꞌ dꞌa juntzan̈xo chon̈abꞌ, palta malaj mach schaan ebꞌ.
16 Yedꞌ yoval scꞌol Jehová ix yacꞌ saclembꞌat ebꞌ, majxo tan̈vaj ebꞌ yuuj. Man̈xalaj yelcꞌoch ebꞌ sacerdote dꞌa yol sat ebꞌ chꞌoc chon̈abꞌil, majxo ocꞌlaj scꞌol ebꞌ dꞌa ebꞌ ichamtac vinac.
17 Nabꞌan̈ej ix on̈ cꞌunbꞌi co maclan sjavi jun chon̈abꞌ on̈ scoloꞌ. Ayon̈qꞌue dꞌa chaan̈ sco maclan quil sjavi jun nación ijan ix on̈ colan yalani, palta maj yalpaxlaj yuuj.
18 Ayn̈ejoch sat ebꞌ ajcꞌol dꞌayon̈ bꞌaj tzon̈ bꞌeyeqꞌui. Max yal-laj quelbꞌat dꞌa yol chon̈abꞌ. Van sjavi slajvubꞌal co qꞌuinal, toxo ix javi co chamel.
19 A ebꞌ tzon̈ pechani, te jelan sbꞌey ebꞌ dꞌa yichan̈ nocꞌ chꞌacbꞌa tzꞌecꞌ jen̈en̈oc. Tzacꞌann̈ej ebꞌ dꞌa co patic dꞌa jolomtac vitz, tzon̈ macji yuj ebꞌ dꞌa tzꞌinan luum.
20 A vin̈ co reyal ayoch yipoc co cꞌool, vin̈ sicꞌbꞌilel yuj Jehová, toxo ix yamchaj vin̈ yuj ebꞌ. A sco naani to a vin̈ ol on̈ colan dꞌa juntzan̈xo nación.
21 Ex aj Edom, ex tzeyacꞌ yajalil dꞌa masanil smacbꞌen chon̈abꞌ Uz, tzevajan̈ec, tzalajan̈ec yacbꞌan tzato yalaꞌ. Ol cꞌochpax yaelal dꞌa eyibꞌan̈. Icha ebꞌ ucꞌum an̈ ol ex ajoc, qꞌuixvelal ol ex ajcanoc.
22 Ex aj Sion, toxo ix ecꞌbꞌat jantac eyaelal. Man̈xo ol ex acꞌjocxibꞌat dꞌa preso yuj Jehová. A exxo tic ex aj Edom, yuj e chucal ol yacꞌpax eyaelal Jehová, ol yacꞌ checlaj jantac e mul.