Yoxil bꞌit yic cuscꞌolal
3
A in tic, nivan val ix aj vabꞌan syail yuj yoval scꞌol Dios.2 Ix in spechbꞌat dꞌa scal qꞌuicꞌalqꞌuinal bꞌaj juneln̈ej qꞌuicꞌolinac. Ix in yacꞌ bꞌey dꞌa yoltac bꞌe bꞌaj malaj saquilqꞌuinal.
3 Masanil cꞌu ichan̈ej tic in smacꞌan yedꞌ yoval scꞌool.
4 Ix yacꞌ ichamax in nivanil, chocꞌxon̈ej ix yutejcanbꞌat in bꞌaquil.
5 Ix in smacchej yedꞌ yaelal yedꞌ cuscꞌolal.
6 Ix in yacꞌ aj dꞌa scal qꞌuicꞌalqꞌuinal, icha yaj ebꞌ chamnacxo.
7 Ix in smacchej bꞌaj man̈xa bꞌaj syal veli. Yedꞌ val qꞌuen nivac cadena ix in stzecꞌaꞌ.
8 Vachꞌchom tzꞌel vav in cꞌanan scolval, max scha yabꞌ tas tzin cꞌan dꞌay.
9 Ix smac in bꞌe yedꞌ qꞌuen qꞌueen, yuj chiꞌ axon̈ej dꞌa qꞌuex bꞌe tzin bꞌati.
10 Lajan ix yutej sbꞌa Jehová dꞌayin icha junoc nocꞌ oso scꞌubꞌejel sbꞌa, icha junoc nocꞌ choj tzꞌelta jucnaj dꞌayin.
11 Ix in sn̈erel dꞌa yol bꞌe yic chocꞌ tzin yutejcanbꞌati, ix in actajcan yuuj.
12 Ix sbꞌoꞌoch sjul-labꞌ, ix can ijan dꞌayin yedꞌ sjul-labꞌ chiꞌ.
13 A sjul-labꞌ ix sjulcot dꞌayin, ix cꞌaxpaj dꞌa yol in cꞌool.
14 Masanil ebꞌ vetanimail sbꞌuchvaj dꞌayin, a inxon̈ej tzin yal ebꞌ dꞌa scal slolonel.
15 Dꞌa val syaelal ix in ajecꞌ yuj Dios. Te cꞌaꞌ tas ix yacꞌ vuqꞌuej.
16 Ix el vecnaj qꞌuen ve ayic ix in em latnaj dꞌa sat lum yuuj, ix in can telan dꞌa cal pococ.
17 Man̈xalaj in juncꞌolal, man̈xo naanoc tzalajcꞌolal vuuj.
18 Svalani to man̈xa in tecꞌanil, yujto man̈xo ayococh Jehová yipoc in cꞌool.
19 A tzin naancot in cuselal yedꞌ vecꞌ in chꞌocojil, te ya svabꞌi.
20 A val yic tzin naancot juntzan̈ chiꞌ, man̈xo animaoc tzin aj svabꞌi.
21 Palta ay jun tas tzin nibꞌej, ayn̈ejecꞌ dꞌa in pensar, aton jun chiꞌ in gana svacꞌn̈ejoch yipoc in cꞌool.
22 Aton val yuj svachꞌcꞌolal Jehová max on̈ sateli, yujto tzꞌocꞌn̈ej scꞌool dꞌayon̈.
23 Junjun qꞌuin̈ibꞌalil scheclaj svachꞌcꞌolal Jehová, syaln̈ej cacꞌanoch dꞌa co cꞌool.
24 Yuj chiꞌ svalaꞌ to icha in macbꞌen yaj Jehová, an̈ej ayoch yipoc in cꞌool.
25 A ebꞌ tzꞌacꞌanoch Jehová dꞌa scꞌool, te vachꞌ Jehová chiꞌ dꞌa ebꞌ, aton ebꞌ to sbꞌec val och sbꞌa dꞌa yol scꞌabꞌ.
26 Te vachꞌ tato numan tzon̈ aj co tan̈vani masanto scolvaj Jehová dꞌayon̈.
27 Yelxo vachꞌ tato ayic unin animaon̈to scacꞌanoch co bꞌa dꞌa yalan̈ smandar Dios.
28 Vachꞌ tato numan tzon̈ aj co chꞌocoj yacbꞌan syacꞌoch co yaelal Jehová.
29 Yovalil tzon̈ och ejmelal, tzon̈ em n̈ojan dꞌa sat luum, talaj tzꞌocꞌ scꞌol Jehová dꞌayon̈.
30 Vachꞌchom tzon̈ macꞌji, tzon̈ bꞌuchji, palta co chaocabꞌi.
31 Max on̈ yactejcan Jehová dꞌa juneln̈ej.
32 Vachꞌchom syacꞌoch co yaelal, palta tzꞌocꞌpax scꞌool dꞌayon̈, yujto te nivan svachꞌcꞌolal.
33 Val yel malaj sgana syacꞌoch co cuscꞌolal yedꞌ co yaelal.
34 A Jehová Dios Axon̈ej Ochi, malaj sgana tzꞌixtaj ebꞌ anima dꞌa preso,
35 malaj pax sgana tzꞌicꞌjiel sderecho ebꞌ acꞌbꞌil yuuj.
36 Man̈ vachꞌoc dꞌa sat Dios tato max chꞌolbꞌitaj ebꞌ anima dꞌa stojolal.
37 Max elcꞌochlaj tas sco naꞌ tato man̈oc Jehová tzꞌalani.
38 Max javilaj vachꞌilal ma yaelal, tato man̈oc Dios Axon̈ej Och tzꞌalani.
39 ¿Tas yuj chuc scabꞌi tato yuj co chucal syacꞌ co yaelal Dios?
40 Co bꞌeycꞌolejec val co bꞌa sicꞌlabꞌil, chajtil yilji co bꞌeybꞌal, scacꞌanxioch co bꞌa dꞌa yol scꞌabꞌ Jehová.
41 Caqꞌuecbꞌat co pensar dꞌa Dios aj satchaan̈, scalan dꞌa co lesal icha tic:
42 Ix och co mul, ix co pitej co bꞌa dꞌayach, maj on̈ acꞌ nivancꞌolal.
43 Ix javi yoval a cꞌol dꞌayon̈, ix on̈ a pechani, ix on̈ a sateli, majxo ocꞌlaj a cꞌool dꞌayon̈.
44 Ix a cꞌubꞌejel a bꞌa, najat ach bꞌatcan dꞌayon̈ yic maxtzac abꞌ co lesal.
45 Icha cꞌalem ix on̈ utej dꞌa scal masanil anima.
46 Masanil ebꞌ cajcꞌool, ix on̈ sbꞌuchval ebꞌ.
47 Tzon̈ te xivi yujto a ebꞌ ajcꞌol dꞌayon̈ tzon̈ syam ebꞌ, tzon̈ yixtan ebꞌ, tzon̈ satanel ebꞌ, xco chi.
48 Tzꞌel val jiljon yal in sat vocꞌ yuj cuscꞌolal, yujto van satel ebꞌ vetchon̈abꞌ.
49 Man̈ ol vactej vocꞌ yuj vabꞌann̈ej syail
50 masanto ol yacꞌcot svachꞌcꞌolal Jehová dꞌayon̈ dꞌa satchaan̈.
51 Te yaxo pax svabꞌ yedꞌ in pixan yuj tas tzꞌecꞌ dꞌa yibꞌan̈ ebꞌ ix ix dꞌa yol in chon̈abꞌ.
52 A ebꞌ ajcꞌool, tzin spech ebꞌ vachꞌchom malaj jabꞌoc in mul. Icha tzꞌaj spechji junoc nocꞌ much icha chiꞌ tzin yutej ebꞌ.
53 Pitzan in val ix in syumanem ebꞌ dꞌa yol jun jul, ix smacancan stiꞌ jun jul chiꞌ ebꞌ yedꞌ jun qꞌuen qꞌueen, man̈xa bꞌaj syal veli.
54 Ichato ay in em dꞌa yol a aꞌ, ix in naani to yicxo chamel vaji.
55 Mamin Jehová, ato dꞌa sjulal yich jun jul tic tzin avaj dꞌayach.
56 Abꞌ yoch in jaj, man̈ actej abꞌan in tevi.
57 Ix a nitzcot a bꞌa dꞌayin ayic ix ach vavtani, ix alan dꞌayin: Man̈ ach xivoc, xa chi.
58 Mamin, ix in a colcanel dꞌa yol scꞌabꞌ chamel.
59 Mamin Jehová, ojtac tas tzin utaj dꞌa man̈ stojolaloc tic. Bꞌo yaj dꞌayin dꞌa stojolal.
60 Ojtac tas snibꞌej ebꞌ ajcꞌol dꞌayin yedꞌ tas sna ebꞌ tzin yutej.
61 Mamin Jehová, ix abꞌ jantac chucal syal ebꞌ dꞌa in patic yedꞌ jantac tas sna ebꞌ tzin yutej.
62 Jun cꞌu syacꞌ ebꞌ in yalubꞌtan̈ani, snaan ebꞌ tas ol in yutoc.
63 Ilnabꞌ val, cꞌual dꞌacꞌval in sbꞌuchan ebꞌ.
64 Mamin Jehová, acꞌ spac dꞌa ebꞌ icha val smojalil yuj tas tzin yutej.
65 Acꞌ pitbꞌoquel spensar ebꞌ, tzacꞌanbꞌat catabꞌ dꞌa yibꞌan̈ ebꞌ.
66 Mamin, pech ebꞌ yedꞌ yoval a cꞌool. Satel ebꞌ dꞌa yolyibꞌan̈qꞌuinal tic.