Schabꞌil bꞌit yic cuscꞌolal
2
Te vachꞌ yilji chon̈abꞌ Sion, palta ix qꞌuicꞌbꞌi qꞌuinal dꞌay yujto te nivan ix aj scot yoval scꞌol Jehová. Man̈ jantacoc svachꞌil yilji Israel palta ix juvieli. Majxo snacotlaj scajnubꞌ Jehová yuj yoval scꞌool chiꞌ.2 Man̈xa junoc chon̈abꞌ bꞌaj cajan ebꞌ yin̈tilal vin̈aj Jacob ixto can yuj Jehová. A yuj yoval scꞌool, elan̈chamel ix laj yacꞌ lajvoquem scuartel ebꞌ aj Judá. Toxo ix satel snivanil yelcꞌoch jun nación yedꞌ masanil ebꞌ yajal yaj dꞌay.
3 Yuj yoval scꞌol chiꞌ, ix yacꞌ lajvoc masanil yipal Israel. Ix yiqꞌuel scolval dꞌay ayic ix javi ebꞌ ajcꞌool. Ix yacꞌoch scꞌacꞌalcꞌolal dꞌa yibꞌan̈ yin̈tilal vin̈aj Jacob, icha val junoc cꞌacꞌ satanel masanil tas.
4 A Jehová, lajan val ix yutej sbꞌa icha junoc ajcꞌool, ix yacꞌbꞌat sjul-labꞌ dꞌa stojolal chon̈abꞌ. Icha val junoc milum anima, ix smilcham ebꞌ xajan cuuj. Icha junoc cꞌacꞌ, icha val chiꞌ yajoch yoval scꞌol dꞌa yibꞌan̈ scajnubꞌ ebꞌ aj Sion.
5 Lajan ix scꞌulej Jehová icha val scꞌulej junoc ajcꞌool, juneln̈ej ix lajviem Israel yuuj. Ix spojem masanil scuartel yedꞌ sdespacho Judá. Tzololixon̈ej sjavi cuscꞌolal dꞌa yibꞌan̈ ebꞌ aj Judá chiꞌ yuuj.
6 Icha tzꞌaj yixtajbꞌat junoc lechpat, icha val chiꞌ ix aj yixtanbꞌat stemplo Jehová bꞌaj smolbꞌej sbꞌa ebꞌ chon̈abꞌ. A ix acꞌan sbꞌatcan qꞌuin̈ satcꞌolal yedꞌ scꞌual icꞌoj ip yuj ebꞌ aj Sion. A yuj yoval scꞌol Jehová ix spatiquejcanel ebꞌ rey yedꞌ ebꞌ sacerdote.
7 Toxo ix spatiquejel yaltar Jehová, man̈xa yopisio stemplo yuuj. Toxo ix yacꞌcanoch dꞌa yol scꞌabꞌ ebꞌ ajcꞌool yic sjuchajem smuroal. Val yel yav ebꞌ ajcꞌol dꞌa stemplo Jehová, ichato scꞌual qꞌuin̈.
8 A Jehová ix naan sjuanem smuroal chon̈abꞌ Sion. Ix cham val snaani tas ol aj sjuan lajvoc. Maj ocꞌlaj scꞌool masanto ix lajviem yuuj. Junxon̈ej ix aj yem juynaj storreal yedꞌ smuroal.
9 Toxon̈ej ix emcan vecan spuertail jun chon̈abꞌ chiꞌ dꞌa sat luum. Ix can̈chajpaxbꞌat yijchul ayochi. A vin̈ sreyal yedꞌ ebꞌ ayoch yajalil, ix bꞌatcan ebꞌ dꞌa scal ebꞌ chꞌoc chon̈abꞌil bꞌaj malaj scꞌaybꞌubꞌal Dios. Man̈xalaj tas syacꞌ Jehová yil ebꞌ schecabꞌ.
10 A ebꞌ yichamtac vinaquil chon̈abꞌ Sion man̈xalaj syal ebꞌ, cꞌojanem ebꞌ dꞌa sat luum. Syacꞌqꞌue pococ ebꞌ dꞌa sjolom, syacꞌanoch pichul ebꞌ yic cuscꞌolal. A ebꞌ ix cobꞌestac ix dꞌa Jerusalén tzꞌem n̈ojan ebꞌ ix dꞌa sat luum yuj qꞌuixvelal.
11 Ste ixtaxel in sat yuj oqꞌuel, max techaj cuscꞌolal vuj svabꞌi. Man̈xalaj in tecꞌanil yic svilan satel ebꞌ vetchon̈abꞌ. A ebꞌ unin tzato chuni, scham ebꞌ dꞌa yoltac calle yuj vejel.
12 Syal ebꞌ unin dꞌa snun icha tic: Acꞌ co vael, acꞌ co vino, xchi ebꞌ. Ichato echen tzꞌicꞌan ebꞌ, stelvi ebꞌ dꞌa yoltac scalleal chon̈abꞌ. Tzꞌem n̈ojnaj ebꞌ dꞌa yol scꞌabꞌ snun, tzꞌel scꞌol ebꞌ.
13 ¿Mach yedꞌoc ol ex in lajbꞌej ex aj Jerusalén? Ex aj chon̈abꞌ Sion, ¿tas junoc chꞌoxnabꞌil tzin chꞌox dꞌayex yic svacꞌan snivanil e cꞌool? Te nivan ix aj e lajviemi, ¿machto val ol ex acꞌan bꞌoxoc?
14 A tas ix yal ebꞌ syesejoch sbꞌa schecabꞌoc Dios dꞌayex, es masanil. Maj chꞌoxjiel e mul yuj ebꞌ, yuj chiꞌ maj qꞌuexvi e pensar. Ix alji es lolonel dꞌayex, ix eyacꞌanoch dꞌa e cꞌool.
15 Ayic tzꞌilji Jerusalén yuj ebꞌ tzꞌecꞌ dꞌa yol bꞌe, stzꞌit scꞌabꞌ ebꞌ sbꞌuchvaj dꞌay. Tzꞌel yav ebꞌ, stzicubꞌtan̈an sat ebꞌ sbꞌuchvaji. Syalan ebꞌ icha tic: ¿Tobꞌan am a jun chon̈abꞌ tic sbꞌinaj dꞌa sat lum tic to man̈xo jantacoc svachꞌil yilji? xchi ebꞌ.
16 Masanil ebꞌ ajcꞌol sbꞌuchvaj dꞌay, tzꞌel yav ebꞌ, schin̈an scꞌabꞌ ebꞌ, syalan ebꞌ icha tic: Toxo ix co satel Jerusalén dꞌa juneln̈ej. Aton jun cꞌu tic ix co tan̈vej val, a ticnaic van quilani, xchi ebꞌ.
17 Toxo ix elcꞌoch tas nabꞌil yuj Jehová, toxo ix elcꞌoch slolonel nabꞌil yuj dꞌa pecaꞌ. Ix on̈ yacꞌ sateli, majxo ocꞌlaj scꞌol dꞌayon̈. Ix el dꞌa scꞌol on̈ yacꞌan tzetzajoc, ix schaan yicꞌchaan̈ sbꞌa ebꞌ ajcꞌol chiꞌ.
18 Ex aj Sion, cꞌanec scolval Jehová dꞌa smasanil e cꞌool. Cꞌual dꞌacꞌval ocabꞌ yel yal e sat eyoqꞌui. Man̈ ex och vaan eyoqꞌui.
19 Cotac scal tzex qꞌue vaan, tzex avaj dꞌacꞌvalil, tze cꞌanan scolval Jehová. Mojbꞌejecqꞌue e cꞌabꞌ tzex ocꞌ dꞌa smasanil e cꞌol dꞌa yichan̈ Jehová. Cꞌanec yoqꞌuelcꞌolal yuj ebꞌ eyuninal, yujto a bꞌaj schalaj sbꞌa bꞌe van scham ebꞌ yuj vejel.
20 Mamin Jehová, naval sicꞌlabꞌil, ¿toc ay junocxo chon̈abꞌ tzutej icha tic? ¿Tocval smoj ay ebꞌ ix nunabꞌil schianbꞌat yuneꞌ tzato chuni? ¿Toc val smoj smacꞌjicham ebꞌ sacerdote yedꞌ ebꞌ a checabꞌ dꞌa yol a templo?
21 A ebꞌ unin yedꞌ ebꞌ ichamtac vinac, toxo ix em latzꞌan ebꞌ dꞌa yoltac calle schami. A ebꞌ quelemtac yedꞌ ebꞌ ix cobꞌestac, ix cham ebꞌ yuj qꞌuen espada. Dꞌa scꞌual yoval a cꞌool ix a macꞌcham ebꞌ, majxo ocꞌlaj a cꞌol dꞌa ebꞌ.
22 Mamin Jehová, yalxon̈ej bꞌaj ix icꞌcot tzijtum yaelal dꞌa Jerusalén, icha val tzꞌaj sjavi ebꞌ anima dꞌa scꞌual qꞌuin̈. Man̈xalaj mach ix colchajel dꞌa scꞌual yoval a cꞌol chiꞌ. A ebꞌ cuninal ix quil qꞌuibꞌoc, ebꞌ ix co cꞌaybꞌej, ix miljicham ebꞌ yuj ebꞌ ajcꞌool.