A Oyeꞌ Bꞌit Yic
CUSCꞌOLAL
Bꞌabꞌel bꞌit yic cuscꞌolal
1
Cuseltacxon̈ej ix ajcan chon̈abꞌ Jerusalén bꞌaj tzijtum anima dꞌa pecaꞌ. Lajan ix ajcan jun nivan chon̈abꞌ tic icha tzꞌajcan junoc ix ix toxo ix cham yetbꞌeyum. A dꞌa pecaꞌ, ichato yajal yaj dꞌa scal juntzan̈ nación, axo ticnaic, tzꞌacꞌji pural yoch dꞌa munlajel.2 Lajan icha junoc ix ix sicꞌsicꞌan yocꞌ dꞌacꞌvalil, chalali val yemta yal sat dꞌa spacꞌultac stiꞌ. A dꞌa scal juntzan̈ nación vachꞌ yacꞌan yedꞌoc, man̈xa junoc tzꞌacꞌan snivanil scꞌool. Masanil ix meltzajoch ajcꞌolal dꞌay.
3 Ix icꞌjibꞌat ebꞌ aj Judá dꞌa chꞌoc chon̈abꞌil. Qꞌuixvubꞌtac yaj ebꞌ yuj munlajel te ya bꞌaj ayochi. Ayxoecꞌ ebꞌ dꞌa scal juntzan̈xo nación. Maxtzac yicꞌ jabꞌoc yip ebꞌ. Ix yamchaj ebꞌ yuj ebꞌ spechani, yuj chiꞌ ayxoecꞌ ebꞌ dꞌa scal yaelal.
4 Cuseltacxon̈ej yaj sbꞌeal Sion ticnaic. Man̈xalaj mach sjavi dꞌa qꞌuin̈. Tzꞌinini yajcan stiꞌ chon̈abꞌ. Axon̈ej oqꞌuel syacꞌ ebꞌ sacerdote. A ebꞌ ix cobꞌestac tacnacxon̈ej scꞌol ebꞌ ix. A ebꞌ aj Jerusalén ayoch yaelal dꞌa yibꞌan̈ ebꞌ.
5 Toxo ix acꞌji ganar ebꞌ cajan dꞌa Sion. Ix icꞌjibꞌat ebꞌ dꞌa chꞌoc chon̈abꞌil yuj ebꞌ yajcꞌool. A Jehová ix acꞌanoch yaelal dꞌa yibꞌan̈ ebꞌ, yujto te pit ix yutej sbꞌa ebꞌ. A ebꞌ yajcꞌol ebꞌ chiꞌ, van sqꞌuechaan̈ ebꞌ.
6 Toxo ix satel svachꞌil yilji chon̈abꞌ Sion chiꞌ. A ebꞌ yajalil ebꞌ, lajan ebꞌ icha nocꞌ cꞌultaquil chej maxtzac ilchaj svael. Van yel yip, yuj chiꞌ toxon̈ej sn̈er yoc dꞌa yichan̈ ebꞌ spechani.
7 A val dꞌa scꞌual ayoch ebꞌ aj Jerusalén yabꞌan syail, ix snaancot masanil sbꞌeyumal ebꞌ dꞌa yalan̈taxo. Ayic ix yamchaj ebꞌ yuj ebꞌ yajcꞌol chiꞌ, man̈xa mach ix colanel ebꞌ. A val yic tzꞌilji ebꞌ yuj juntzan̈xo ebꞌ yajcꞌool, sbꞌuchji ebꞌ yujto toxo ix telvi ebꞌ.
8 A ebꞌ aj Jerusalén chiꞌ, yelxo nivan schucal ebꞌ ix yacꞌochi, yuj chiꞌ smoj val syajjiel ebꞌ. Dꞌa pecaꞌ nivan yelcꞌoch jun chon̈abꞌ chiꞌ dꞌa yol sat ebꞌ anima, axo ticnaic, syaj ebꞌ, yujto toxo ix ilji sqꞌuixveltaquil. Yuj chiꞌ a ebꞌ aj Jerusalén tzꞌocꞌ val ebꞌ, toxon̈ej scꞌubꞌejel sat ebꞌ yuj qꞌuixvelal.
9 Te nivan chequel yaj schucal ebꞌ cajan dꞌa Jerusalén chiꞌ, palta malaj tas sna ebꞌ yuj tas ol javoc dꞌa yibꞌan̈. Te satubꞌtac ix aj stelvi schon̈abꞌ ebꞌ, malaj mach snivanan scꞌol ebꞌ. Syal ebꞌ anima taꞌ: Mamin Jehová, ina val co yaelal, yujto a ebꞌ ajcꞌol dꞌayon̈ syicꞌchaan̈ sbꞌa ebꞌ on̈ yixtani, xchi ebꞌ.
10 A ebꞌ ajcꞌool chiꞌ, toxo ix yiquej masanil sbꞌeyumal ebꞌ aj Jerusalén ebꞌ. Ix yil val ebꞌ aj chon̈abꞌ chiꞌ yoch lemnaj ebꞌ chꞌoc chon̈abꞌil dꞌa yol stemplo Dios, aton juntzan̈ anima yalnac Jehová to max yal yochi.
11 Masanil ebꞌ cajan taꞌ tzꞌocꞌ ebꞌ, tzꞌecꞌ ebꞌ sayan svael. Toxo ix yacꞌbꞌat sbꞌeyumal ebꞌ sqꞌuexuloc svael yic max cham ebꞌ. Ix yalan ebꞌ: Mamin Jehová, cotan̈ qꞌuelan dꞌayon̈ yuj tas ix aj co telvi. Il val och a cꞌol dꞌayon̈ yuj co yaelal.
12 A ex tzex ecꞌ dꞌa co lacꞌanil tic, ochan̈ec vaan tze naani. ¿Toc ay val yaelal icha quic tic? Yelxo val sco te abꞌej syail. Ix yacꞌcot jun yaelal tic Jehová dꞌa quibꞌan̈ yuj yoval scꞌool.
13 Ato dꞌa satchaan̈ ix yacꞌcot jun cꞌacꞌ Jehová, yic syacꞌ lajvoquem co bꞌaquil. Ix sbꞌoem jun yaal dꞌa quichan̈, icha val chiꞌ ix aj co meltzajcot dꞌa co patic. Ix on̈ actajcan yuuj, cotac scal syacꞌanoch yaelal dꞌa quibꞌan̈.
14 A Jehová, toxo ix yaloch co chucal dꞌa co sat, an̈ejaꞌ co chucal chiꞌ ix on̈ tzecꞌani, icha val junoc icatz al yajoch dꞌa quibꞌan̈. Tzꞌel val quip yuuj. Ix on̈ yacꞌoch Dios Cajal dꞌa yol scꞌabꞌ ebꞌ cajcꞌool. Maxtzac yal co tecꞌbꞌan co bꞌa dꞌa yichan̈ ebꞌ.
15 A Jehová ix spatiquejel ebꞌ soldado tzon̈ colan calani. Ix yacꞌcot jantac ebꞌ soldado ajcꞌol dꞌayon̈ yic satel masanil ebꞌ co soldado quelemtac. Toxo ix on̈ tecꞌjiem a on̈ aj Judá on̈ tic yuj Jehová, icha val tzꞌaj stecꞌjiel yal sat teꞌ uva.
16 Yuj val juntzan̈ tic tzꞌel val yal co sat coqꞌui. Man̈xalaj mach tzꞌacꞌan snivanil co cꞌool. Man̈xalaj mach syal yacꞌan co tecꞌanil. A dꞌa scal oval chiꞌ ix cactejcan ebꞌ cuninal, yujto ix on̈ can dꞌa yalan̈ yuj ebꞌ ajcꞌol chiꞌ.
17 Ix quicꞌchaan̈ co cꞌabꞌ co tevi, palta malaj mach tzꞌacꞌan snivanil co cꞌool. A Jehová ix molbꞌancot ebꞌ cajan dꞌa co lacꞌanil yic syacꞌan oval ebꞌ quedꞌoc. A Jerusalén tic, yajyoncꞌolal ix ajcan dꞌa ebꞌ.
18 Ix scꞌulej val Jehová icha val smojalil, yujto ix co pitej co bꞌa dꞌa schecnabꞌil. Ex chon̈abꞌ, abꞌec val tas ol calaꞌ. Ilec val co yaelal. A ebꞌ cuninal, toxo ix icꞌjibꞌat ebꞌ dꞌa chꞌoc chon̈abꞌil.
19 Ix co cꞌan scolval juntzan̈ nación ayoch quedꞌoc yalani, palta ton̈ej tzon̈ yixtej ebꞌ. A ebꞌ vin̈ sacerdote yedꞌ ebꞌ vin̈ ichamtac vinac, ayic van yecꞌ ebꞌ vin̈ say svael, ix cham ebꞌ vin̈ yuj vejel dꞌa yoltac scalleal chon̈abꞌ tic.
20 Mamin Jehová, ina val tas caji. Max techajlaj co yaelal tic cuj scabꞌi. Pitzꞌitzꞌi yoch dꞌa co cꞌol scabꞌi ayic sco naancot co pitalil. A dꞌa spatiquel co chon̈abꞌ tic smiljicham ebꞌ cuninal dꞌa qꞌuen espada, axo dꞌa yol chon̈abꞌ, ay pax chamel.
21 A ebꞌ chꞌoc chon̈abꞌil, syabꞌ val ebꞌ yel cav yuj co cuscꞌolal, palta malaj mach snivanan co cꞌool. Masanil ebꞌ ayoch ajcꞌolal dꞌayon̈, yojtacxon̈ej co yaelal ebꞌ, stzalaj val ebꞌ yuj yaelal ix acꞌoch dꞌa quibꞌan̈. Javocabꞌ jun cꞌu albꞌilcan uj dꞌa pecaꞌ, yic vachꞌ lajan ol aj ebꞌ icha caj tic.
22 Nacot jantac schucal ebꞌ. Utejpax ebꞌ yuj schucal, icha val tzon̈ utej yuj quic tic. Te nivanxo tzon̈ oqꞌui, tzꞌel yip co pixan scabꞌi, xchi ebꞌ aj Jerusalén chiꞌ dꞌa Jehová.