Yoil bꞌit yic cuscꞌolal
5
Mamin Jehová, nacot jantac tas ix ecꞌbꞌat dꞌa quibꞌan̈, ina val tzꞌaj quixtaji.2 Masanil co macbꞌen, ix yiquej ebꞌ chꞌoc chon̈abꞌil, axo co pat yicxo ebꞌ yaji.
3 Mebꞌaꞌ unin ix on̈ ajcani, man̈xalaj co mam. Axo ebꞌ ix co nun, toxo ix can ebꞌ ix schꞌocojil, man̈xalaj yetbꞌeyum ebꞌ ix.
4 A a aꞌ scuqꞌuej, sco man aꞌ, axo teꞌ co cꞌatzitz, sco tup teꞌ.
5 Ayn̈ejoch ebꞌ ajcꞌol on̈ spechan bꞌeyecꞌoc. Tzon̈ te cꞌunbꞌi, palta maxtzac yal quicꞌan jabꞌoc quip yujto ijanoch ebꞌ dꞌa co patic.
6 Ix bꞌat bꞌechan̈ co cꞌabꞌ dꞌa ebꞌ aj Egipto yedꞌ dꞌa ebꞌ aj Asiria, yuj co cꞌanan jabꞌoc co vael yic max on̈ chami.
7 A ebꞌ co mam quicham ochnac smul, palta chamnacxo ebꞌ, axo dꞌa quibꞌan̈ scotcan yaelal yuj smul ebꞌ chiꞌ.
8 A ticnaic ayon̈ och dꞌa yol scꞌabꞌ ebꞌ ayoch checabꞌoc dꞌa yalan̈taxo. Man̈xalaj mach tzon̈ colanel dꞌa yol scꞌabꞌ ebꞌ.
9 Scal xivcꞌolal sbꞌat co say jabꞌoc co vael, yujto ay smay yuj ebꞌ acꞌum oval dꞌa tzꞌinan luum.
10 Yuj scꞌacꞌal vejel tzon̈ te qꞌuicꞌbꞌi.
11 Dꞌa Sion yedꞌ dꞌa juntzan̈ chon̈abꞌ dꞌa yol yic Judá, tzꞌixtaj ebꞌ ix quetbꞌeyum yedꞌ ebꞌ ix quisil.
12 Ix qꞌue dꞌun̈an ebꞌ cajalil yuj ebꞌ ayoch ajcꞌolal dꞌayon̈. Man̈xa yelcꞌoch jabꞌoc ebꞌ ichamtac vinac dꞌa yol sat ebꞌ.
13 A ebꞌ vin̈ quelemtac tecꞌan, tzꞌacꞌjioch ebꞌ vin̈ dꞌa jaxoj harina, axo ebꞌ vin̈ yunetac quelem, stelvi ebꞌ vin̈ dꞌa yalan̈ teꞌ cꞌatzitz.
14 Man̈xalaj ebꞌ vin̈ ichamtac vinac ayecꞌ dꞌa stiꞌ chon̈abꞌ sbꞌoan yaj yoval ebꞌ anima. Man̈xalaj ebꞌ vin̈ quelemtac sbꞌitan dꞌa tzalajcꞌolal.
15 Man̈xalaj co tzalajcꞌolal. A co chan̈al yic tzalajcꞌolal, ix meltzajoch cuscꞌolalil.
16 Maxtzac on̈ bꞌinaj icha dꞌa pecaꞌ. Te obꞌiltac on̈, yujto ix och co mul.
17 Man̈xa yip co pixan yuj cuscꞌolal, van yixtax yol co sat yuj oqꞌuel.
18 Yujto ix satjiel stemplo Dios dꞌa tzalan Sion, yuj chiꞌ axon̈ej nocꞌ vaax tzꞌecꞌ taꞌ.
19 Palta a ach pax tic ach Jehová, Yajal achn̈ej, ayn̈ej ecꞌ opisio dꞌa masanil qꞌuinal.
20 ¿Tas yuj tzon̈ bꞌatcan satcꞌolal uj dꞌa juneln̈ej? ¿Tas yuj te nivanxo tiempo ix on̈ actejcani?
21 Mamin Jehová, icꞌon̈xi meltzaj dꞌayach, ol on̈ meltzajxoc. Comonoc vachꞌ tzon̈ ajxi icha dꞌa yalan̈taxo.
22 Palta ina ix on̈ a patiquejcaneli. Ix ecꞌ dꞌa yibꞌan̈ acꞌancot yaelal dꞌa quibꞌan̈.