Aljocabꞌ vachꞌ lolonel dꞌa Jehová yuj tas sbꞌonac
148
Calec vachꞌ lolonel dꞌa Jehová.Aljocabꞌ vachꞌ lolonel dꞌa Jehová masanto dꞌa schaan̈il satchaan̈.
2 Alec vachꞌ lolonel dꞌay masanil ex yángel. Alec vachꞌ lolonel masanil ex soldadoal satchaan̈.
3 Icꞌchajocabꞌ chaan̈ Jehová yuj cꞌu yedꞌ qꞌuen uj. Icꞌchajocabꞌ chaan̈ yuj qꞌuen nitcꞌanal te vachꞌ yilji yoc.
4 Icꞌchajocabꞌ chaan̈ yuj satchaan̈, to chaan̈ ay yedꞌ pax yuj a aꞌ ayecꞌ dꞌa yibꞌan̈ satchaan̈ chiꞌ.
5 Alchajocabꞌ vachꞌ lolonel dꞌa Jehová, yujto ton̈ej ix yalaꞌ ix bꞌocan smasanil.
6 Aꞌ ix bꞌoancan masanil juntzan̈ chiꞌ dꞌa yedꞌtal yic vachꞌ ayecꞌ taꞌ dꞌa masanil tiempo, ix yacꞌancanoch dꞌa sleyal to malaj bꞌaqꞌuin̈ ol qꞌuexchajoc.
7 Yalocabꞌ vachꞌ lolonel dꞌa Jehová masanil tastac ay dꞌa sat luum tic, nocꞌ nivac nocꞌ ay dꞌa yol aꞌ mar yedꞌ pax nocꞌ ay dꞌa sjulal yich aꞌ,
8 yedꞌ lebꞌlon, qꞌuen sacbꞌat, qꞌuen sacbꞌacom, qꞌuicꞌal asun yedꞌ chacxuxum icꞌ, cꞌanabꞌajumocabꞌ syutej sbꞌa dꞌa slolonel Jehová chiꞌ.
9 Yalocabꞌ vachꞌ lolonel lum nivac vitz dꞌa Jehová, lum tzalquixtac, te teꞌ syacꞌ sat, teꞌ cꞌuteꞌ,
10 yedꞌ nocꞌ cꞌultaquil nocꞌ, nocꞌ molbꞌetzal nocꞌ, nocꞌ sn̈ervi, ma sjachvi yedꞌ pax nocꞌ much.
11 Ex sreyal yolyibꞌan̈qꞌuinal tic, ex anima dꞌa junjun chon̈abꞌ, ex yajal yedꞌ ex tze bꞌo yaj ebꞌ chon̈abꞌ,
12 ex vinac, ex ix, ex ichamtac anima yedꞌ pax ex unin, alec vachꞌ lolonel dꞌa Jehová e masanil.
13 Alec vachꞌ lolonel dꞌa Jehová e masanil yujto an̈ej te bꞌinajnac. A stziquiquial ay masanto dꞌa yibꞌan̈ satchaan̈ yedꞌ dꞌa yibꞌan̈ lum luum tic.
14 Aꞌ ix acꞌan quipal a on̈ schon̈abꞌ on̈ tic. Calec vachꞌ lolonel dꞌay a on̈ israel on̈ tic, a on̈ton te xajanabꞌil on̈ yuuj.
Calec vachꞌ lolonel dꞌa Jehová.