A svachꞌcꞌolal Dios dꞌa Jerusalén
147
Calec vachꞌ lolonel dꞌa Jehová.Man̈xo jantacoc svachꞌil co bꞌitan bꞌit dꞌa co Diosal. Smojton val co bꞌitan dꞌay yedꞌ juntzan̈ bꞌit te vachꞌ.
2 A Jehová sbꞌoanxi Jerusalén, ol smolbꞌejxicot ebꞌ quetisraelal sacleminac yajcanbꞌati.
3 A tzꞌacꞌan snivanil scꞌol ebꞌ pitzꞌanoch cuselal dꞌa spixan. Aꞌ tzꞌan̈tan syaelal ebꞌ chiꞌ.
4 Aꞌ naꞌannac jantac sbꞌisul qꞌuen cꞌanal sbꞌonac, yacꞌannacoch sbꞌi junjun qꞌueen.
5 Yelxo val te nivan yelcꞌoch co Diosal tic, nivan spoder, malaj slajvubꞌal sjelanil.
6 Aꞌ tzꞌicꞌan qꞌue vaan ebꞌ anima emnaquil yeqꞌui, palta a ebꞌ scꞌulan chucal, tzꞌicꞌchajcanem ebꞌ sicꞌlabꞌil yuuj.
7 Co bꞌitejec Jehová yic scacꞌan yuj diosal yedꞌ teꞌ arpa sco bꞌitejec.
8 Aꞌ tzꞌacꞌanoch asun dꞌa satchaan̈, slajvi chiꞌ syacꞌancot n̈abꞌ dꞌa sat luum tic. Aꞌ tzꞌacꞌan qꞌuibꞌ an̈ an̈cꞌultac dꞌa tzalquixtac.
9 An̈ejton pax aꞌ tzꞌacꞌan svael nocꞌ nocꞌ yedꞌ nocꞌ yunetac joj ayic tzꞌel yav nocꞌ yuj vejel.
10 A Jehová, max tzalajlaj yedꞌ ebꞌ anima tzꞌacꞌanoch yip nocꞌ chej, ma yipal ebꞌ soldado yipoc scꞌool.
11 Palta stzalaj yedꞌ ebꞌ ay xivcꞌolal dꞌay, aton ebꞌ tzꞌacꞌanoch svachꞌcꞌolal yipoc scꞌool.
12 Ex aj Jerusalén, calec vachꞌ lolonel dꞌa Jehová. Ex aj Sion, co bꞌitejec co Diosal.
13 Aꞌ tzꞌacꞌanoch yip yijchuloc spuertail chon̈abꞌ Jerusalén, syacꞌanpax svachꞌcꞌolal dꞌa ebꞌ cuninal.
14 Aꞌ tzꞌacꞌan juncꞌolal dꞌa yol smacbꞌen co chon̈abꞌ tic, syacꞌanpax bꞌudꞌjoc yuj ixim trigo te vachꞌ.
15 Aꞌ tzꞌacꞌancot slolonel dꞌa sat luum tic, elan̈chamel tzꞌelcꞌochi.
16 A co Diosal tzꞌacꞌancot qꞌuen sacbꞌacom icha yilji sac lana. Aꞌ tzꞌacꞌanoch qꞌuen cheev pococal, icha qꞌuen ticꞌaqꞌuil taan̈ tzꞌajcan qꞌueen.
17 Aꞌ tzꞌacꞌancot qꞌuen sacbꞌat icha qꞌuen cotac qꞌueen. Axo val sical qꞌueen, malaj junoc mach stechaj yuuj.
18 Syalanpaxi to tzꞌulaxbꞌat qꞌueen, syacꞌancot icꞌ, yic sbꞌey yalil qꞌueen chiꞌ.
19 A slolonel yedꞌ scꞌaybꞌubꞌal, ix yacꞌ cojtaquejel a on̈ israel yin̈tilal on̈ vin̈aj Jacob tic.
20 Man̈ ichoctaꞌ ix yutej dꞌa junocxo nación. Maj yojtaquejel-laj scꞌaybꞌubꞌal co Diosal juntzan̈xo chon̈abꞌ chiꞌ.
Calec vachꞌ lolonel dꞌa Jehová.