Bꞌitanocabꞌ masanil anima dꞌa Jehová
Bꞌit yic aloj vachꞌ lolonel, yic vin̈aj David.
145
Ach in Diosal, a ach ton in Reyal ach, ol valcanel a bꞌinajnaquil. Dꞌa masanil tiempo ol vacꞌ yuj diosal dꞌayach.2 Junjun cꞌu ol val vachꞌ lolonel dꞌayach. Ol ach vicꞌanchaan̈ dꞌa masanil tiempo.
3 Mamin Jehová, te nivan ton elcꞌochi, a moj ton val yalchaj vachꞌ lolonel dꞌayach. A a bꞌinajnaquil, man̈xo bꞌischajbꞌenoc.
4 A ebꞌ mamabꞌil, ol yalel yabꞌixal tastac tza cꞌulej dꞌa ebꞌ yuninal. Axo ebꞌ uninabꞌil chiꞌ, ol yal pax ebꞌ dꞌa ebꞌ yixchiquin.
5 Ol yalel yabꞌixal a tziquiquial ebꞌ, aton te nivan yelcꞌochi, a inxo jun, ol in naubꞌtan̈ej tas satubꞌtac tza cꞌulej.
6 Ol alchajel yabꞌixal tas satubꞌtac ix a cꞌulej, te ay pax smay. A inxo tic, ol valel a bꞌinajnaquil.
7 Ol alchajel yabꞌixal jantac a nivan vachꞌcꞌolal, te chaan̈ ol aljoc to te vachꞌ ach toni.
8 Mamin Jehová, te nivan ton a vachꞌcꞌolal, ay pax oqꞌuelcꞌolal, man̈ elan̈chameloc scot oval, tzꞌocꞌn̈ej a cꞌool dꞌayon̈.
9 Mamin Jehová, yelxo val te vachꞌ ach dꞌa masanil anima. Masanil tas a bꞌonac, te xajan uuj.
10 Mamin Jehová, masanil tastac bꞌobꞌil uuj, yalocabꞌ vachꞌ lolonel dꞌayach. Yacꞌocabꞌ yuj diosal ebꞌ a chon̈abꞌ dꞌayach.
11 Yalocabꞌel ebꞌ to te vachꞌ acꞌan yajalil. Yalocabꞌ vachꞌ lolonel ebꞌ dꞌa tas ix a cꞌulej, a schꞌoxanel a nivan poder.
12 A yabꞌixal a poder yedꞌ a bꞌinajnaquil dꞌa opisio, ol yabꞌ ebꞌ anima.
13 A opisio ayn̈ej ecꞌ dꞌa juneln̈ej, Yajal ach dꞌa masanil tiempo. A ach tic tzacꞌn̈ejelcꞌoch tas tzalaꞌ. Te vachꞌ ach yedꞌ masanil tas a bꞌonac.
14 Mamin Jehová, tzacꞌ yip ebꞌ toxo val stelvi, tzicꞌan qꞌue vaan ebꞌ tzꞌixtaxi.
15 A masanil ebꞌ anima, stan̈vej a colval ebꞌ, yujto a ach tzacꞌ svael ebꞌ dꞌa stiempoal.
16 Elbꞌenn̈ej tas uuj dꞌa smasanil a cꞌool, tzacꞌan svael masanil tas pitzan.
17 Mamin Jehová, tojolton a bꞌeybꞌal, te ay a vachꞌcꞌolal dꞌa tas a bꞌonaccani.
18 Bꞌecann̈ej a cꞌol a colvaj dꞌa ebꞌ syal sbꞌa dꞌayach dꞌa smasanil scꞌool.
19 Mamin Jehová, tzacꞌ tas icha sgana ebꞌ ay xivcꞌolal dꞌayach. Ayic scꞌanan ebꞌ, tzabꞌi tza colan ebꞌ.
20 Mamin Jehová, tzil ebꞌ tzach xajanani. Axo ebꞌ scꞌulan chucal jun, tza satel ebꞌ.
21 Mamin Jehová, sval vachꞌ lolonel dꞌayach. Axo pax masanil tas bꞌobꞌil uuj, yalocabꞌ vachꞌ lolonel dꞌayach ticnaic yedꞌ dꞌa masanil tiempo.