A acꞌoj yuj diosal
Sbꞌit jun tic vin̈aj David.
144
Aljocabꞌ vachꞌ lolonel dꞌa Jehová, aton tzꞌacꞌan vip. Aton val tzin cꞌaybꞌani, syacꞌanpax in jelanil yic vachꞌ svacꞌ oval.2 Aton icha in n̈aqꞌueen, icha val in cuartel, in Columal paxi. Aꞌ tzin cꞌubꞌaneli. Aꞌ ayoch ven̈uloc. Aꞌ tzꞌacꞌanoch ebꞌ chon̈abꞌ dꞌa yalan̈ in mandar.
3 Mamin Jehová ¿tas val jabꞌoc quelcꞌoch a on̈ anima on̈ tic dꞌa yol a sat, yuj chiꞌ tzon̈ a nacoti? ¿Tas val quelcꞌochi yuj chiꞌ tzon̈ a yaꞌilej?
4 A on̈ anima on̈ tic, lajan on̈ icha val bꞌaj squicꞌ quicꞌ, axo co qꞌuinal icha val junoc en̈ul tzꞌeqꞌui.
5 Mamin, jac spuertail satchaan̈ yic tzach emuli. Tzach emul dꞌa jolomtac vitz yic sqꞌue stabꞌil lum uuj.
6 Julemta junoc a jul-labꞌ, aton jun cꞌacꞌ tzꞌecꞌ copnajoc, tza pechanbꞌat ebꞌ ayoch ajcꞌolal dꞌayach dꞌa scal somcꞌolal.
7 Masanto dꞌa satchaan̈ chiꞌ tzaqꞌuemta a cꞌabꞌ tzin a colanel dꞌa jun aꞌ mar te nivan, syalelcꞌochi, aton ebꞌ chꞌoc chon̈abꞌil.
8 Colinel dꞌa ebꞌ esalvum chiꞌ, aton ebꞌ syicꞌchaan̈ scꞌabꞌ syacꞌan stiꞌ dꞌa tastac man̈ yeloc.
9 Ach in Diosal, ol in bꞌitej jun acꞌ bꞌit dꞌayach. Ol in bꞌitan yedꞌ sbꞌital salterio dꞌayach.
10 Uuj val, syal yuj ebꞌ rey, a ach ton ix in a col dꞌa qꞌuen espada tzon̈ milanchamoc, a in David a checabꞌ in tic.
11 A ticnaic, colinel dꞌa yol scꞌabꞌ ebꞌ chꞌoc chon̈abꞌil, ebꞌ esalvum syacꞌ stiꞌ dꞌa tastac man̈ yeloc syalaꞌ.
12 Qꞌuibꞌocabꞌ ebꞌ cuninal icha val tas tzꞌavchaj to ya ilabꞌil. A ebꞌ ix quisil lajanocabꞌ ebꞌ ix icha junoc yoyal templo tzeybꞌil, te vachꞌ yilji.
13 A co pat, bꞌudꞌjinacocabꞌel yuj junjun macan̈ vael. A nocꞌ co calnel, qꞌuibꞌocabꞌ sbꞌisul nocꞌ dꞌa smilal. Man̈xo bꞌischajbꞌenocabꞌ tzꞌaj sbꞌisul nocꞌ co vacax.
14 Uneviocabꞌ nocꞌ, mocabꞌ ton̈ejoc tzꞌecꞌ stiꞌ nocꞌ. Malajocabꞌ mach tzꞌel yav dꞌa yol scalleal co chon̈abꞌ yuj yaelal.
15 Yelxo val te vachꞌ yic junoc chon̈abꞌ to icha chiꞌ yaji. Yelxo val te vachꞌ yic junoc chon̈abꞌ to a Jehová ayoch sDiosaloc.