A ach ayach och yipoc in cꞌool
Sbꞌit jun tic vin̈aj David.
143
Mamin Jehová, abꞌ in lesal, cham val abꞌan tas svalaꞌ. Tacꞌvan̈ dꞌayin, ina to te tojol ach, tzacꞌann̈ejelcꞌoch tas tzalaꞌ.2 Man̈ a cꞌanbꞌej tas vaj a in a checabꞌ in tic, yujto malaj junoc mach vachꞌ yaj dꞌa a sat.
3 Ix in pechji bꞌeyecꞌ yuj ebꞌ ayoch ajcꞌolal dꞌayin, ix in stecꞌanem ebꞌ dꞌa sat luum. Ix in yacꞌ cajnaj ebꞌ dꞌa scal qꞌuicꞌalqꞌuinal, icha val yaj ebꞌ chamnacxo.
4 Man̈xo animaoc vaj ticnaic svabꞌi, te somchajnac in cꞌool.
5 Tzin nacot juntzan̈ cꞌual ecꞌnac dꞌa pecaꞌ, tzin naubꞌtan̈an masanil tas a bꞌonac dꞌa yalan̈tax chiꞌ.
6 A dꞌayach tzin mojbꞌejqꞌue in cꞌabꞌ, tzach in nibꞌej val, icha val junoc lum taquin̈ luum snibꞌan a aꞌ.
7 Mamin Jehová, tacꞌvan̈ dꞌayin dꞌa elan̈chamel, toxo val tzꞌel in cꞌol svabꞌi. Man̈ a yaej a colval dꞌayin. Icha val ebꞌ chamnac smucchajemi, icham chiꞌ ol in ajoc tato tza yaej a colval dꞌayin.
8 Acꞌ in nacot a vachꞌcꞌolal dꞌa junjun qꞌuin̈ibꞌalil, ina to a ach tzach vacꞌoch yipoc in cꞌool. Chꞌox dꞌayin tas ol aj in bꞌeybꞌati, yujto van in lesalvi dꞌayach.
9 Mamin Jehová, colinel dꞌa yol scꞌabꞌ ebꞌ ajcꞌool, yujto a dꞌayach tzin say in colnabꞌil.
10 Cꞌaybꞌej in yic tzin bꞌo icha tas tza nibꞌej, yujto in Diosal ach. Aocabꞌ Espíritu vachꞌ tzin icꞌan bꞌey dꞌa a vachꞌ bꞌeybꞌal.
11 Mamin, man̈ in a cha chamoc, yic vachꞌ max alchaj chucal lolonel dꞌayach. Icꞌ in elta dꞌa scal vilcꞌolal, yujto vachꞌ ach toni.
12 Yuj a vachꞌcꞌolal dꞌayin, yuj chiꞌ tza satcanel masanil ebꞌ ayoch ajcꞌolal dꞌayin, yujto a checabꞌ in.