A dꞌayach tzin col in bꞌa
Slesal jun tic vin̈aj David ayic ix scꞌubꞌanel sbꞌa vin̈ dꞌa yol qꞌuen n̈aqꞌueen yic tzon̈ scꞌaybꞌej.
142
Mamin Jehová, a dꞌayach tzin avaji ayic svalan in bꞌa. Svacꞌ val vip in cꞌanan dꞌayach to tzꞌocꞌ a cꞌool dꞌayin.2 Dꞌa ichan̈ sval in bꞌa, a val dꞌa ichan̈ sval vilcꞌolal.
3 Mamin Jehová, ayic man̈xo animaoc vaj svabꞌi, ojtac val in bꞌe. A dꞌa jun bꞌe bꞌaj tzin bꞌati, ataꞌ ix yaqꞌuem yaal ebꞌ ajcꞌol dꞌayin.
4 Tzin bꞌat qꞌuelan dꞌa in vachꞌ, malaj junoc mach sjavi yic tzꞌoch vedꞌoc. Malaj mach tzin colani. Malaj mach tzꞌoch ilcꞌolal vuuj, vachꞌchom tzin chami.
5 Mamin, a val dꞌayach sval in bꞌa, svalan icha tic: A dꞌayach tzin col in bꞌa, a achn̈ej tzach in nibꞌej dꞌa yichan̈ masanil tas dꞌa sat luum tic.
6 Cotan̈ qꞌuelan dꞌayin tzin avaj dꞌayach, yujto malaj vip. Colinel dꞌa ebꞌ tzin pechan bꞌeyecꞌoc, yujto te ay yip ebꞌ dꞌa vichan̈.
7 Icꞌ in elta dꞌa scal in yaelal in cꞌanaꞌ, yic vachꞌ ol val vachꞌ lolonel dꞌayach, axo ebꞌ anima vachꞌ spensar ol och oyan ebꞌ dꞌa in patic ayic ol acꞌan a vachꞌcꞌolal dꞌayin, xin chi.