Ay val och Jehová yipoc in cꞌool
Sbꞌit jun tic vin̈aj David.
141
Mamin Jehová, sval in bꞌa dꞌayach, cotan̈ dꞌa elan̈chamel. Abꞌ in jaj ayic svalan in bꞌa dꞌa ichan̈.2 Mamin, vachꞌocabꞌ sqꞌuecꞌoch in lesal icha val sqꞌue stabꞌil incienso dꞌa ichan̈. Axo in cꞌabꞌ mojanqꞌue dꞌayach, lajanocabꞌ val icha ofrenda dꞌa yemcꞌualil dꞌa yol a sat.
3 Mamin Jehová, tan̈vej in tiꞌ, yic vachꞌ man̈ ol val chucal lolonel.
4 Najat tzicꞌcanel chucal dꞌa in pensar. Man̈ in a cha bꞌeyecꞌ dꞌa chucal bꞌeybꞌal. Man̈ in a chabꞌat vael bꞌaj ay snivac vael ebꞌ scꞌulan chucal.
5 Tato a junoc anima vachꞌ tzin macꞌani, vachꞌton tzin yutej. Tato tzin stumej, icha val to syacꞌoch perfume dꞌayin, yuj chiꞌ scha in cꞌool. Palta tzin lesalvin̈ej yic vachꞌ syamchajoch vaan tas scꞌulej ebꞌ chuc.
6 A ebꞌ yajalil ebꞌ scꞌulan chucal, ol ecchajbꞌat ebꞌ dꞌa sattac tenam, icha chiꞌ ol aj yilan ebꞌ anima to yel ix valaꞌ.
7 A sbꞌaquil ebꞌ, sacleminac ol ajcanbꞌat bꞌaj smucchaj ebꞌ chamnac, icha tzꞌajcanbꞌat lum luum ayic sbꞌoji junoc olan.
8 Mamin Jehová in Diosal ach, ay val och in pensar dꞌayach. A dꞌayach tzin say in colnabꞌil, man̈ in actejcani.
9 Colinel dꞌa syaal ebꞌ tzꞌacꞌan chucal dꞌayin.
10 Canocabꞌ ebꞌ chuc chiꞌ dꞌa syaal chiꞌ, a inxo jun, ol in ecꞌn̈ej.