A lesal yic scꞌanji scolval Dios
Sbꞌit jun tic vin̈aj David sbꞌitej vin̈ cuchbꞌum dꞌa bꞌit.
140
Mamin Jehová, colinel dꞌa yol scꞌabꞌ ebꞌ scꞌulan chucal, cꞌubꞌej in el dꞌa ebꞌ bꞌaj malaj yelcꞌoch a cꞌaybꞌubꞌal,2 yedꞌ dꞌa yol scꞌabꞌ ebꞌ naann̈ej chucal yuuj, yujto an̈ej oval sna ebꞌ dꞌa masanil tiempo.
3 A stiꞌ ebꞌ icha val stiꞌ nocꞌ chan, a tas syal ebꞌ icha val svenenoal stiꞌ junoc nocꞌ chan smilan anima.
4 Mamin Jehová, cꞌubꞌej in el dꞌa ebꞌ scꞌulan chucal, ebꞌ malaj yelcꞌoch a cꞌaybꞌubꞌal dꞌay, ebꞌ naann̈ej yuuj tas tzꞌaj in yacꞌan telvoc.
5 A juntzan̈ ebꞌ anima syicꞌchaan̈ sbꞌa chiꞌ, ix yaqꞌuem yaal ebꞌ dꞌa yol in bꞌe.
6 Mamin Jehová, a dꞌayach ix valaꞌ: In Diosal ach, abꞌ tas svalaꞌ ayic tzin avaji svalan in bꞌa dꞌayach.
7 Mamin Dios, ach Vajalil, in Columal to syaln̈ej uuj, a ach ton tzin a col dꞌa scal oval, xin chi.
8-9 Mamin Jehová, man̈ acꞌ sgana ebꞌ scꞌulan chucal, man̈ acꞌ sgana spensar ebꞌ yic max yicꞌchaan̈ sbꞌa ebꞌ. A ebꞌ tzoymajoch dꞌayin, sna tastac ebꞌ, palta aocabꞌ tas sna ebꞌ chiꞌ scot dꞌa yibꞌan̈.
10 Emocabꞌ tzacꞌacꞌ chac xilinac dꞌa yibꞌan̈ ebꞌ, bꞌatocabꞌ ebꞌ dꞌa scal cꞌacꞌ. Yumjocabꞌbꞌat ebꞌ dꞌa yol xabꞌ olan, bꞌaj maxtzac yal-laj sqꞌueta ebꞌ.
11 Mocxobꞌ cajnajecꞌ ebꞌ alum chucal lolonel dꞌa sat luum tic. Javocabꞌ yaelal dꞌa yibꞌan̈ ebꞌ malaj yelcꞌoch a cꞌaybꞌubꞌal dꞌay, satocabꞌel ebꞌ.
12 Vojtac a in tic to a ach tza bꞌo yaj yoval ebꞌ mebꞌaꞌ, tza colanel ebꞌ dꞌa yol scꞌabꞌ ebꞌ tzꞌicꞌancanecꞌ junoc tas dꞌa ebꞌ.
13 A ebꞌ anima vachꞌ spensar, ol yal vachꞌ lolonel ebꞌ dꞌayach. A ebꞌ anima tojol sbꞌeybꞌal, ol ajn̈ejecꞌ ebꞌ dꞌa ichan̈.