Masanil tas yojtac Dios
Sbꞌit jun tic vin̈aj David sbꞌitej vin̈ cuchbꞌum dꞌa bꞌit.
139
Mamin Jehová, ojtac in sicꞌlabꞌil, ix in a bꞌeycꞌolej sicꞌlabꞌil.2 Ojtac ayic tzin em cꞌojan yedꞌ pax yic tzin qꞌue vaan. Ayocto tzojtacanel tas tzin naꞌa.
3 Ojtacxo bꞌajtil tzin eqꞌui yedꞌ bꞌajtil svicꞌ vip. Ojtac pax masanil tas tzin cꞌulej.
4 Ayic mantzac in na tas ol valaꞌ a achxo pax Mamin, ojtacxo.
5 Ayachn̈ejecꞌ dꞌa in patic vichan̈, bꞌachanbꞌat a cꞌabꞌ dꞌa vibꞌan̈.
6 Satubꞌtac yoch a jelanil tic, man̈ jabꞌoc snachajel vuuj, te nivan yelcꞌochi, ste sat in cꞌool yuuj.
7 ¿Bꞌajto val ol in bꞌat elelal dꞌa Espíritu? ¿Bꞌajto val ol in bꞌat elelal dꞌa ichan̈?
8 Tato tzin qꞌuecꞌoch dꞌa satchaan̈, ataꞌ ayach eqꞌui. Tato tzin em dꞌa yol luum, ay ach pax ecꞌta.
9 Tato tzin bꞌat dꞌa yichan̈bꞌat bꞌaj sjavi cꞌu, ma tzin bꞌat cajan dꞌa scꞌaxepal aꞌ mar bꞌaj tzꞌem cꞌu,
10 palta scꞌoch pax a cꞌabꞌ dꞌayin taꞌ. Tzin a quetzchaan̈ yedꞌ a vachꞌ cꞌabꞌ, tzin icꞌan bꞌeyoc.
11 Tato tzin na in cꞌubꞌejel in bꞌa dꞌa scal qꞌuicꞌalqꞌuinal, mato a saquilqꞌuinal oyanoch dꞌa in patic tzꞌoch qꞌuicꞌalqꞌuinalil,
12 a dꞌacꞌvalil chiꞌ max yal-laj in scꞌubꞌanel dꞌa ichan̈. A qꞌuicꞌalqꞌuinal, lajan yedꞌ saquilqꞌuinal dꞌa ichan̈. Malaj sqꞌuexan̈il dꞌacꞌvalil dꞌa ichan̈, yujto saquilqꞌuinaln̈ej masanil dꞌayach.
13 A ach ton ix a bꞌo masanil tas dꞌa in nivanil tic. A ach ix in a bꞌo dꞌa yol scꞌool in nun.
14 Sval vachꞌ lolonel dꞌayach, yujto satubꞌtac tas tza bꞌoꞌo. Sat in cꞌol in naani, palta vojtac sicꞌlabꞌil to icha chiꞌ yaji.
15 Ayic ix qꞌuibꞌ in nivanil tic dꞌa yol scꞌol in nun, vachꞌchom man̈ chequeloc, palta man̈ cꞌubꞌeltacoc yaj dꞌa yol a sat.
16 A ach ix il in nivanil tic ayic manto in aljilaj. Masanil sbꞌisul scꞌual in qꞌuinal, tzꞌibꞌabꞌil dꞌa yol a libro ayic mantalaj junoc cꞌual svilaꞌ.
17 Ach in Diosal, max nachajel-laj vuuj tas yaj a pensar dꞌayin. Man̈xo bꞌischajbꞌenoc a pensar chiꞌ.
18 Tato tzin och ijan in bꞌisani, ecꞌto sbꞌisul dꞌa yichan̈ qꞌuen arena. Ayic tzꞌel in vayan̈, ayinn̈ej ecꞌ dꞌa ichan̈.
19 Ach in Diosal, iqꞌuel sqꞌuinal ebꞌ scꞌulan chucal. Najat tzicꞌcanel ebꞌ macꞌumcham anima dꞌa in tzꞌey.
20 Yujto chuc tas syal ebꞌ, tzach yalubꞌtan̈ej ebꞌ dꞌa chucal.
21 Mamin Jehová, tzin chac ebꞌ tzach chacani, max in nibꞌejlaj ebꞌ ayoch ajcꞌolal dꞌayach.
22 Juneln̈ej malaj in gana svil ebꞌ, aypaxoch ebꞌ ajcꞌolal dꞌayin valani.
23 Ach in Diosal, bꞌeytzitej tas vaji, il pax in pensar.
24 Ilaꞌ tato van in bꞌat dꞌa chucal bꞌeybꞌal, tzin a cuchbꞌanbꞌat dꞌa sbꞌeal qꞌuinal to ayn̈ej dꞌa masanil tiempo.