A svachꞌcꞌolal Dios ayn̈ejeqꞌui
136
Calec vachꞌ lolonel dꞌa Jehová yujto te vachꞌ spensar, yujto ayn̈ej svachꞌcꞌolal dꞌa masanil tiempo.2 Aljocabꞌ vachꞌ lolonel dꞌa Dios, aton sDiosal masanil juntzan̈ dios, yujto ayn̈ej svachꞌcꞌolal dꞌa masanil tiempo.
3 Aljocabꞌ vachꞌ lolonel dꞌa Dios Yajal ebꞌ yajal, yujto ayn̈ej svachꞌcꞌolal dꞌa masanil tiempo.
4 An̈ej sbꞌoan tas te satubꞌtac, yujto ayn̈ej svachꞌcꞌolal dꞌa masanil tiempo.
5 Aꞌ bꞌoannac satchaan̈ yedꞌ sjelanil, yujto ayn̈ej svachꞌcꞌolal dꞌa masanil tiempo.
6 Aꞌ bꞌoannacqꞌue lum luum dꞌa yibꞌan̈ aꞌ mar te jul yich, yujto ayn̈ej svachꞌcꞌolal dꞌa masanil tiempo.
7 Aꞌ bꞌoannac cꞌu yedꞌ qꞌuen uj, yujto ayn̈ej svachꞌcꞌolal dꞌa masanil tiempo.
8 Aꞌ bꞌoannac cꞌu yic ay saquilqꞌuinal dꞌa cꞌualil, yujto ayn̈ej svachꞌcꞌolal dꞌa masanil tiempo.
9 Aꞌ bꞌoannac qꞌuen uj yedꞌ qꞌuen cꞌanal yic ay saquilqꞌuinal dꞌacꞌvalil, yujto ayn̈ej svachꞌcꞌolal dꞌa masanil tiempo.
10 Aꞌ milannaccham ebꞌ bꞌabꞌel unin dꞌa junjun pat dꞌa Egipto, yujto ayn̈ej svachꞌcꞌolal dꞌa masanil tiempo.
11 Aꞌ icꞌannaquelta ebꞌ israel co mam quicham dꞌa Egipto chiꞌ, yujto ayn̈ej svachꞌcꞌolal dꞌa masanil tiempo.
12 Yedꞌ val spoder yicꞌnaquelta ebꞌ, yujto ayn̈ej svachꞌcꞌolal dꞌa masanil tiempo.
13 Aꞌ pojannac em snan̈al aꞌ Chacchac Mar, yujto ayn̈ej svachꞌcꞌolal dꞌa masanil tiempo.
14 Aꞌ icꞌannac ecꞌta ebꞌ israel dꞌa snan̈al aꞌ mar chiꞌ, yujto ayn̈ej svachꞌcꞌolal dꞌa masanil tiempo.
15 Palta axo vin̈ sreyal Egipto yedꞌ ebꞌ soldado, bꞌatnaccan ebꞌ yuuj dꞌa yol aꞌ mar chiꞌ, yujto ayn̈ej svachꞌcꞌolal dꞌa masanil tiempo.
16 Aꞌ icꞌannac bꞌey ebꞌ schon̈abꞌ dꞌa tzꞌinan luum, yujto ayn̈ej svachꞌcꞌolal dꞌa masanil tiempo.
17 Aꞌ milannaccham ebꞌ nivac rey, yujto ayn̈ej svachꞌcꞌolal dꞌa masanil tiempo.
18 Aꞌ icꞌannaquel sqꞌuinal ebꞌ rey te bꞌinajnac, yujto ayn̈ej svachꞌcꞌolal dꞌa masanil tiempo.
19 Aton vin̈aj Sehón sreyal ebꞌ amorreo, icꞌjinaquel sqꞌuinal vin̈ yuuj, yujto ayn̈ej svachꞌcꞌolal dꞌa masanil tiempo.
20 Yedꞌ pax vin̈aj Og sreyal Basán, icꞌjinaquel sqꞌuinal vin̈ yuuj, yujto ayn̈ej svachꞌcꞌolal dꞌa masanil tiempo.
21 Aꞌ icꞌannac ecꞌ lum sluum ebꞌ rey chiꞌ, yujto ayn̈ej svachꞌcꞌolal dꞌa masanil tiempo.
22 Yacꞌnaccan luum quicoc a on̈ israel schecabꞌ on̈ tic, yujto ayn̈ej svachꞌcꞌolal dꞌa masanil tiempo.
23 Aꞌ on̈ naancoti ayic ayon̈ecꞌ dꞌa scal yaelal, yujto ayn̈ej svachꞌcꞌolal dꞌa masanil tiempo.
24 Ix on̈ scolcanel dꞌa yol scꞌabꞌ ebꞌ ayoch ajcꞌolal dꞌayon̈, yujto ayn̈ej svachꞌcꞌolal dꞌa masanil tiempo.
25 Aꞌ tzꞌacꞌan tas sva ebꞌ anima yedꞌ nocꞌ nocꞌ, yujto ayn̈ej svachꞌcꞌolal dꞌa masanil tiempo.
26 Calec vachꞌ lolonel dꞌa sDiosal satchaan̈, yujto ayn̈ej svachꞌcꞌolal dꞌa masanil tiempo.