Te satubꞌtac tas sbꞌo Jehová
135
Calec vachꞌ lolonel dꞌa Jehová.Ex schecabꞌ ex Jehová, alec vachꞌ lolonel dꞌay.
2 Mach ex ayex ecꞌ dꞌa yamaqꞌuil stemplo Jehová co Diosal,
3 alec vachꞌ lolonel dꞌay, yujto vachꞌ. Bꞌitanan̈ec dꞌay yujto te ay svachꞌcꞌolal dꞌayon̈ anima on̈ tic.
4 Ix on̈ sicꞌcanel a on̈ israel on̈ yin̈tilal on̈ vin̈aj Jacob, yic tzon̈ och yicoc.
5 A in tic vojtac val sicꞌlabꞌil to a Jehová co Diosal, yelxo val ecꞌbꞌal yelcꞌoch dꞌa yichan̈ masanil comon dios.
6 Syaln̈ej scꞌulan masanil tas snibꞌej scꞌulej, vachꞌchom dꞌa satchaan̈, ma dꞌa sat luum tic, ma dꞌa aꞌ mar, ma pax dꞌa yich aꞌ.
7 Aꞌ tzꞌacꞌancot asun bꞌaj slajvicꞌoch lum luum tic. Aꞌ tzꞌacꞌanecꞌ copnaj lebꞌlon ayic syacꞌan n̈abꞌ. Aꞌ sjacanelta icꞌ bꞌaj molanecꞌ yuuj.
8 Aꞌ milannaccham ebꞌ bꞌabꞌel unin dꞌa junjun patil ebꞌ aj Egipto yedꞌ pax sbꞌabꞌel yuneꞌ junjun nocꞌ snocꞌ ebꞌ.
9 A dꞌa snan̈al chon̈abꞌ Egipto chiꞌ, ay juntzan̈ tas te satubꞌtac scꞌulejnac yic syacꞌan syaelal vin̈ rey yedꞌ pax ebꞌ schecabꞌ vin̈.
10 Tzijtum juntzan̈ chon̈abꞌ satnaquel yuuj, smilannaccham ebꞌ rey te nivac yopisio.
11 Smilnaccham vin̈aj Sehón, sreyal ebꞌ amorreo yedꞌ vin̈aj Og sreyal Basán yedꞌ masanil ebꞌ rey dꞌa yol yic Canaán.
12 Axo lum sluum ebꞌ rey chiꞌ yacꞌnac dꞌayon̈ a on̈ israel on̈ tic, yic squiquejcan luum.
13 Mamin Jehová, a a bꞌinajnaquil malaj bꞌaqꞌuin̈ ol sateloc. Dꞌa masanil tiempo ol ach nachajcotoc.
14 A Jehová sbꞌoan yaj oval dꞌa ebꞌ schon̈abꞌ, tzꞌocꞌ scꞌol dꞌa ebꞌ schecabꞌ.
15 A sdiosal ebꞌ chꞌoc chon̈abꞌil, nabꞌa oro, nabꞌa plata, anima sbꞌoani.
16 Ay stiꞌ sdiosal ebꞌ chiꞌ, palta max lolonlaj. Ay sat, palta max yil-laj.
17 Ay schiquin, palta max yabꞌlaj, max yicꞌlaj yicꞌ.
18 A ebꞌ sbꞌoan juntzan̈ yechel chiꞌ yedꞌ ebꞌ tzꞌacꞌanoch dꞌa scꞌool, lajan ebꞌ yedꞌoc.
19 Ex vetisraelal, calec vachꞌ lolonel dꞌa Jehová. Ex sacerdote, ex yin̈tilal vin̈aj Aarón, alec vachꞌ lolonel dꞌa Jehová.
20 Ex yin̈tilal vin̈aj Leví, alec vachꞌ lolonel dꞌa Jehová. Mach ex ay yelcꞌoch Jehová dꞌa e sat, alec vachꞌ lolonel dꞌay.
21 Aljocabꞌ vachꞌ lolonel dꞌa Jehová dꞌa Sion, aton dꞌa Jerusalén bꞌaj cajan.
Calec vachꞌ lolonel dꞌa Jehová.