A dꞌa satchaan̈ ayecꞌ co Diosal
115
Mamin Jehová, max yal-laj co cꞌol tzon̈ icꞌjichaan̈. An̈ejocabꞌ dꞌayach tzꞌalchaj vachꞌ lolonel yuj a vachꞌcꞌolal, yujto tzaqꞌuelcꞌoch tas tzalaꞌ.2 ¿Tas val yuj ol scꞌanbꞌej ebꞌ anima chꞌoc chon̈abꞌil dꞌayon̈, bꞌajtil ay jun e Diosal?
3 Ach co Diosal, a dꞌa satchaan̈ ay ach eqꞌui. Masanil tas nabꞌil uuj, tza bꞌon̈ej.
4 Axo sdiosal ebꞌ chꞌoc chon̈abꞌil chiꞌ, nabꞌa oro, nabꞌa plata, a anima sbꞌoani.
5 Ay stiꞌ sdiosal ebꞌ chiꞌ, palta max lolonlaj. Ay sat, palta max yil-laj.
6 Ay schiquin, palta max yabꞌlaj. Ay sn̈iꞌ palta max yal-laj sucꞌlan junoc tasi.
7 Ay scꞌabꞌ, palta max yal-laj syaman junoc tasi. Ay yoc, palta max bꞌeylaj, max yal-laj secan sjaj.
8 A ebꞌ sbꞌoan juntzan̈ yechel chiꞌ yedꞌ ebꞌ tzꞌacꞌanoch scꞌool dꞌay, lajan ebꞌ yedꞌoc.
9 Ex vetchon̈abꞌ Israel, aqꞌuecoch Jehová yipoc e cꞌool, aꞌ tzꞌoch quedꞌoc, aꞌ tzon̈ colani.
10 Ex sacerdote, aqꞌuecoch Jehová yipoc e cꞌool, aꞌ tzꞌoch quedꞌoc, aꞌ tzon̈ colani.
11 Mach on̈ ay yelcꞌoch Jehová dꞌayon̈, caqꞌuecoch yipoc co cꞌool, aꞌ tzꞌoch quedꞌoc, aꞌ tzon̈ colani.
12 Ix on̈ snacot Jehová, ol yacꞌ svachꞌcꞌolal dꞌa quibꞌan̈. Ol yacꞌ svachꞌcꞌolal dꞌayon̈ a on̈ israel on̈ tic. Ol yacꞌ svachꞌcꞌolal dꞌa yibꞌan̈ ebꞌ sacerdote yin̈tilal vin̈aj Aarón.
13 Mach on̈ ay yelcꞌoch Jehová dꞌayon̈, ol yacꞌ svachꞌcꞌolal dꞌayon̈, vachꞌchom nivac copisio, vachꞌchom malaj quelcꞌochi.
14 Aocabꞌ Jehová tzꞌacꞌan qꞌuibꞌ sbꞌisul ebꞌ cuninal yedꞌ ebꞌ qui co chiquin.
15 Yacꞌocabꞌ svachꞌcꞌolal Jehová ix bꞌoan satchaan̈ yedꞌ lum luum tic dꞌayon̈.
16 Aton Jehová ay yic satchaan̈, axo lum luum tic, ix yacꞌ lum dꞌayon̈ a on̈ anima on̈ tic.
17 A ebꞌ toxo ix cꞌoch bꞌaj ay ebꞌ chamnac, maxtzac yal-laj yalan vachꞌ lolonel ebꞌ dꞌa Jehová.
18 A on̈xo pitzan on̈ to tic jun, ol cal vachꞌ lolonel dꞌay ticnaic yedꞌ dꞌa masanil qꞌuinal.
Calec vachꞌ lolonel dꞌa Jehová.