Lesal dꞌa acꞌoj yuj diosal
116
Tzin xajanej Jehová, yujto ix yabꞌ in lesal ayic ix in tevi dꞌay.2 Yujto ix yabꞌ tas ix in cꞌan dꞌay, yuj chiꞌ ol val in bꞌa dꞌay yacbꞌan pitzan into.
3 Ijan val ix in yamchaj yuj chamel. Ix ja syaelal chamel dꞌayin. A ilcꞌolal yedꞌ yaelal ix javi dꞌa vibꞌan̈.
4 Ichato chiꞌ ix valan in bꞌa dꞌa Jehová. Ix in tevi dꞌay yic syacꞌan bꞌoxoc in cꞌool.
5 A Jehová, tojol toni, tzꞌocꞌ scꞌol dꞌayon̈. A co Diosal, yelxo val te nivan svachꞌcꞌolal.
6 A stan̈van ebꞌ emnaquil yeqꞌui. Ayic toxo ix el vip, a ix in colani.
7 Ayxo in juncꞌolal ticnaic svabꞌi, yujto a Jehová vachꞌ ix yutej scꞌol dꞌayin.
8 Maj in scha chamlaj, ix in scol dꞌa in cuscꞌolal, maj in schalaj telvoc.
9 Yacbꞌan pitzan into ol in cꞌanabꞌajej.
10 Ix vacꞌoch Jehová yipoc in cꞌool, dꞌa scal in nivan yaelal ix valani: Te ya ayin, xin chi.
11 Man̈xo animaoc vaj svabꞌi, yuj chiꞌ ix valaꞌ to masanil ebꞌ anima, max yal-laj cacꞌanoch tas syal ebꞌ yipoc co cꞌool.
12 ¿Tas ol vutej vacꞌan spac masanil svachꞌcꞌolal Jehová ix yacꞌ dꞌayin?
13 Ol vicꞌcot vino ofrendail dꞌay yuj vacꞌan yuj diosal dꞌay, yujto ix in scoloꞌ.
14 A dꞌa yichan̈ masanil schon̈abꞌ ol vaqꞌuelcꞌoch tas ix val dꞌay.
15 Te nivan yelcꞌoch dꞌa yichan̈ Jehová ayic scham junoc mach yicxo.
16 Mamin Jehová, a in ton tic, a checabꞌ in. A ach ix in a coleli, yuj chiꞌ libre in ticnaic.
17 Ol vacꞌ in silabꞌ yuj acꞌoj yuj diosal dꞌayach yuj spacoc a vachꞌcꞌolal. Ol val in bꞌa dꞌayach.
18 Mamin Jehová, ol vaqꞌuelcꞌoch in tiꞌ dꞌayach dꞌa yichan̈ masanil ebꞌ a chon̈abꞌ,
19 dꞌa yamaqꞌuil a templo dꞌa snan̈al chon̈abꞌ Jerusalén.
Scal vachꞌ lolonel dꞌayach Jehová.