Syacꞌ svachꞌcꞌolal Dios dꞌa ebꞌ vachꞌ sbꞌeybꞌal
112
Aljocabꞌ vachꞌ lolonel dꞌa Jehová.Te vachꞌ yic junoc mach ay xivcꞌolal dꞌa Jehová, dꞌa smasanil scꞌol scꞌanabꞌajej schecnabꞌil.
2 A yin̈tilal jun anima vachꞌ chiꞌ, vachꞌ yic ebꞌ yuj Dios, tzꞌacꞌji yopisio ebꞌ dꞌa sat luum tic.
3 Man̈ jantacoc sbꞌeyumal dꞌa yol spat, axo stojolal, ayn̈ejecꞌ dꞌa masanil tiempo.
4 Icha val saquilqꞌuinal dꞌa scal qꞌuicꞌalqꞌuinal, icha chiꞌ yaj Dios dꞌa ebꞌ anima vachꞌ spensar, yujto ay yoqꞌuelcꞌolal ebꞌ, ay svachꞌcꞌolal ebꞌ, tojol pax sbꞌeybꞌal ebꞌ.
5 A junoc anima vachꞌ spensar, elbꞌenn̈ej tas yuuj. Masanil tas sbꞌo dꞌa smunlajel, tojoln̈ej syutej.
6 Yuj chiꞌ, malaj bꞌaqꞌuin̈ ol can dꞌa yalan̈. A anima vachꞌ chiꞌ, ol nachajn̈ejcot dꞌa masanil tiempo.
7 Malaj sxivcꞌolal dꞌa junoc abꞌix ay smay. Te tecꞌan syutej yacꞌanoch Jehová yipoc scꞌool.
8 Max xivlaj jabꞌoc, ton̈ej stzevaj dꞌa ebꞌ ayoch ajcꞌolal dꞌay.
9 Max syaejlaj tastac bꞌaj scolvaj dꞌa ebꞌ mebꞌaꞌ. A svachꞌcꞌolal chiꞌ ayn̈ej dꞌa masanil tiempo, te nivan tzꞌaj sbꞌinaj yuj svachꞌil chiꞌ.
10 A ebꞌ chuc spensar, scot yoval ebꞌ ayic syilan ebꞌ yicꞌjichaan̈ ebꞌ anima vachꞌ spensar chiꞌ. Scꞌux val ye ebꞌ scot yoval, ol lajvoccanel ebꞌ. A tas sgana ebꞌ anima chuc chiꞌ, man̈ ol elcꞌochlaj.