A Vin̈ Yajal bꞌaj sco col co bꞌa
91
A ex mach ex tzeyacꞌoch Dios Ecꞌto dꞌa Yibꞌan̈ Smasanil yipoc e cꞌool, tan̈vabꞌil ex yuuj, aton Dios Masanil syal yuuj.2 Ol eyal icha tic: Ach Jehová, a dꞌayach vachꞌ co colan co bꞌa, a ach tzach och quen̈uloc, co Diosal ach, yip co cꞌol aji, xe chama.
3 An̈ejton Dios chiꞌ ol on̈ colanel dꞌa yaal cꞌubꞌeltac yajemi yedꞌ dꞌa ilya edꞌjinac chamel.
4 Ol on̈ moyjocqꞌue yuuj, ichato ay scꞌaxil, malaj tas ol on̈ icꞌanoc. Yujto syaqꞌuelcꞌoch stiꞌ, aꞌ ol on̈ colanoc, icha tzꞌaj scolchaj junoc anima yuj smaclabꞌ jul-labꞌ.
5 Man̈ ol on̈ xivlaj dꞌa junoc tas ay smay tzꞌecꞌ dꞌacꞌvalil. Man̈ ol on̈ xivpaxlaj dꞌa jul-labꞌ sjulchaj dꞌa cꞌualil.
6 Man̈ ol on̈ xivlaj dꞌa ilya sja dꞌa scal qꞌuicꞌalqꞌuinal. Man̈ ol on̈ xivpaxlaj dꞌa tas tzꞌacꞌan lajvoquel anima dꞌa cꞌualil.
7 Mil anima ol cham dꞌa co qꞌuexan̈. Lajun̈eꞌ mil dꞌa co vachꞌ, a on̈xo jun, malaj tas ol on̈ icꞌanoc.
8 An̈ej to ol quilaꞌ tas spac ol scha ebꞌ scꞌulan chucal.
9 Yujto ix co col co bꞌa dꞌa Jehová Ecꞌto dꞌa Yibꞌan̈ Smasanil, aꞌ ix cacꞌoch yipoc co cꞌool,
10 yuj chiꞌ man̈ ol schacot chucal dꞌa quibꞌan̈, man̈ ol cꞌochlaj ilya dꞌa co pat.
11 Ol yal dꞌa ebꞌ yángel to tzon̈ stan̈vej ebꞌ yaln̈ej bꞌaj tzon̈ bꞌati.
12 Ol on̈ quetzchajqꞌue yuj ebꞌ, yic vachꞌ man̈ ol co tenoch coc dꞌa qꞌuen qꞌueen.
13 Ol yal co bꞌeyecꞌ dꞌa scal nocꞌ choj, ma dꞌa scal nocꞌ chan. Vachꞌchom te ov nocꞌ chan chiꞌ, ma te nivac nocꞌ choj chiꞌ, palta malaj tas ol on̈ icꞌanoc.
14 Yalnaccan Jehová dꞌayon̈: Ol ex in coloꞌ yujto tzin e xajanej. Ichato ol in och eyen̈uloc, yujto tzin eyal e Yajaloc.
15 Ayic ol in eyavtani, ol in tacꞌvoc dꞌayex. A in ol in cajnaj eyedꞌoc, ol ex in colanel dꞌa syaelal, ol ex vicꞌanchaan̈.
16 Nivan e qꞌuinal ol vacꞌaꞌ. Ol vacꞌ eyil in colval, xchi Dios.