Bꞌit yic vachꞌ lolonel
Bꞌit yic scꞌual icꞌoj ip.
92
Mamin Jehová, man̈ jantacoc svachꞌil cacꞌan yuj diosal dꞌayach yedꞌ co bꞌitan dꞌayach yic tzach quicꞌanchaan̈ yujto ecꞌachto dꞌa yibꞌan̈ smasanil.2 Man̈ jantacoc svachꞌil calanel jantac a vachꞌcꞌolal dꞌa junjun qꞌuin̈ibꞌalil yedꞌ calanpaxel dꞌa junjun dꞌacꞌvalil to tzꞌeln̈ejcꞌoch tas tzalaꞌ.
3 Man̈ jantacoc svachꞌil ach co bꞌitan yedꞌ masanil juntzan̈ chin̈bꞌil yedꞌ pax teꞌ arpa to vachꞌ yoch sjaj.
4 Mamin Jehová, a ach ix in acꞌoch dꞌa tzalajcꞌolal yuj tas bꞌobꞌil uuj. Tzin bꞌitan dꞌa tzalajcꞌolal yuj tas ix a cꞌulej chiꞌ.
5 Mamin Jehová, te satubꞌtac tas ix a cꞌulej. Malaj junocxo stzacꞌvan spensar dꞌayach.
6 A ebꞌ malaj spensar, max nachajel-laj juntzan̈ tic yuj ebꞌ:
7 Vachꞌchom tzꞌoch ebꞌ ixtum anima bꞌeyumal, ma sqꞌuechaan̈ ebꞌ chucal anima icha tzꞌaj sqꞌuibꞌ an̈ an̈cꞌultac, palta junn̈ej rato syacꞌ sgana ebꞌ, slajvi chiꞌ satixcanel ebꞌ dꞌa juneln̈ej.
8 A achxo Mamin Jehová, masanil tiempo te nivan elcꞌochtaxoni.
9 Yel ton Mamin, ol acꞌ satjoquel ebꞌ ayoch ajcꞌolal dꞌayach. Masanil ebꞌ scꞌulan chucal, ol acꞌ saclemcanbꞌat ebꞌ.
10 Van acꞌan vip icha yip junoc nocꞌ caltacteꞌal toro. Tzin te tzalaji yujto xajan in uuj.
11 Yovalil ol vil yacꞌji ganar ebꞌ ayoch ajcꞌolal dꞌayin. Ol vabꞌanpax scꞌacvi ebꞌ scꞌulan chucal chiꞌ.
12 A ebꞌ anima vachꞌ spensar, ol qꞌuechaan̈ ebꞌ icha xumaquil teꞌ palma. Ol qꞌuibꞌchaan̈ ebꞌ icha val teꞌ cꞌuteꞌ dꞌa Líbano,
13 yujto ayn̈ejecꞌ ebꞌ dꞌa yamaqꞌuil stemplo Jehová. Ol qꞌuechaan̈ ebꞌ yujto ayecꞌ ebꞌ dꞌa slacꞌanil co Diosal.
14 Vachꞌchom icham animaxo ebꞌ, palta lajanto val ebꞌ icha junoc te teꞌ tzato satani, tecꞌanto val yip ebꞌ.
15 Ol schꞌoxanel ebꞌ to a Jehová co Columal, tojol toni, malaj jabꞌoc chucal dꞌay.