LIBRO 4
(SALMOS 90—106)
A Dios ayecꞌ dꞌa juneln̈ej
Aton tic slesal vin̈aj Moisés schecabꞌ Dios.
90
Mamin, yictax yichbꞌanil, a ach tzon̈ a coltaxoni.2 Yictax manto a bꞌolaj juntzan̈ vitz yedꞌ yolyibꞌan̈qꞌuinal tic, masanto dꞌa slajvubꞌ, Dios ach taxoni.
3 A ach tzon̈ acꞌ meltzajxioch pococal, ayic tzalani: Ex anima, meltzajan̈ecxioch pococal, xa chi.
4 A jun mil abꞌil, icha yaj junoc cꞌual yaj dꞌa yol a sat. Icha yaj jayeoc hora dꞌacꞌvalil icha chiꞌ yaj dꞌayach.
5 Elan̈chamel tzicꞌ bꞌey co qꞌuinal. Icha val yecꞌbꞌat junoc vayich, icha val chiꞌ caj a on̈ tic.
6 Lajan on̈ icha an̈ an̈cꞌultac sqꞌueuli. Scot xumaquil an̈ dꞌa qꞌuin̈ibꞌalil, axo yic tzꞌemcan cꞌu, stacjieli, schamxicanem an̈.
7 Yel toni, a yoval a cꞌool tzon̈ acꞌan lajvoqueli. Man̈xo animaoc tzon̈ ajcan yuuj.
8 A co mul yedꞌ co chucal, vachꞌchom te cꞌubꞌeltac yaji, palta chequel yaj dꞌa ichan̈.
9 Yel ton val, a yuj yoval a cꞌol satel co qꞌuinal. Elan̈chamel tzꞌecꞌbꞌat co qꞌuinal chiꞌ, ichan̈ej sja sicꞌson co cꞌool.
10 An̈ej 70 abꞌil co qꞌuinal. Axo ebꞌ tecꞌan jun, scꞌoch ebꞌ dꞌa 80 abꞌil. Palta te yaxo yecꞌ cꞌu acꞌval yuj ebꞌ. Elan̈chamel tzꞌecꞌbꞌat co qꞌuinal, tzon̈ sateli.
11 ¿Mach val ojtannac spoder yoval a cꞌool? ¿Mach ay xivcꞌolal dꞌayach icha smojal yoval a cꞌool chiꞌ?
12 Acꞌ cojtaquejeli to tzapan co qꞌuinal, yic vachꞌ snachajel cuuj, yic tzon̈ bꞌey dꞌa jelanil.
13 Mamin Jehová, ochan̈n̈ej quedꞌoc. ¿Jantacto val tiempo ol co tan̈vej yic tzon̈ a colani? Ocꞌoc val a cꞌol dꞌayon̈ a on̈ a checabꞌ on̈ tic.
14 Acꞌ tzalajbꞌoc co cꞌool dꞌa junjun qꞌuin̈ibꞌalil yuj a vachꞌcꞌolal, yic tzon̈ bꞌitan dꞌa tzalajcꞌolal yacbꞌan pitzan on̈to.
15 Sco nibꞌej tzijtum abꞌilal co tzalajcꞌolal tzacꞌaꞌ, icha val sbꞌisul yabꞌilal co yaelal.
16 Elocabꞌ dꞌa a cꞌool to a on̈ a checabꞌ on̈ tic yedꞌ ebꞌ quin̈tilal, to squil tas satubꞌtac tza cꞌulej yedꞌ a poder.
17 Mamin ach co Diosal, ayocabꞌ a vachꞌcꞌolal dꞌa quibꞌan̈. Acꞌ najtilbꞌoc co munlajel, checlajocabꞌ dꞌa juneln̈ej. Yel ton Mamin, checlajocabꞌ co munlajel chiꞌ dꞌa juneln̈ej.