A strato Dios yedꞌ vin̈aj David
Sbꞌit jun tic vin̈aj Etam Ezrahita yic tzon̈ scꞌaybꞌej.
89
Mamin Jehová, ol valn̈ej dꞌa in bꞌit to toxonton ay a vachꞌcꞌolal. Dꞌa masanil tiempo ol valeli to yel tzaqꞌuelcꞌoch tas tzalaꞌ.2 A yabꞌixal a vachꞌcꞌolal ay dꞌa masanil tiempo ol valeli. Ol valanpaxeli to max qꞌuexmaj tas tzalaꞌ, icha yaj juntzan̈ tas ay dꞌa satchaan̈.
3 Alnac: Ay jun in trato yedꞌ vin̈aj David in checabꞌ ix in siqꞌueli, ix vacꞌcan in tiꞌ dꞌa vin̈, ix valan dꞌa vin̈ icha tic:
4 A ebꞌ in̈tilal, ol vacꞌn̈ejcanoch ebꞌ reyal a qꞌuexuloc dꞌa masanil tiempo, xin chi.
5 Mamin Jehová, masanil ebꞌ molanecꞌ dꞌa satchaan̈, ol sbꞌitej ebꞌ tas satubꞌtac tza cꞌulej. Ol yalpaxel ebꞌ to tzaqꞌuelcꞌoch tas tzalaꞌ.
6 Mamin Jehová, malaj junocxo mach dꞌa satchaan̈ syal slajbꞌan sbꞌa edꞌoc. Malaj junoc ebꞌ lajan edꞌoc.
7 Te nivan elcꞌoch dꞌa scal ebꞌ ángel. Te ay a poder dꞌa yichan̈ ebꞌ oyanoch dꞌa a patic ichan̈.
8 Mamin Jehová Yajal dꞌa Smasanil, ¿mach val junocxo lajan edꞌoc? Masanil tas syaln̈ej uuj. Tzaqꞌuelcꞌoch masanil tas tzalaꞌ.
9 Yol a cꞌabꞌ ayecꞌ aꞌ mar ayic ste ovaj aꞌ. A achxo tzacꞌoch vaan aꞌ ayic ste cꞌan̈ aꞌ.
10 A nocꞌ nocꞌ ay smay dꞌa yol aꞌ mar, ix ach qꞌue tecꞌtecꞌ dꞌa yibꞌan̈ nocꞌ, ix a tecꞌancham nocꞌ. Ix a saclemej ebꞌ ayoch ajcꞌolal dꞌayach yuj a poder.
11 A satchaan̈ yedꞌ sat lum tic, ic toni. A ach a bꞌonac yolyibꞌan̈qꞌuinal tic yedꞌ masanil tastac ay dꞌay.
12 A norte masanto scꞌoch dꞌa sur, a ach ix a bꞌoꞌo. A lum vitzal Tabor yedꞌ lum vitzal Hermón, sbꞌitan lum dꞌayach.
13 A a cꞌabꞌ te ay yip. A a vachꞌ cꞌabꞌ, masanil syal yuuj.
14 A a despacho te tecꞌan yaj yuj a vachꞌil yedꞌ a tojolal. A dꞌa masanil scheclajel a vachꞌcꞌolal, tzacꞌan elcꞌoch tas tzalaꞌ.
15 Mamin Jehová, te vachꞌ yic ebꞌ anima tzach bꞌitani. Tzalajcꞌolaln̈ej yic ebꞌ yuj a vachꞌcꞌolal.
16 A val dꞌayach syacꞌ tzalajbꞌoc scꞌol ebꞌ. Yuj a tojolal tzꞌicꞌjichaan̈ ebꞌ.
17 Dꞌa val yel, te nivan ipalil tzacꞌ dꞌayon̈. Yuj a vachꞌcꞌolal syaln̈ej cuuj.
18 Mamin Jehová, co Columal aji. Ach co Diosal a on̈ israel on̈ tic, co Reyal ach.
19 A dꞌa pecaꞌ, ix ach lolon dꞌa vayichal, ix alan dꞌa ebꞌ a checabꞌ tzach cꞌanabꞌajan icha tic: Ix in och yedꞌ jun soldado te tecꞌan, aton jun mach sicꞌbꞌilel vuj dꞌa scal in chon̈abꞌ, ix vacꞌan yopisio.
20 Ix ilchaj vin̈aj David in checabꞌ vuuj, a yedꞌ vaceite yic sicꞌval ix in chꞌoxoꞌ to reyxo yaj vin̈.
21 Man̈ ol in och vaan in colvaj dꞌa vin̈, yujto a in poder ol acꞌan yip vin̈.
22 A ebꞌ ayoch ajcꞌolal dꞌa vin̈, man̈ ol yal-laj yoch scꞌabꞌ ebꞌ dꞌa vin̈. A ebꞌ scꞌulan chucal, man̈ ol tzacꞌvanlaj ebꞌ dꞌa vin̈.
23 Ol in tecꞌcanem ebꞌ ayoch ajcꞌolal dꞌa vin̈. Ol in milancham ebꞌ schichonoch scꞌol dꞌa vin̈.
24 Ayinn̈ej ecꞌ yedꞌ vin̈ yujto xajan vin̈ vuuj. Ol vacꞌ elcꞌoch tas svalaꞌ. Vuujn̈ej ol yaln̈ej yuj vin̈.
25 Ol vacꞌ nivanbꞌoc smacbꞌen vin̈. Ol schael yich dꞌa aꞌ mar Mediterráneo masanto scꞌoch dꞌa aꞌ nivan Éufrates.
26 Ol yalan vin̈ dꞌayin: In Mam ach, in Diosal ach, a dꞌayach tzin col in bꞌa, xcham vin̈.
27 A inxo ol vacꞌ snivanil yelcꞌoch vin̈, icha junoc bꞌabꞌel unin. Yelxo val ecꞌalto snivanil ol aj yelcꞌoch vin̈ dꞌa yichan̈ masanil ebꞌ rey.
28 Ol in xajanej vin̈ dꞌa juneln̈ej. A in trato yedꞌ vin̈, man̈ ol qꞌuexmajlaj.
29 A ebꞌ yin̈tilal vin̈ ol acꞌan reyal sqꞌuexuloc, ol bꞌeyn̈ejbꞌatoc yacbꞌan ayto ecꞌ satchaan̈ tic.
30 Palta tato ol yactejcan in cꞌaybꞌubꞌal ebꞌ yin̈tilal vin̈ chiꞌ, tato man̈ ol scꞌanabꞌajej ebꞌ tas svalaꞌ,
31 tato man̈ ol sbꞌeybꞌalej in bꞌeybꞌal ebꞌ, tato man̈ ol scꞌanabꞌajej in lolonel ebꞌ svacꞌ scꞌulej,
32 ol vacꞌoch syaelal ebꞌ yedꞌ teꞌ jixcꞌabꞌteꞌ yuj spital. Ol in macꞌ ebꞌ yedꞌ nocꞌ tzꞌum yuj schucal.
33 Axo pax vin̈aj David jun, man̈ ol vactejcan in xajanan vin̈, ol vacꞌn̈ejelcꞌoch in tiꞌ ix vacꞌ dꞌa vin̈.
34 Man̈ ol ecꞌbꞌatlaj in trato yedꞌ vin̈. Ol vacꞌn̈ejelcꞌoch tas ix valcan dꞌa vin̈.
35 Dꞌa juneln̈ej ix vacꞌcan in tiꞌ dꞌa vin̈aj David chiꞌ, a in ix vacꞌ testigoal in bꞌa to man̈ ol in qꞌuexaꞌ.
36 A ebꞌ yin̈tilal vin̈ ol acꞌan reyal sqꞌuexuloc dꞌa vichan̈ dꞌa masanil tiempo icha yaj yoc cꞌu tic.
37 Tecꞌann̈ej ol ajecꞌ ebꞌ yacꞌan yajalil, icha yaj qꞌuen uj dꞌa satchaan̈, xa chi.
38 Axo ticnaic Mamin, ix a chaccanel vin̈ rey a sicꞌnaccanelta, ix a patiquejcanel vin̈. Ix cot oval dꞌa vin̈.
39 Maj aqꞌuelcꞌoch a trato dꞌa vin̈ a checabꞌ chiꞌ. Ix a yumcanel scorona vin̈ dꞌa sat luum.
40 Man jantacoc ix aj yolanil masanil smuroal schon̈abꞌ vin̈. Ix acꞌ juvoquem schon̈abꞌ vin̈.
41 A ebꞌ anima tzꞌecꞌ taꞌ, masanil tas ay dꞌa chon̈abꞌ chiꞌ, syelqꞌuejbꞌat ebꞌ. A ebꞌ ay dꞌa slacꞌanil vin̈, sbꞌuchvaj ebꞌ dꞌa vin̈.
42 A ach ix acꞌ scꞌulej ebꞌ ayoch ajcꞌolal dꞌa vin̈, syicꞌanchaan̈ scꞌabꞌ ebꞌ yuj tzalajcꞌolal.
43 Ix iqꞌuel ye qꞌuen yespada vin̈. Maj ach ochlaj yedꞌ vin̈ ayic ix och oval.
44 Ix acꞌ lajvoc sbꞌinajnaquil vin̈. Ix a yumancanem sdespacho vin̈ dꞌa sat luum.
45 Ix pet ichamax vin̈ uuj, nivan ix aj acꞌan qꞌuixvelal vin̈.
46 Mamin Jehová, ¿bꞌaqꞌuin̈ ol actej a cꞌubꞌanel a bꞌa? ¿Ichan̈ej am tic ol ajcot yoval a cꞌol icha junoc oval cꞌacꞌ?
47 Mamin, nacoti to a co qꞌuinal tzapan toni. A on̈ anima on̈ tic, tzapan ix utejcan co qꞌuinal.
48 Malaj junoc anima to malaj bꞌaqꞌuin̈ ol chamoc. Malaj mach syal scolan sbꞌa dꞌa yol scꞌabꞌ chamel.
49 Mamin, ¿bꞌajtil ay a vachꞌcꞌolal a chꞌoxnac dꞌa pecaꞌ, aton acꞌannac a tiꞌ dꞌa vin̈aj David, to ol acꞌ elcꞌoch tas ix alaꞌ?
50 Mamin, nacoti to man̈ jantacoc on̈ stzuntzan ebꞌ anima a on̈ a checabꞌ on̈ tic. Pitzꞌanoch tas tzon̈ yutej ebꞌ chiꞌ dꞌa in pixan.
51 Mamin Jehová, a ebꞌ ayoch ajcꞌolal dꞌayach tic, dꞌa junjun rato sbꞌuchvaj ebꞌ dꞌa vin̈ a checabꞌ sicꞌbꞌilel uuj.
52 Alchajocabꞌ vachꞌ lolonel dꞌa Jehová dꞌa masanil tiempo. Ujocabꞌi.