Mamin, acꞌcot a chiquin dꞌa tas tzin cꞌan tic
Sbꞌit jun tic ebꞌ yin̈tilal vin̈aj Coré, tzꞌibꞌabꞌil yuj vin̈aj Hemán Ezrahita yic tzon̈ scꞌaybꞌej. Sbꞌitej jun bꞌit tic vin̈ cuchbꞌum dꞌa bꞌit ayic ay cuscꞌolal.
88
Ach Jehová, in Diosal ach, in Columal aji. Cꞌual dꞌacꞌval in cꞌanan a colval dꞌa vibꞌan̈.2 Cha in lesal, acꞌcot a chiquin dꞌa tas tzin cꞌan tic.
3 Man̈xo jantacoc tas sja dꞌa vibꞌan̈, ichato ayinxo och dꞌa yol scꞌabꞌ chamel, svabꞌi.
4 Ichato ayinxo och sbꞌisuloc ebꞌ chamnac, man̈xalaj vip svabꞌi.
5 Ichato ix in actajcanbꞌat dꞌa scal ebꞌ chamnac svabꞌi. Icha ebꞌ chamnac dꞌa oval, to mucbꞌilxo ebꞌ ticnaic, icha val chiꞌ vaj svabꞌi. Icha ebꞌ ix bꞌatcan satcꞌolal uuj, man̈xalaj a colval dꞌa ebꞌ, icha chiꞌ vaj svabꞌi.
6 Ichato dꞌa yich jun olan bꞌaj smucchaj ebꞌ chamnac, bꞌaj te qꞌuicꞌqꞌuinal ix in acꞌcanem svabꞌi.
7 Ix smol sbꞌa yoval a cꞌol dꞌa vibꞌan̈. Bꞌelbꞌon sjavi juntzan̈ yaelal dꞌa vibꞌan̈ uuj.
8 Ix icꞌcanel ebꞌ vamigo dꞌayin, yajbꞌentac ix in utejcan dꞌa ebꞌ. Lajan in icha junoc presovum max yal-laj yeli.
9 Maxtzac yal-laj vilan yuj bꞌaj tzin te oqꞌui. Mamin Jehová, junjun cꞌu sval in bꞌa dꞌayach, tzin mojbꞌan in cꞌabꞌ dꞌayach.
10 ¿Tocval tzato a chꞌox a poder dꞌa scal ebꞌ chamnac? ¿Tocval syal vachꞌ lolonel ebꞌ chamnac chiꞌ dꞌayach?
11 A bꞌaj mucan ebꞌ chamnac chiꞌ, maxtzac bꞌinajlaj a vachꞌcꞌolal. Maxtzac alji paxi to a ach tic tzaqꞌuelcꞌoch tas tzalaꞌ.
12 ¿Tocval ay mach dꞌa scal bꞌaj ay sqꞌuicꞌalqꞌuinalil chamel ol ilancot a tojolal yedꞌ tas satubꞌtac tza cꞌulej? A dꞌa scal ebꞌ chamnac chiꞌ sbꞌatcan satcꞌolal smasanil.
13 A inxo pax Mamin Jehová, a dꞌayach sval in bꞌa. A dꞌa qꞌuin̈ibꞌalil tzin lesalvi dꞌayach.
14 Mamin Jehová, ¿tas val yuj tzin a patiquejeli? ¿Tas val yuj tza cꞌubꞌejel a bꞌa dꞌayin?
15 Yictax in quelemal masanto ticnaic, yicxo max in chami, yujto ayn̈ejoch in yaelal uuj, yuj chiꞌ maxtzac techajlaj vuuj.
16 A yoval a cꞌol tzꞌecꞌ dꞌa vibꞌan̈, vanxo vacꞌji ganar yuuj.
17 Icha val yoval aꞌ elumaꞌ yajoch oyan yoval a cꞌol dꞌayin dꞌa juneln̈ej.
18 Ix icꞌcanel ebꞌ vamigo yedꞌ ebꞌ vetanimail dꞌa in tzꞌey. A ticnaic an̈ej qꞌuicꞌalqꞌuinal oyanoch dꞌa in patic.