Aloj vachꞌ lolonel dꞌa Jerusalén
Sbꞌit jun tic ebꞌ yin̈tilal vin̈aj Coré.
87
A Jehová ix sbꞌo schon̈abꞌ dꞌa jun tzalan yicn̈ej yaji.2 Yelxo val te xajan chon̈abꞌ Sion yuj Jehová dꞌa yichan̈ juntzan̈xo co chon̈abꞌ a on̈ yin̈tilal on̈ vin̈aj Jacob.
3 Man̈ jantacoc lolonel vachꞌ tzꞌalji dꞌa schon̈abꞌ Dios.
4 Syal Jehová icha tic: Ajun ebꞌ aj Egipto yedꞌ ebꞌ aj Babilonia ayoch dꞌa scal ebꞌ chon̈abꞌ syaqꞌuem sbꞌa dꞌayin. Icha ebꞌ aljinac dꞌa Sion, icha chiꞌ ol aj ebꞌ filisteo, ebꞌ aj Tiro yedꞌ ebꞌ aj Etiopía dꞌa vichan̈, xchi.
5 Ol alchaj dꞌa chon̈abꞌ Sion icha tic: A jun anima tic yedꞌ junxo chiꞌ, a dꞌa Sion ix alji ebꞌ, xchama. A Dios Ecꞌto dꞌa yibꞌan̈ smasanil ol acꞌan stecꞌanil jun chon̈abꞌ tic.
6 Ayic ol tzꞌibꞌaj sbꞌi ebꞌ anima ay dꞌa junjun chon̈abꞌ dꞌa chꞌan̈ uum yuj Jehová, ol stzꞌibꞌejem icha tic: Dꞌa Sion ix alji jun tic.
7 A ebꞌ cajan dꞌa Sion ol bꞌitan ebꞌ, ol qꞌue chennaj ebꞌ yuj tzalajcꞌolal, ol yalan ebꞌ: A dꞌa Sion tic scot masanil svachꞌcꞌolal Dios dꞌayon̈, xcham ebꞌ.