Scꞌanchaj scolval Dios
Sbꞌit jun tic vin̈aj David.
86
Mamin Jehová, schaocabꞌ a cꞌol abꞌan tas svalaꞌ, yujto ilbꞌaj in cꞌool, te malaj pax vip svabꞌi.2 Colineli, yujto cꞌanabꞌajum in dꞌayach. Mamin, colin a in a checabꞌ in tic, yujto a ach tzach vacꞌoch yipoc in cꞌool.
3 Mamin Jehová, ocꞌocabꞌ a cꞌool dꞌayin. Masanil cꞌu sval in bꞌa dꞌayach.
4 Mamin, acꞌ tzalajbꞌoc in cꞌol a in a checabꞌ in tic, yujto a dꞌayach tzin lesalvi.
5 Mamin, te vachꞌ ach, acꞌum ach lajvoc chucal. Te nivan a vachꞌcꞌolal aycot dꞌa yibꞌan̈ ebꞌ syal sbꞌa dꞌayach.
6 Mamin Jehová, abꞌ in lesal, maclej abꞌ tas tzin cꞌan dꞌayach.
7 Ayic ayin och dꞌa syaelal sval in bꞌa dꞌayach, yujto tzach tacꞌvitaxon dꞌa in lesal.
8 Mamin Cajalil, malaj junocxo Dios icha val ach tic. Mamin, malaj junoc mach syal sbꞌoan icha tas tza bꞌo tic.
9 Mamin, a ach ix a bꞌo masanil nivac chon̈abꞌ. Ol ja ebꞌ yaqꞌuem sbꞌa dꞌayach, ol yalan vachꞌ lolonel ebꞌ dꞌayach,
10 yujto a achn̈ej val Dios ach. Nivan elcꞌochi, satubꞌtac tas tza cꞌulej.
11 Mamin Jehová, chꞌox a bꞌe dꞌayin yic vachꞌ tzin bꞌeybꞌalej tas tza nibꞌej dꞌa smasanil in cꞌool. Acꞌ stecꞌanil in pensar tic yic vachꞌ naanachn̈ej vuuj.
12 Ach Vajalil, ach in Diosal, ol valn̈ej vachꞌ lolonel dꞌayach dꞌa smasanil in cꞌool. Ol ach vicꞌn̈ejchaan̈ dꞌa masanil tiempo.
13 Yelxo val te nivan a vachꞌcꞌolal dꞌayin. Maj in a chabꞌatlaj dꞌa yedꞌtal ebꞌ chamnac.
14 Ach in Diosal, jun val bꞌulan̈ ebꞌ acꞌumtac scot dꞌayin. Malaj jabꞌoc yoqꞌuelcꞌolal ebꞌ, sgana ebꞌ in smilanchamoc. Malaj elcꞌoch dꞌa sat ebꞌ.
15 A ach xo tic ach Dios Vajalil, te ay a vachꞌcꞌolal, te ay oqꞌuelcꞌolal. Man̈ cꞌunoc scot yoval a cꞌool, tzaqꞌuelcꞌoch tas tzalaꞌ.
16 Ocꞌoc val a cꞌol dꞌayin, ilincoti. Acꞌ val vip, tzin a colanel a in a checabꞌ in tic.
17 Acꞌ a vachꞌcꞌolal dꞌayin dꞌa sjichanil, yic a ol yilan ebꞌ ayoch ajcꞌolal dꞌayin, ol qꞌuixvoc ebꞌ, yujto a ach Jehová ach tzach colvaj vedꞌoc, tzacꞌan snivanil in cꞌool.