Colon̈el junelxo
Sbꞌit jun tic ebꞌ yin̈tilal vin̈aj Coré. Scꞌan jun bꞌit tic vin̈ cuchbꞌum dꞌa bꞌit.
85
Mamin Jehová, yelxo val te vachꞌ ach dꞌayon̈ a on̈ a chon̈abꞌ on̈ tic. Ix on̈ icꞌxi meltzaj bꞌaj sacleminac cajcanbꞌat a on̈ yin̈til on̈ vin̈aj Jacob tic.2 Ix a sucsat co chucal a on̈ a chon̈abꞌ on̈ tic. Ix acꞌ lajvoc masanil co mul.
3 Ix a yamoch vaan yoval a cꞌool yedꞌ a cꞌacꞌalcꞌolal.
4 Ach co Diosal, co Columal, ochan̈ quedꞌoc junelxo, yechelocxobꞌ ste cot yoval a cꞌol dꞌayon̈.
5 ¿Tom an̈ejaꞌ ol cotn̈ej oval dꞌayon̈ dꞌa masanil tiempo?
6 ¿Tom man̈xo ol acꞌxi co tecꞌanil yic vachꞌ tzon̈ tzalaj edꞌoc a on̈ a chon̈abꞌ on̈ tic?
7 Ach Jehová, chꞌoxcan a vachꞌcꞌolal dꞌayon̈, tzon̈ a colanpaxeli.
8 Ol vabꞌ tas ol yal Jehová Dios dꞌayon̈. Ol yacꞌ juncꞌolal dꞌayon̈ schon̈abꞌ on̈ tic, tato mantzac co cꞌulej man̈ pensaril.
9 Yeltoni, bꞌecan scꞌol Dios scolvaj dꞌa ebꞌ ay tzꞌoch emnaquil dꞌay, yic vachꞌ scheclaj stziquiquial dꞌa co cal.
10 Ol yacꞌ svachꞌcꞌolal Dios dꞌa ebꞌ schon̈abꞌ, axo ebꞌ ol cꞌanabꞌajan dꞌay. A ebꞌ anima tojol sbꞌeybꞌal, ol acꞌjoc sjuncꞌolal ebꞌ yuj Dios.
11 Cꞌanabꞌajum ol aj ebꞌ anima dꞌa sat lum tic. Axo Dios, ato dꞌa satchaan̈ ol yacꞌcot scolval.
12 Ol yacꞌcot svachꞌcꞌolal Jehová, ol yacꞌan sat jantac tas scavej dꞌa sat co lum tic.
13 A tojolal ol bꞌabꞌlaj cot yuj Jehová, aꞌ ol tojolbꞌitan bꞌe bꞌaj ol javoc.