A scajnubꞌ Dios snibꞌej in cꞌool
Sbꞌit jun tic ebꞌ yin̈tilal vin̈aj Coré. Sbꞌitej jun bꞌit tic vin̈ cuchbꞌum dꞌa bꞌit yedꞌ sjajil jun bꞌit sbꞌitaji ayic stecꞌjiel yal sat teꞌ uva.
84
Mamin Jehová Yajal dꞌa Smasanil, yelxo val te nibꞌabꞌil a cajnubꞌ.2 Man̈ jantacoc snibꞌej in cꞌol tzin aj dꞌa yamaqꞌuil a cajnubꞌ chiꞌ. Ach Dios pitzan, tzin bꞌitan dꞌayach dꞌa tzalajcꞌolal dꞌa smasanil in cꞌool.
3 A nocꞌ tzꞌunun yedꞌ nocꞌ san̈capech, tzꞌilchaj bꞌaj tzꞌaj nocꞌ, sbꞌoan soꞌ nocꞌ bꞌaj tzꞌaj yuneꞌ dꞌa slacꞌanil altar, ach Jehová Yajal dꞌa Smasanil, in Reyal ach, in Diosal ach.
4 Vachꞌ yic ebꞌ cajanecꞌ dꞌa a cajnubꞌ. Max yactejlaj ebꞌ sbꞌitan dꞌayach.
5 Te vachꞌ yic ebꞌ tzach acꞌanoch yipoc scꞌool, aton ebꞌ snibꞌej spet javi scꞌual qꞌuin̈, yic sbꞌat ebꞌ dꞌa a cajnubꞌ dꞌa tzalan Sion.
6 Ayic tzꞌecꞌ ebꞌ dꞌa lum chꞌolan bꞌaj sqꞌuibꞌ teꞌ bálsamo, icha sjaj aꞌ cotac melem tzꞌajcan jun chꞌolan chiꞌ. Axo bꞌabꞌel n̈abꞌ tzꞌacꞌan yaxbꞌoc lum chꞌolan chiꞌ.*
7 Tzꞌochn̈ej stecꞌanil ebꞌ sicꞌlabꞌil, axo dꞌa Sion tzach yil ebꞌ ach in Diosal Axon̈ej Ochi.
8 Mamin Jehová Yajal dꞌa Smasanil, ach sDiosal vin̈aj Jacob, abꞌ co lesal tic.
9 Ach Dios, ilcot vin̈ co reyal tzon̈ tan̈vani, aton vin̈ a sicꞌnaquelta. Acꞌ a vachꞌcꞌolal dꞌa yibꞌan̈ vin̈.
10 Yelxo val te vachꞌ tzin aj junoc cꞌual dꞌa slacꞌanil a cajnubꞌ, dꞌa yichan̈ pax mil cꞌual najat ay in eli. In gana to tzin aj in tan̈vej spuertail a cajnubꞌ chiꞌ dꞌa yichan̈ to tzin aj dꞌa spat ebꞌ scꞌulan chucal.
11 Ach Jehová co Diosal, a ach tzacꞌ saquilqꞌuinal dꞌayon̈, tzon̈ a tan̈vani. Tzacꞌ a vachꞌcꞌolal dꞌa yibꞌan̈ ebꞌ sbꞌeybꞌalan tojolal, tzicꞌanchaan̈ ebꞌ. Tzacꞌn̈ej masanil tastac vachꞌ dꞌa ebꞌ yujto ay elcꞌoch dꞌa sat ebꞌ.
12 Mamin Jehová, Yajal ach dꞌa Smasanil, te vachꞌ yic ebꞌ tzach acꞌanoch yipoc scꞌool.