Lesal yic scꞌanchaj syaelal ebꞌ ajcꞌool
Sbꞌit jun tic vin̈aj Asaf.
83
Ach in Diosal, mocabꞌ ton̈ejoc tzach matzꞌani. Colvajan̈ dꞌayon̈.2 Ilcot ebꞌ ayoch ajcꞌolal dꞌayach, sqꞌue val somnaj ebꞌ ach spaticaneli, schichon scꞌol ebꞌ dꞌayach.
3 Cꞌubꞌeltac sna ebꞌ to ol scꞌulej chucal ebꞌ dꞌa co patic, a on̈ a chon̈abꞌ on̈ tan̈vabꞌil on̈ tic uuj.
4 Sna ebꞌ to ol ja ebꞌ on̈ sateli yic vachꞌ man̈xo nacionoc ol on̈ ajcanoc. Sgana ebꞌ to maxtzac on̈ nachajcot a on̈ israel on̈ tic.
5 Ix smol naan ebꞌ yacꞌan chucal dꞌayach, junxon̈ej ix aj spensar ebꞌ.
6 Ix smolbꞌej sbꞌa ebꞌ aj Edom, ebꞌ yin̈tilal Ismael, ebꞌ aj Agar, ebꞌ aj Moab,
7 ebꞌ aj Gebal, ebꞌ aj Amón, ebꞌ aj Amalec, ebꞌ filisteo yedꞌ ebꞌ cajan dꞌa Tiro.
8 Yamanpax ix aj ebꞌ aj Asiria yedꞌ ebꞌ yic scolvaj ebꞌ dꞌa ebꞌ yin̈tilalcan vin̈aj Lot chiꞌ.
9 Icha utejnac ebꞌ aj Madián, icha chiꞌ tzutej ebꞌ. Icha utejnac vin̈aj Sísara yedꞌ vin̈aj Jabín dꞌa stiꞌ aꞌ Cisón, aton
10 ebꞌ chamnac dꞌa Endor, icha chiꞌ tzutej ebꞌ. A ebꞌ chiꞌ ochnaccan snivanil ebꞌ yabonoaloc an̈ an̈cꞌultac.
11 Icha utejnac vin̈aj Oreb yedꞌ vin̈aj Zeeb, icha chiꞌ tzutej masanil ebꞌ nivac vinac dꞌa scal ebꞌ. Icha utejnac vin̈aj Zeba yedꞌ vin̈aj Zalmuna, icha chiꞌ tzutej ebꞌ yajalil ebꞌ,
12 yujto sgana ebꞌ syiquejcan lum a macbꞌen.
13 Ach in Diosal, icha cꞌalem tzꞌicꞌjibꞌat yuj chacxuxum icꞌ, ma icha teꞌ taquin̈ xil teꞌ scuchjibꞌat yuj icꞌ, icha chiꞌ tzutejcan ebꞌ.
14 Icha tzꞌaj sbꞌat cꞌacꞌ dꞌa caltac vayumtac, masanil yaxluum stzꞌabꞌat yuuj,
15 ichocabꞌtaꞌ tzutej a satanel ebꞌ yedꞌ yoval a cꞌool. Xibꞌtejcanbꞌat ebꞌ, pech bꞌeyecꞌ ebꞌ icha yicꞌjibꞌat tastac yuj oval icꞌ.
16 Mamin Jehová, acꞌ qꞌuixvelal ebꞌ yic vachꞌ syojtaquejel ebꞌ to a achn̈ej Dios ach.
17 Qꞌuixvocabꞌcanqꞌue scꞌool ebꞌ dꞌa masanil tiempo. Chamocabꞌ ebꞌ yuj qꞌuixvelal,
18 yic vachꞌ masanil ebꞌ anima dꞌa yolyibꞌan̈qꞌuinal tic tzꞌojtacaneli to a ach Jehová ach, a achn̈ej ecꞌachto dꞌa yibꞌan̈ smasanil.