A Dios Sat yaj dꞌa ebꞌ Juez
Sbꞌit jun tic vin̈aj Asaf.
82
Cꞌojanecꞌ Dios bꞌaj molanecꞌ ebꞌ dios.* Van schꞌolbꞌitaj ebꞌ dios chiꞌ yuuj.2 Syalan icha tic dꞌa ebꞌ: ¿Bꞌaqꞌuin̈ ol eyactejcan e chꞌolbꞌitan dꞌa esal, yedꞌ eyacꞌanoch e bꞌa yedꞌ ebꞌ scꞌulan chucal?
3 Colvajan̈ec dꞌa ebꞌ mantalaj yip yedꞌ dꞌa ebꞌ man̈xalaj smam. Tojol tzeyutej e bꞌoan yaj yoval ebꞌ ilcꞌolal yaji yedꞌ ebꞌ ayoch dꞌa stzapan majanil.
4 Colequel ebꞌ mantalaj yip yedꞌ ebꞌ mebꞌaꞌ dꞌa yol scꞌabꞌ ebꞌ scꞌulan chucal.
5 Palta a ex tic, man̈ eyojtacoc. Max nachajel-laj eyuuj. Ichato dꞌa scal qꞌuicꞌalqꞌuinal tzex bꞌeyi. Yuj e chucal chiꞌ, van yixtaxel anima dꞌa sat luum tic.
6 Ix valaꞌ to dios ex a ex tic. E masanil vuninal ex, a in eqꞌuinto dꞌa yibꞌan̈ smasanil.
7 Palta a ex tic ol ex chamoc, icha tzꞌaj scham masanil ebꞌ anima. Ol ex satel icha juntzan̈xo ebꞌ yajal, xchi Dios.
8 Ach co Diosal, cotan̈, yamoch a chꞌolbꞌitan yaj ebꞌ cajanecꞌ dꞌa sat luum tic. A ach ay ic masanil nación dꞌa yolyibꞌan̈qꞌuinal tic.