A svachꞌcꞌolal Dios yedꞌ spital ebꞌ israel
Sbꞌit jun tic vin̈aj Asaf. Sbꞌitej jun bꞌit tic vin̈ cuchbꞌum dꞌa bꞌit yedꞌ sjajil jun bꞌit sbꞌitaji ayic stecꞌjiel yal sat teꞌ uva.
81
Con̈ bꞌitanec dꞌa tzalajcꞌolal dꞌa Dios tzꞌacꞌan quip. Con̈ avajec dꞌa tzalajcꞌolal sco bꞌitan co Diosal a on̈ yin̈tilal on̈ vin̈aj Jacob tic.2 Con̈ bꞌitanec yedꞌ pandereta yedꞌ teꞌ arpa vachꞌ scꞌan̈i yedꞌ pax salterio.
3 Co puec qꞌuen trompeta ayic tzꞌalji qꞌuen uj. Co puec pax qꞌueen ayic scꞌojnaj qꞌuen uj chiꞌ, yujto nivan qꞌuin̈ jun chiꞌ dꞌayon̈.
4 Aton jun checnabꞌil ix yacꞌ Dios dꞌayon̈ a on̈ israel on̈ tic, a on̈ yin̈tilal on̈ vin̈aj Jacob.
5 Ix alchaj dꞌayon̈ yin̈tilal on̈ vin̈aj José tic, ayic ix bꞌat Dios oval dꞌa Egipto.
Ataꞌ ix cabꞌ jun lolonel, palta man̈ cojtacoc mach ix lolon chiꞌ.
6 Ix yalan dꞌayon̈: Toxo ix vicꞌcanel eyicatz dꞌa yich e patic. Toxo ix vicꞌcanel jun munlajel te ya dꞌa eyibꞌan̈.
7 Ix in eyavtejcoti ayic ayex och dꞌa syaelal, a inxo ix ex in coloꞌ. Ix ex in tacꞌvej dꞌa scal asun ayic scꞌan̈ cꞌu. Ix ex vacꞌ proval dꞌa aꞌ yic Meriba.
8 Ex in chon̈abꞌ, abꞌec tas svalaꞌ, a in van in lolon dꞌayex. Ex israel, octom tzin e cꞌanabꞌajej.
9 Malajocabꞌ sdiosal ebꞌ chꞌoc chon̈abꞌil ayecꞌ dꞌayex. Man̈ eyaqꞌuem e bꞌa dꞌa juntzan̈ comon dios chiꞌ.
10 A in Jehová e Diosal in, a in ix ex viqꞌuelta dꞌa yol yic Egipto. Jaquec e tiꞌ, ol ex in vatzitej.
11 Palta maj yal e cꞌol ix in e cꞌanabꞌajej a ex in chon̈abꞌ Israel ex tic.
12 Yuj chiꞌ ix ex vactejcan yuj e pital, ix eyacꞌan e gana icha snibꞌej e cꞌool.
13 Ex in chon̈abꞌ Israel, octom ix eyabꞌ tas ix valaꞌ. Octom ix e bꞌeybꞌalej in checnabꞌil.
14 Ix am vacꞌoch yaelal dꞌa yibꞌan̈ ebꞌ ayoch ajcꞌolal dꞌayex. Junn̈ej am mutzꞌsatil ix aj in satanel ebꞌ.
15 A ebꞌ tzin yajaneli, toxon̈ej am n̈ojoji yecꞌ ebꞌ yuj xivelal dꞌayin. Axo syaelal ebꞌ, scan dꞌa yibꞌan̈ ebꞌ dꞌa juneln̈ej.
16 Palta a exxo tic, ix am ex in vatzitej. A am val ixim trigo te vachꞌ ix vacꞌ dꞌayex. Ix am vacꞌ nocꞌ yalchabꞌ tzꞌelta dꞌa sattac qꞌuen qꞌueen eyuqꞌuej yic tzex tzalaji, xchi Jehová.