Scꞌanji scolval Dios
Sbꞌit jun tic vin̈aj Asaf. Sbꞌitej jun bꞌit tic vin̈ cuchbꞌum dꞌa bꞌit yedꞌ sjajil jun bꞌit scuchan An̈ Xumaac.
80
Maclej abꞌ ach quilumal a on̈ israel on̈ tic. Tan̈vej on̈ a on̈ yin̈tilal on̈ can vin̈aj José. Ach cꞌojan ach em dꞌa scal ebꞌ querubín,2 acꞌ checlaj a tziquiquial dꞌayon̈, a on̈ ton yin̈tilal on̈ can vin̈aj Efraín, vin̈aj Benjamín yedꞌ vin̈aj Manasés. Acꞌlabꞌej a poder yic tzon̈ a colaneli.
3 Ach co Diosal, bꞌoxi caj icha dꞌa yalan̈taxo. Acꞌcot a vachꞌcꞌolal dꞌayon̈, tzon̈ a colancaneli.
4 Mamin Jehová, Yajal ach dꞌa Smasanil, ¿Tom an̈ejaꞌ man̈ ol abꞌ slesal ebꞌ a chon̈abꞌ yuj yoval a cꞌool?
5 A co cuscꞌolal ix acꞌ co vaeloc. A yal co sat ix acꞌ cuqꞌuemoc.
6 Ix on̈ acꞌanoch sbꞌuchlabꞌejoc ebꞌ cajcꞌool ay dꞌa co lacꞌanil. Ste qꞌuechaan̈ ebꞌ on̈ stzetzani.
7 Ach Dios Yajal dꞌa Smasanil, bꞌoxi caj icha dꞌa yalan̈taxo. Acꞌcot a vachꞌcꞌolal dꞌayon̈, tzon̈ a colancaneli.
8 A dꞌa Egipto icꞌnaquelta jun scꞌabꞌ teꞌ uva, icꞌannaquel juntzan̈ chꞌoc nacional dꞌa sat lum tic, axo teꞌ uva chiꞌ avejnaccanem dꞌa sat lum tic.
9 Ix aqꞌuenan teꞌ. Ix bꞌat schꞌan̈al yibꞌ teꞌ. Ix qꞌuibꞌ teꞌ. Ix majel sat luum tic yuj teꞌ.
10 Ix qꞌuecꞌoch yen̈ul teꞌ dꞌa jolomtac vitz. Ix muschajpax teꞌ nivac cꞌuteꞌ chaan̈ steel yuj teꞌ.
11 Ix cꞌoch teꞌ sn̈iꞌ dꞌa stitac aꞌ mar, ix cꞌochpax teꞌ svol dꞌa aꞌ nivan Éufrates.
12 ¿Tas yuj ix eccan lan̈chaj qꞌuen smacteꞌal teꞌ latzꞌbꞌilqꞌuei, yuj chiꞌ tzꞌicꞌjiel sat teꞌ yuj ebꞌ tzꞌecꞌ taꞌ?
13 Van slajviel teꞌ yuj nocꞌ cꞌultaquil chitam. Van scꞌuxanbꞌat teꞌ nocꞌ cꞌultaquil nocꞌ.
14 Ach co Diosal, Yajal ach dꞌa Smasanil, meltzajan̈xicot qꞌuelan dꞌayon̈ co cꞌanaꞌ. Ilcot masanto dꞌa satchaan̈ chiꞌ, tza naan cot teꞌ uva tic,
15 aton teꞌ a ach val lacꞌan avejnac, a teꞌ svol a ach val ix acꞌ yaxbꞌoc, a on̈ ton a chon̈abꞌ on̈ tic.
16 A yedꞌ yoval a cꞌool, acꞌcham ebꞌ ix on̈ ixtani, ebꞌ ix n̈usantzꞌa co chon̈abꞌ.
17 Palta ochan̈ quedꞌoc a on̈ sicꞌbꞌil on̈ el tic uuj, a on̈ ton a chon̈abꞌ on̈ ix acꞌ co tecꞌanil yic tzon̈ och icoc.
18 Malaj bꞌaqꞌuin̈ ol quicꞌcanel co bꞌa dꞌayach. Acꞌ co qꞌuinal, an̈ej dꞌayach ol cal co bꞌa.
19 Ach Jehová Dios, Yajal ach dꞌa Smasanil, bꞌoxi caj junelxo icha dꞌa yalan̈taxo. Acꞌcot a vachꞌcꞌolal dꞌayon̈, tzon̈ a colancaneli.