Cuscꞌolal yuj Jerusalén
Sbꞌit jun tic vin̈aj Asaf.
79
Ach co Diosal, ix och ebꞌ chꞌoc chon̈abꞌil dꞌa lum a macbꞌen. Ix yixtanbꞌat a templo ebꞌ. Ix smaqꞌuem lan̈naj Jerusalén ebꞌ.2 A ebꞌ a checabꞌ cꞌanabꞌajum dꞌayach, ix miljicham ebꞌ yuj ebꞌ. A nocꞌ ostoc yedꞌ nocꞌ chium nocꞌ ix chianbꞌat snivanil ebꞌ a checabꞌ chiꞌ.
3 Icha a aꞌ ix aj stobꞌcan schiqꞌuil ebꞌ a checabꞌ chiꞌ dꞌa masanil Jerusalén. Malaj mach ix mucan snivanil ebꞌ.
4 Tzon̈ bꞌuchji yuj ebꞌ anima cajan dꞌa co lacꞌanil. Tzebꞌajtac quilji dꞌa ebꞌ.
5 Mamin Jehová, ¿jantacto val tiempo ol acꞌcot oval dꞌayon̈? ¿An̈ej ama yajcot a cꞌacꞌalcꞌolal dꞌayon̈ icha sqꞌue n̈iln̈on yoc teꞌ cꞌacꞌ?
6 Acꞌcot yoval a cꞌol dꞌa ebꞌ chꞌoc chon̈abꞌil man̈ ach ojtannacoc, aton ebꞌ max yaqꞌuem sbꞌa dꞌayach.
7 Yujto a ebꞌ ix on̈ satanel a on̈ yin̈tilal on̈ vin̈aj Jacob tic, ix yixtanbꞌat co chon̈abꞌ ebꞌ.
8 Man̈ acꞌ co tupel smul ebꞌ co mam quicham. Acꞌcot a vachꞌcꞌolal dꞌa quibꞌan̈ dꞌa elan̈chamel, yujto man̈xo animaoc caj scabꞌi.
9 Ach Dios, co Columal ach. Ochan̈ quedꞌoc, colvajan̈ quedꞌoc. Sucsat co mul yic max bꞌuchji a bꞌi yuj ebꞌ anima.
10 Tato maay, ol yal ebꞌ chꞌoc chon̈abꞌil chiꞌ icha tic: ¿Tocval ay yelcꞌoch jun sDiosal ebꞌ chi? xcham ebꞌ. Acꞌ quil a pactzitan dꞌa ebꞌ yuj ebꞌ a checabꞌ ix smilcham ebꞌ. Yabꞌocabꞌ jun chiꞌ ebꞌ chꞌoc chon̈abꞌil.
11 A ebꞌ ayoch preso, van yalan sbꞌa ebꞌ dꞌayach, cotan̈ qꞌuelan dꞌa ebꞌ. A ebꞌ yicxo chamel yaji, colel ebꞌ yedꞌ a poder.
12 Mamin Jehová, aqꞌuecꞌ uqueloc a pac dꞌa juntzan̈ nación ay dꞌa co lacꞌanil, yujto bꞌuchumtac ebꞌ dꞌayach.
13 A on̈xo a chon̈abꞌ on̈ tic, icha a calnel caji. Ol cacꞌn̈ej yuj diosal dꞌayach. Ol co bꞌitej vachꞌ lolonel dꞌayach dꞌa masanil tiempo.