Ay scolval Dios dꞌa schon̈abꞌ
Sbꞌit jun tic vin̈aj Asaf yic tzon̈ scꞌaybꞌej.
78
Ex vetchon̈abꞌ, abꞌec in cꞌaybꞌubꞌal, aqꞌuecoch e chiquin dꞌa tas svalaꞌ.2 Ol val juntzan̈ lolonel nivan yelcꞌoch dꞌayex. A juntzan̈ tas cꞌubꞌeltac yajcan dꞌa pecaꞌ, a ol valaꞌ, aton juntzan̈ manta bꞌaj tzꞌalchajeli.
3 Ol val juntzan̈ tas cabꞌnac, aton tas cojtac, a ebꞌ co mam quicham alannac cabꞌi.
4 Yovalil ol cal dꞌa ebꞌ cuninal. A juntzan̈ tas satubꞌtac sbꞌonac Jehová yedꞌ spoder, ol cal dꞌa ebꞌ toto ol aljoc.
5 A Dios ix bꞌoancan jun bꞌeybꞌal dꞌayon̈ a on̈ yin̈til on̈ vin̈aj Jacob tic. Ix yacꞌancan jun cꞌaybꞌubꞌal dꞌayon̈ israel on̈ tic. Yalannaccan dꞌa ebꞌ co mam quicham to scꞌaybꞌej yuninal ebꞌ, a on̈ ton tic. A on̈xo pax tic ol co cꞌaybꞌej ebꞌ cuninal
6 yic vachꞌ ay yabꞌix ebꞌ anima dꞌa bꞌaqꞌuin̈, ebꞌ mantzac alji. Axo ebꞌ chiꞌ ol alan pax dꞌa ebꞌ yuninal.
7 Yic vachꞌ a Dios syacꞌoch ebꞌ yipoc scꞌool. Yic a tas sbꞌonac Dios max bꞌatcan satcꞌolal yuj ebꞌ. Yic scꞌanabꞌajej pax schecnabꞌil Dios chiꞌ ebꞌ.
8 Yic vachꞌ man̈ ol yutej sbꞌa ebꞌ icha yutejnac sbꞌa ebꞌ co mam quicham, man̈ schanacoc yabꞌ scꞌaybꞌubꞌal Dios ebꞌ, spitejnac sbꞌa ebꞌ. Man̈ tecꞌanoc yutejnac spensar ebꞌ, man̈ scꞌanabꞌajejnacoc Dios ebꞌ.
9 A ebꞌ soldado yic Efraín, ay syamcꞌabꞌ ebꞌ yic oval. Palta ayic ix och oval chiꞌ, ix bꞌat ebꞌ elelal.
10 Malaj yelcꞌoch strato Dios dꞌa ebꞌ. Max yal-laj scꞌol ebꞌ scꞌanabꞌajej scꞌaybꞌubꞌal Dios chiꞌ.
11 A tas ix sbꞌo Dios, aton juntzan̈ sat co cꞌool quilani, ix bꞌatcan satcꞌolal yuj ebꞌ.
12 A Dios ix bꞌoan tas satubꞌtac dꞌa yichan̈ ebꞌ co mam quicham dꞌa Zoán dꞌa yol yic Egipto.
13 Ix spoj sbꞌa aꞌ mar yuuj, ix schecanecꞌ ebꞌ dꞌa snan̈al aꞌ chiꞌ. Ix syamoch vaan jun aꞌ mar chiꞌ, icha muro ix ajcan aꞌ yuuj.
14 Dꞌa cꞌualil ix icꞌji bꞌey ebꞌ yuuj dꞌa yalan̈ jun asun. Axo dꞌacꞌvalil, ix icꞌji bꞌey ebꞌ yedꞌ saquilqꞌuinal jun cꞌacꞌ.
15 Ix jat qꞌuen nivac qꞌueen yuuj dꞌa taquin̈ luum, man̈ jantacoc a aꞌ ix elta, ix yucꞌan aꞌ ebꞌ.
16 A dꞌa yol qꞌuen nivan qꞌueen ix elul aꞌ nivac aꞌ yuuj.
17 Vachꞌchom ix yil jun chiꞌ ebꞌ, palta an̈ejaꞌ ix och smul ebꞌ dꞌa Dios dꞌa tzꞌinan luum chiꞌ. Ix chichon scꞌol ebꞌ dꞌa Dios Ecꞌto dꞌa yibꞌan̈ smasanil.
18 Ix yacꞌ proval Dios ebꞌ, ix scꞌanan svael ebꞌ icha val dꞌa sgana.
19 Ix yalan specal Dios ebꞌ icha tic: ¿Maxto ol yal-laj yacꞌji co vael yuj Dios dꞌa tzꞌinan luum tic?
20 Yel toni, ix jat qꞌuen nivac qꞌueen yuuj. A dꞌa yol qꞌueen ix elul aꞌ nivac aꞌ, ix chꞌayxi lum luum yuj aꞌ, ¿ol am yal pax yacꞌan co vael ticnaic? ¿Ol am yal yacꞌan chibꞌej dꞌayon̈ a on̈ schon̈abꞌ on̈ tic? xchi ebꞌ.
21 Ix cot yoval Jehová ayic ix yabꞌan jun slolonel ebꞌ chiꞌ. Icha val teꞌ cꞌacꞌ ix aj scot yoval, ix ja copnaj dꞌa ebꞌ yin̈tilal vin̈aj Jacob,
22 yujto maj yacꞌoch scꞌool ebꞌ dꞌay. Maj yacꞌpaxoch scolval Dios chiꞌ ebꞌ yipoc scꞌool.
23 Vachꞌchom icha chiꞌ ix yutej sbꞌa ebꞌ, palta ix acꞌchajemta asun yuj Dios, ix sjacan spuertail satchaan̈.
24 Ix emul maná dꞌa yibꞌan̈ ebꞌ schon̈abꞌ icha sja yax n̈abꞌ. Satchaan̈il trigo ix sva ebꞌ.
25 A svael ebꞌ ángel ix sva ebꞌ. Cham ix va ebꞌ yuj Dios.
26 A icꞌ ix cot dꞌa stojolal bꞌaj sjavi cꞌu yedꞌ dꞌa sur, ix cot xumumoc dꞌa satchaan̈, yuj spoder Dios ix javi.
27 A icꞌ chiꞌ ix icꞌancot nocꞌ chibꞌej dꞌa yibꞌan̈ schon̈abꞌ Dios chiꞌ. Man̈xo jantacoc nocꞌ much ix emuli, icha lum pococ, ma icha yarenail stiꞌ aꞌ mar ix aj sjavi nocꞌ.
28 A bꞌaj ayecꞌ chon̈abꞌ chiꞌ, ataꞌ ix ja bꞌulan nocꞌ yedꞌ dꞌa spatic yichan̈ smantiado ebꞌ.
29 Yuj specꞌal ebꞌ, a Dios ix acꞌan tas ix snibꞌej ebꞌ chiꞌ. Ix yacꞌ val sgana ebꞌ schiꞌan nocꞌ.
30 Palta ayic manto tzactzajlaj ebꞌ schiꞌan nocꞌ, ayic aytooch nocꞌ chibꞌej chiꞌ dꞌa yol stiꞌ ebꞌ,
31 ix cot yoval scꞌol Dios dꞌa yibꞌan̈ ebꞌ. Axo ix acꞌan cham ebꞌ vinac ay yip, aton ebꞌ vinac chꞌoc yel dꞌa scal ebꞌ quetisraelal chiꞌ.
32 Palta man̈oc yuj chiꞌ ix sbꞌo sbꞌeybꞌal ebꞌ. An̈ejaꞌ yoch smul ebꞌ. Maj yacꞌlaj pensar ebꞌ yuj tas satubꞌtac ix scꞌulej Dios chiꞌ, maj yacꞌochlaj ebꞌ dꞌa scꞌool.
33 Yuj chiꞌ ix satjiel ebꞌ yuj Dios chiꞌ dꞌa scal nivac xivcꞌolal. Junn̈ej mutzꞌsatil, ma icha quicꞌan quicꞌ, icha chiꞌ ix aj satel ebꞌ.
34 Ayic ix cham jayvan̈ ebꞌ chiꞌ yuj Dios, ix sna sbꞌa scꞌol juntzan̈xo ebꞌ, ix cꞌoch ebꞌ dꞌa yichan̈ Dios, ix lesalvi ebꞌ dꞌay dꞌa smasanil scꞌool.
35 Ichato chiꞌ ix najicot Dios Ecꞌto dꞌa yibꞌan̈ Smasanil yuj ebꞌ, yujto aꞌ stan̈van ebꞌ, aꞌ scolan pax ebꞌ.
36 An̈ej yedꞌ stiꞌ ebꞌ stzꞌac yal vachꞌ lolonel dꞌa Dios chiꞌ.
37 Malaj bꞌaj vachꞌ ix yutej sbꞌa ebꞌ dꞌay. Maj scꞌanabꞌajej pax strato ebꞌ yedꞌoc.
38 Palta ix te ocꞌ scꞌol dꞌa ebꞌ, yuj chiꞌ ix succhaj sat schucal ebꞌ yuuj. Maj acꞌjoc cham ebꞌ. Tzijtum el ix och vaan yoval, majxo yaqꞌuelcꞌochlaj yoval chiꞌ dꞌa ebꞌ.
39 Ix snacoti to animan̈ej ebꞌ. Lajan ebꞌ icha icꞌ ton̈ej tzꞌecꞌbꞌati, maxtzac meltzajlaj.
40 Tzijtum el ix spitej sbꞌa ebꞌ dꞌay, ix yabꞌ syail dꞌa tzꞌinan luum yuj ebꞌ.
41 Palta an̈ejaꞌ yacꞌji proval yuj ebꞌ. Ix tzuntzajcot yoval scꞌol co Diosal Axon̈ejoch chiꞌ yuj ebꞌ.
42 Max snacotlaj jun cꞌual ebꞌ ayic ix coljiel ebꞌ yuj spoder dꞌa yol scꞌabꞌ ebꞌ ajcꞌool.
43 Maj snapaxcot juntzan̈ milagro yilnac ebꞌ dꞌa Zoán dꞌa yol yic Egipto.
44 Ix yacꞌoch a nivac aꞌ chicꞌal dꞌa Egipto, axo ebꞌ aj Egipto chiꞌ, majxo yal-laj yucꞌan aꞌ ebꞌ.
45 Ix yacꞌanpaxcot nocꞌ us dꞌa scal ebꞌ aj Egipto chiꞌ, icha val asun yecꞌ nocꞌ, ix te ixtaj ebꞌ yuj nocꞌ. Ix yacꞌanpaxcot nocꞌ tzijtumal pajtzaꞌ dꞌa scal ebꞌ, yic tzꞌixtaxel schon̈abꞌ ebꞌ yuj nocꞌ.
46 Masanil sat tastac avabꞌil yuj ebꞌ ix yacꞌoch dꞌa yol scꞌabꞌ nocꞌ cꞌulubꞌ. Ix lajviel sat yavbꞌen ebꞌ yuj nocꞌ.
47 A qꞌuen sacbꞌat yedꞌ qꞌuen cheev ix lajanel teꞌ higo yedꞌ teꞌ uva avabꞌil yuj ebꞌ.
48 Ix cham nocꞌ svacax ebꞌ yedꞌ nocꞌ scalnel ebꞌ yuj qꞌuen sacbꞌat, yuj pax bꞌaj ix macꞌvaj cꞌu.
49 Ix yacꞌcot yaelal Dios dꞌa yibꞌan̈ ebꞌ, yuj yoval scꞌol man̈xa yalbꞌanil. Man̈ jantacoc ebꞌ ángel ix scheccoti yic tzul satjiel ebꞌ aj Egipto chiꞌ.
50 Juneln̈ej ix te cot yoval, majxo ocꞌlaj jabꞌoc scꞌol dꞌa ebꞌ. Ix acꞌjibꞌat ebꞌ dꞌa yol scꞌabꞌ chamel yuuj.
51 Masanil ebꞌ vinac bꞌabꞌel tzꞌalji dꞌa snun dꞌa yol yic Egipto chiꞌ ix smilchamoc. Dꞌa junjun patil ebꞌ aj Egipto chiꞌ, jun mach ix chami.
52 Ix icꞌji bꞌey ebꞌ co mam quicham chiꞌ yuj Dios dꞌa tzꞌinan luum, icha yicꞌji bꞌey nocꞌ calnel, icha chiꞌ ix utaj ebꞌ.
53 Vachꞌ ix aj yicꞌji bꞌey ebꞌ yuuj, yic vachꞌ max xiv ebꞌ. Axo ebꞌ ayoch ajcꞌolal dꞌa ebꞌ, ix bꞌatcan ebꞌ dꞌa yol aꞌ mar.
54 Ix icꞌjicot ebꞌ yuj Dios dꞌa jun luum sicꞌbꞌilel tic yuuj, dꞌa juntzan̈ vitz ix yicꞌcanecꞌ tic dꞌa scal oval.
55 Ix yicꞌanel juntzan̈ nación dꞌa yichan̈ ebꞌ. Ix spojancanecꞌ lum luum chiꞌ. Macquiltac ix yutej dꞌa junjun yin̈tilal. Ix cajnaj ebꞌ dꞌa schon̈abꞌ ebꞌ ajcꞌool chiꞌ.
56 Palta axo ebꞌ co mam chiꞌ, ix acꞌji proval Dios Ecꞌto dꞌa yibꞌan̈ smasanil yuj ebꞌ. Ix tzuntzajcot yoval scꞌol yuj ebꞌ. Maj scꞌanabꞌajej ebꞌ tas ix yal Dios chiꞌ.
57 Icha yutejnac sbꞌa ebꞌ co mam quicham, icha chiꞌ ix yutej sbꞌa ebꞌ dꞌa yichan̈ Dios. Maj scꞌanabꞌajejlaj ebꞌ dꞌay. Ix el ebꞌ dꞌa yol sbꞌe icha junoc jul-labꞌ coxo.
58 Ix stzuntzejcot yoval Dios chiꞌ ebꞌ, yujto bꞌat lesalvoc ebꞌ dꞌa jolomtac vitz, bꞌat yacꞌanem sbꞌa ebꞌ dꞌa juntzan̈ yechel comon dios.
59 Ix cot yoval Dios chiꞌ ayic ix yilan jun chiꞌ, ix paticajcanel ebꞌ yuuj.
60 Ix yactancan scajnubꞌ dꞌa Silo, aton jun spat yaj dꞌa co cal.
61 Ton̈ej ix yilaꞌ ix icꞌjibꞌat scaxail strato yuj ebꞌ ajcꞌool, aton schꞌoxnabꞌil stziquiquial yedꞌ spoder.
62 Ix te cot val yoval Dios chiꞌ dꞌa ebꞌ, yuj chiꞌ ix actajcan ebꞌ dꞌa yol scꞌabꞌ ebꞌ ajcꞌol chiꞌ yic smiljicham ebꞌ.
63 A ebꞌ quelemtac, ix cham ebꞌ dꞌa scal oval, ichato ix tzꞌabꞌat ebꞌ. Man̈xalaj bꞌit yic nupnajel ix och dꞌa ebꞌ ix cobꞌestac.
64 A ebꞌ vin̈ sacerdote, ix miljicham ebꞌ vin̈ dꞌa qꞌuen espada. Maj ocꞌlaj ebꞌ ix yetbꞌeyum ebꞌ vin̈ ix cham chiꞌ.
65 Ix lajvi chiꞌ, ix qꞌue jucnaj Dios Cajal, icha tzꞌaj yel svayan̈ anima, icha junoc soldado jelan dꞌa oval tzꞌel yav yuj an̈ an̈.
66 Ix acꞌji ganar ebꞌ ajcꞌool yuuj, ix bꞌat ebꞌ elelal. Ix qꞌuixvicanel ebꞌ dꞌa masanil tiempo.
67 Ayic ix sayanxi Dios bꞌajtil ol ajxoc scajnubꞌ, ix spatiquejcanel smacbꞌen ebꞌ yin̈tilal José. Man̈oclaj smacbꞌen ebꞌ yin̈tilal Efraín ix siqꞌuelta.
68 Palta a dꞌa smacbꞌen ebꞌ yin̈tilal Judá ix sicꞌjielta yuuj, aton tzalan Sion to xajan yuuj.
69 Ix sbꞌoqꞌue scajnubꞌ Dios yic scan dꞌa juneln̈ej icha satchaan̈. Ix yaqꞌuem yich yic ayn̈ejecꞌ dꞌa masanil tiempo icha lum luum.
70 Ix sicꞌanel jun schecabꞌ, aton vin̈aj David, vin̈ tan̈vum calnel.
71 Ix icꞌjiel vin̈ yuj Dios chiꞌ dꞌa spatic nocꞌ nun calnel ay yuneꞌ, yic vachꞌ a vin̈ stan̈van ebꞌ israel yin̈tilal vin̈aj Jacob chiꞌ. Ix ochcan schon̈abꞌ Dios chiꞌ icha scalneloc vin̈.
72 Ix tan̈vaj schon̈abꞌ Dios yuj vin̈aj David chiꞌ. Dꞌa smasanil scꞌol vin̈ yedꞌ sjelanil ix stan̈vej.