Sco nacot tas scꞌulejnac co Mam Dios
Sbꞌit jun tic vin̈aj Asaf. Scꞌan jun bꞌit tic vin̈ cuchbꞌum dꞌa bꞌit, aton vin̈aj Jedutún.
77
Te chaan̈ sval in bꞌa dꞌa Dios, yic vachꞌ syabꞌ tas svalaꞌ.2 Ix in lesalvi dꞌa Cajal ayic ay in cuscꞌolal. Maj vactejcan in mojbꞌan in cꞌabꞌ dꞌay dꞌa junjun acꞌval, palta malaj tas syal yacꞌan snivanil in cꞌool.
3 Ayic tzin naancot Dios, tzin oqꞌui. Ayic tzin te acꞌan pensar, schabꞌaxqꞌue in cꞌool.
4 Mamin, maj in a cha vaybꞌatoc. Man̈xo animaoc vaj svabꞌi, maxtzac yal-laj in loloni.
5 Tzin nacot juntzan̈ cꞌual yedꞌ juntzan̈ abꞌil ecꞌnac dꞌa pecaꞌ.
6 Tzin nacot ticnaic atax yic tzin bꞌitan dꞌacꞌvalil. Tzin naubꞌtan̈ej, tzin cꞌanbꞌan dꞌayin:
7 ¿Tocval ayn̈ejcot yoval scꞌol Dios Cajal dꞌayon̈? ¿Tom man̈xo ol on̈ xajanej?
8 ¿Tom ix lajviel svachꞌcꞌolal? ¿Tom juneln̈ej ix lajvi bꞌaj yacꞌnaccan stiꞌ?
9 ¿Tom ix sat scꞌol Dios dꞌa svachꞌcꞌolal? ¿Yel am val te aycot yoval scꞌool, man̈xo am ol ocꞌ scꞌol dꞌayon̈?
10 Ay tas yelxo val ya svabꞌ ticnaic, svalan dꞌa yol vicoꞌ: A Dios Ecꞌto dꞌa yibꞌan̈ smasanil, mantzac colvajlaj dꞌayon̈, icha ix aj scolvaj dꞌa yalan̈taxo, xin chi.
11 Ach in Diosal, a ticnaic ol in nacot juntzan̈ tas satubꞌtac a bꞌonac dꞌa pecaꞌ.
12 Ol in nacot masanil tas a bꞌonac.
13 Ach in Diosal, te vachꞌn̈ej masanil tastac tza bꞌoꞌo. Malaj junocxo dios nivan yelcꞌoch icha ach tic ach co Diosal.
14 A ach tic, Dios ach, sbꞌoumal ach tastac satubꞌtac. Ix a chꞌoxel a poder dꞌa masanil nación.
15 A yedꞌ a poder a colnaccanel a chon̈abꞌ, aton ebꞌ yin̈tilal vin̈aj Jacob yedꞌ vin̈aj José.
16 Ach co Diosal, ayic ix ach yilan aꞌ mar, ix xivqꞌue aꞌ. Ix ibꞌxiqꞌue aꞌ masanto dꞌa sjulal yich.
17 A asun ix yaqꞌuemta sn̈abꞌil. Ix cꞌan̈ cꞌu dꞌa satchaan̈, tzijtum bꞌaj ix checlaj lebꞌlon dꞌa sat luum tic.
18 Ix ibꞌxi lum luum tic yuuj. Ix abꞌchaj scꞌan̈ cꞌu dꞌa scal chacxuxum icꞌ. A a lebꞌlon, ix yacꞌ saquilqꞌuinal dꞌa yolyibꞌan̈qꞌuinal tic.
19 A dꞌa yol aꞌ mar ix a jac a bꞌe, tzijtum a aꞌ bꞌaj ix ach cꞌaxpaji, palta malaj mach ix ilan yechel oclem.
20 Ix icꞌ bꞌey a chon̈abꞌ icha nocꞌ calnel. Ix a yamcꞌabꞌej vin̈aj Moisés yedꞌ vin̈aj Aarón yic scuchbꞌan a chon̈abꞌ ebꞌ vin̈.