A Dios syal yuuj
Ayic sbꞌitan jun bꞌit tic vin̈ cuchbꞌum yic bꞌit, a yamcꞌabꞌ ay schꞌan̈al scꞌanchaji. Sbꞌit jun tic vin̈aj Asaf.
76
Ojtacabꞌil Dios dꞌa yol yic Judá. Te nivan pax yelcꞌoch sbꞌi dꞌa yol yic Israel.2 A dꞌa tzalan Sion, ataꞌ ay scajnubꞌ. A dꞌa Jerusalén smacvaj icha nocꞌ choj.*
3 Ataꞌ ix satcanel syamcꞌabꞌ ebꞌ ajcꞌol yuuj, aton jul-labꞌ, qꞌuen espada yedꞌ maclabꞌ jul-labꞌ.
4 Ach co Diosal, te nivan a poder. Yelxo val te ecꞌbꞌal snivanil elcꞌoch dꞌa lum jolomtac vitz aytaxon dꞌa pecaꞌ.
5 A ebꞌ soldado te jelan dꞌa oval, ix icꞌchajecꞌ syamcꞌabꞌ ebꞌ. A ebꞌ te ay yip, man̈xa tas ix yal ebꞌ, ix vaybꞌat ebꞌ dꞌa juneln̈ej.
6 Ach sDioal vin̈aj Jacob, ayic ix el av yuj oval, majxo ibꞌxoclaj ebꞌ, majxo ibꞌxocpaxlaj scarruaje ebꞌ yedꞌ nocꞌ schej.
7 Te ay a may. ¿Mach val ol yal yoch lin̈an dꞌa ichan̈ ayic aycot oval?
8 Ato dꞌa satchaan̈ ix alel tas ol utej a chꞌolbꞌitan ebꞌ anima. Ix xivbꞌat ebꞌ anima chiꞌ, ix emcan numan ebꞌ
9 ayic ix ach qꞌue vaan a chꞌolbꞌitan chiꞌ yic tza colcanel ebꞌ te ilbꞌajcꞌool yaj dꞌa yolyibꞌan̈qꞌuinal tic.
10 A yoval scꞌol ebꞌ anima, ol acꞌcan meltzajoch dꞌa aloj vachꞌ lolonel dꞌayach. A jabꞌocxo yoval scꞌol ebꞌ chiꞌ, ol a cachoch vaan.
11 Caqꞌuec co tiꞌ dꞌa Jehová co Diosal, sco cꞌanabꞌajan tas scal chiꞌ dꞌay. A exxo nación ex ayex dꞌa slacꞌanil schon̈abꞌ Dios te nivan yelcꞌochi, iqꞌueccot e silabꞌ dꞌay.
12 Yujto aꞌ tzꞌicꞌanel sqꞌuinal ebꞌ yajal. Aꞌ ebꞌ rey dꞌa yolyibꞌan̈qꞌuinal tic, xivpax ebꞌ dꞌay.