A Dios sbꞌo yaj tas dꞌa stojolal
Sbꞌit jun tic vin̈aj Asaf. Sbꞌitej jun bꞌit tic vin̈ cuchbꞌum dꞌa bꞌit yedꞌ sjajil jun bꞌit scuchan Man̈ a Sateli.
75
Ach co Diosal, scacꞌ yuj diosal dꞌayach, yujto chequel to ayach ecꞌ quedꞌoc yuj tas satubꞌtac tza cꞌulej, aton chiꞌ scaleli ayic tzach cacꞌan bꞌinajoc.2 Ach Cajal, a ach tzal icha tic: Ayic ol cꞌoch stiempoal tas nabꞌil vuuj, dꞌa val stojolal ol vutej in chꞌolbꞌitan yaj ebꞌ anima.
3 Vachꞌchom tzꞌibꞌxi lum luum yedꞌ masanil tas cajan dꞌa sat, palta a in ol in yamoch vaan yipumal luum.
4 A dꞌa ebꞌ acꞌumtac yedꞌ dꞌa ebꞌ chuc syutej sbꞌa, svalaꞌ: Man̈xo eyicꞌchaan̈ e bꞌa,
5 man̈xo eyalubꞌtan̈ej to syal eyuuj eyalani. Man̈xo ex lolon dꞌa acꞌumtaquil, xin chi, xa chi ach Cajal.
6 Ex vetanimail, ayic tzꞌicꞌjichaan̈ junoc anima, man̈oc dꞌa ebꞌ anima dꞌa stojolal bꞌaj sqꞌueul cꞌu, man̈oc dꞌa ebꞌ ay dꞌa stojolal bꞌaj tzꞌem cꞌu, man̈oc pax dꞌa ebꞌ ay dꞌa tzꞌinan luum scoti.
7 Palta aton Dios schꞌolbꞌitan tas caji. Ay mach syiqꞌuemi. Ay mach syicꞌchaan̈.
8 A yoval scꞌol Jehová, lajan yedꞌ vino te paj ayem dꞌa yol junoc vaso. Ayic ol secanemta dꞌa yibꞌan̈ masanil ebꞌ scꞌulan chucal dꞌa sat luum tic, ichato ol yucꞌbꞌat ebꞌ smasanil.
9 A in pax tic, ol valn̈ejel yabꞌixal co Diosal a on̈ yin̈til on̈ Jacob tic, ol val vachꞌ lolonel dꞌa bꞌital dꞌay.
10 Aꞌ ol satanel spoder ebꞌ scꞌulan chucal, palta ol yicꞌchaan̈ yipalil ebꞌ anima vachꞌ.