Lesal yic scolchajel ebꞌ chon̈abꞌ
Sbꞌit jun tic vin̈aj Asaf yic tzon̈ scꞌaybꞌej.
74
Ach co Diosal, ¿tas val yuj ix on̈ actejcan dꞌa juneln̈ej? ¿Tas yuj ix te cot yoval a cꞌool dꞌa quibꞌan̈ a on̈ a chon̈abꞌ on̈ tic?2 Naon̈cot a on̈ on̈ a mannaquel dꞌa pecaꞌ. A on̈ on̈ a colannaqueli yic tzon̈ och a chon̈abꞌoc. Nacot tzalan Sion bꞌaj cajan achtaxon eqꞌui.
3 Cotan̈, tzul ilan tas ix aj yixtaxbꞌat a chon̈abꞌ tic dꞌa juneln̈ej yuj ebꞌ ajcꞌool. Ul il tas ix aj yixtaxbꞌat a cajnubꞌ yuj ebꞌ.
4 A ebꞌ ayoch ajcꞌolal dꞌayach, ix el yav ebꞌ yuj yoval dꞌa yol a cajnubꞌ bꞌaj scaqꞌuem co bꞌa dꞌayach. Ix yacꞌanqꞌue sbandera ebꞌ taꞌ, yic scheclaji to ix yacꞌ ganar ebꞌ.
5 Ichato cꞌatzitzvum ebꞌ dꞌa caltac teꞌ.
6 A qꞌuen schꞌacabꞌ ebꞌ yedꞌ qꞌuen smartillo ix yacꞌlabꞌej dꞌa juntzan̈ chemteꞌ ayoch dꞌa yol a cajnubꞌ chiꞌ. Ix lajviel svachꞌil yilji yuj ebꞌ.
7 Ix yacꞌoch scꞌacꞌal a cajnubꞌ chiꞌ ebꞌ. Ix ixtaxbꞌat bꞌaj tzꞌoch ejmelal dꞌayach yuj ebꞌ, ix emcan lan̈naj dꞌa sat luum.
8 Ix sna ebꞌ on̈ sataneli. Masanil bꞌaj scaqꞌuem co bꞌa dꞌayach dꞌa yol co nación tic, ix laj yacꞌoch scꞌacꞌal ebꞌ.
9 Man̈xo chequeloc junoc schꞌoxnabꞌil to a chon̈abꞌ on̈. Man̈xa junoc a checabꞌ dꞌa co cal, man̈ cojtacoc paxi jantacto tiempo ol yacꞌ jun tic.
10 Ach co Diosal, ¿jantacto tiempo ol on̈ stzuntzej ebꞌ ajcꞌool tic? ¿Bꞌaqꞌuin̈ ol yactejcan ebꞌ yalan chucal lolonel dꞌayach?
11 ¿Tas val yuj max a chꞌoxel a poder yic tza satel ebꞌ?
12 Atax dꞌa pecaꞌ co Reyal achn̈ej. Ach co Diosal, tzijtum bꞌaj ix cacꞌ ganar oval yuj a colval.
13 A ach ix a poj snan̈al aꞌ mar yuj a poder. Ix a macꞌpoj juntzan̈ sjolom nocꞌ nivac nocꞌ dꞌa yol aꞌ mar chiꞌ.
14 Ix a tecꞌan vecchaj juntzan̈ sjolom nocꞌ nivan leviatán, ix acꞌan nocꞌ schibꞌat nocꞌ chium nocꞌ dꞌa tzꞌinan luum.
15 A ach ix acꞌ qꞌueul sjaj a aꞌ sbꞌeyi. Ix acꞌan pax tup aꞌ nivac aꞌ malaj taxon bꞌaj stupi.
16 A ach ay ic cꞌualil yedꞌ dꞌacꞌvalil. A ach ix a bꞌo cꞌu yedꞌ qꞌuen uj.
17 A ach a bꞌonac bꞌaj scꞌochcan cꞌaman yolyibꞌan̈qꞌuinal. A ach a bꞌonac varesma yedꞌ n̈abꞌilqꞌuinal.
18 Mamin Jehová, nacoti, to a ebꞌ ajcꞌol sbꞌuchvaj ebꞌ dꞌayach. Te quistal ebꞌ, yuj chiꞌ tzach spatiquejel ebꞌ.
19 Mamin, man̈ on̈ acꞌ sat dꞌa a cꞌool. Man̈ on̈ acꞌ dꞌa yol scꞌabꞌ ebꞌ ajcꞌool, icha junoc syacꞌbꞌat junoc yalacꞌ cuvajteꞌ dꞌa nocꞌ chꞌacbꞌa.
20 Mocabꞌ bꞌatcan satcꞌolal a trato quedꞌoc, yujto a dꞌa masanil bꞌaj dꞌa yol co chon̈abꞌ, bꞌaj man̈xo chequeloc, ix te pimbꞌi ebꞌ vin̈ man̈xa yoqꞌuelcꞌolal yixtan ebꞌ a chon̈abꞌ.
21 Man̈ a cha ixtax ebꞌ ilbꞌajcꞌool. Bꞌitanocabꞌ ebꞌ mebꞌaꞌ yedꞌ ebꞌ ilbꞌajcꞌol chiꞌ dꞌayach.
22 Ach co Diosal, ochan̈ quedꞌoc, colon̈ a on̈ icon̈ tic. Nacoti to a ebꞌ scꞌulan chucal, max yactej ebꞌ sbꞌuchvaj dꞌayach.
23 Mocabꞌ acꞌbꞌat satcꞌolal bꞌaj ste el yav ebꞌ ayoch ajcꞌolal dꞌayach, aton ebꞌ tzꞌel val yav yuj spitan sbꞌa dꞌayach.