LIBRO 3
(SALMOS 73—89)
A svachꞌcꞌolal Dios
Sbꞌit jun tic vin̈aj Asaf.
73
Ayton val svachꞌcꞌolal Dios dꞌayon̈ a on̈ israel on̈ tic, mach on̈ tojol yaj co pensar.2 Ixocto val yacꞌ jabꞌocxo, in telvi. Jabꞌxon̈ej maj in bꞌatcan dꞌa scal chucal,
3 yujto ix viloch in cꞌol dꞌa ebꞌ acꞌumtac yedꞌ ebꞌ anima chuc ayic ix vilani to te vachꞌn̈ej yaj ebꞌ.
4 Malaj chamel sja dꞌa yibꞌan̈ ebꞌ svilaꞌ. Tecꞌan yaj ebꞌ, malaj syabꞌ syail snivanil ebꞌ.
5 Malaj yaelal sja dꞌa yibꞌan̈ ebꞌ. Malaj stzapan majanil ebꞌ sja dꞌa yibꞌan̈.
6 Yuj chiꞌ te vachꞌ syutej ebꞌ sbꞌoan sbꞌa yuj schꞌoxanel yacꞌumtaquil yedꞌ pax yixtan anima.
7 Ijan val maxtzac checlaj yol sat ebꞌ yuj sbꞌaqꞌuechal. Yelxo val te chuc spensar ebꞌ.
8 Bꞌuchumtac slolon ebꞌ, syicꞌchaan̈ sbꞌa ebꞌ. Malaj jabꞌoc sqꞌuixvelal ebꞌ yacꞌan oval, syixtan anima ebꞌ.
9 An̈ej bꞌuchval lolonel syal ebꞌ dꞌa Dios aj satchaan̈. Syalanpax chuc ebꞌ dꞌa anima dꞌa sat luum tic.
10 Yuj chiꞌ tzꞌoch tzacꞌan ebꞌ anima yuj ebꞌ, schaan yabꞌ ebꞌ anima chiꞌ jantac chucal syal ebꞌ.
11 Snaan ebꞌ icha tic: ¿Tas ol yutoc Dios Ecꞌto dꞌa yibꞌan̈ smasanil yojtacanel tas sco cꞌulej tic? ¿Tocval syil tas tzuji tic? xchi ebꞌ.
12 Ilecnabꞌ val juntzan̈ anima chuc tic, malaj tas tzꞌicꞌan ebꞌ, ste qꞌuibꞌn̈ej chaan̈ sbꞌeyumal ebꞌ.
13 Palta a inxo tic, malaj tas ix vacꞌ ganar vachꞌchom ix in yamoch vaan in pensar dꞌa chucal, vachꞌchom vachꞌ ix vutej in bꞌeybꞌal.
14 Cotac scal tzꞌacꞌji in yaelal, ichato tzin macꞌji. Junjun qꞌuin̈ibꞌalil svicꞌan tzꞌuum.
15 Mamin, qꞌuinaloc ix val icha syal ebꞌ chiꞌ, ix am vixtej ebꞌ vetchon̈abꞌ, a on̈ ton a chon̈abꞌ on̈ tic.
16 Ix snibꞌej in cꞌool to snachajel jun tic vuuj, palta ton̈ej ix somchaj in pensar yuuj.
17 Ato val yic ix in och dꞌa a cajnubꞌ, ichato chiꞌ ix nachajel vuuj tas ol cotcan dꞌa yibꞌan̈ ebꞌ chuc chiꞌ.
18 Toxo ix aqꞌuem lin̈an ebꞌ dꞌa yax n̈elecꞌtac yic stelvi ebꞌ. Tzecancanbꞌat ebꞌ bꞌaj ol ixtaxoc.
19 Elan̈chamel ol aj satel ebꞌ. Dꞌa scal xivcꞌolal ol lajvoccanel ebꞌ.
20 Ach Mamin Vajalil, icha tzꞌaj sat svayich junoc mach dꞌa scꞌool ayic tzꞌel svayan̈, icha chiꞌ ol aj a paticanel ebꞌ chuc chiꞌ ayic ol a naanqꞌue tas ol aj ebꞌ.
21 Ayic manto nachajel-laj jun tic vuuj, ix in te cusi, ix och pitzꞌan syail dꞌa in pixan.
22 A yuj in quistalil maj nachajel-laj vuuj, yuj chiꞌ lajan ix vutej in bꞌa dꞌa ichan̈ icha junoc nocꞌ nocꞌ malaj spensar.
23 Palta jun, ayinn̈ej ecꞌ edꞌoc, quetzbꞌil in uuj.
24 Tzin a cꞌaybꞌan dꞌa tas svutej in bꞌa. Axo dꞌa slajvubꞌ, ol in a cha dꞌa a vachꞌilal.
25 Malaj junocxo mach ayecꞌ dꞌa satchaan̈ bꞌaj svacꞌoch in pensar, a achn̈ej toni. Ayic snachajel vuuj to ayach ecꞌ vedꞌoc, man̈xalaj tas tzin nibꞌejoch dꞌa sat luum tic.
26 Vachꞌchom spax yip in nivanil tic, stacpax in cꞌool, palta a achxo ach Dios, Vipumal aji, an̈ej dꞌayach ay masanil tas snibꞌej in cꞌool.
27 A ebꞌ syiqꞌuel sbꞌa dꞌayach, ol cham ebꞌ. Ol a satel masanil ebꞌ syiqꞌuel sbꞌa chiꞌ.
28 Palta a in val tic Mamin Jehová Vajalil, tzin nitzoch in bꞌa dꞌa a tzꞌey yujto an̈ej jun chiꞌ nivan yelcꞌoch dꞌayin. Tzach vacꞌoch yipoc in cꞌool yic svalel jantac tas ix a cꞌulej.