Lesal yuj vin̈ rey
Bꞌit dꞌa vin̈aj Salomón.
72
Ach in Diosal, acꞌ a tojolal yedꞌ a vachꞌ pensaril dꞌa vin̈ rey tic, aton yuninal vin̈ rey sicꞌbꞌilel uuj,2 yic vachꞌ dꞌa stojolal yedꞌ dꞌa svachꞌilal syacꞌ yajalil vin̈ dꞌa a chon̈abꞌ yedꞌ dꞌa ebꞌ mebꞌaꞌ.
3 Yuj chiꞌ, ol aj juncꞌolal yedꞌ tojolal dꞌa scal ebꞌ a chon̈abꞌ cajan dꞌa jolomtac vitz yedꞌ dꞌa tzalquixtac.
4 Tojol ol yutoc vin̈ rey tic sbꞌoan yaj dꞌa ebꞌ mebꞌaꞌ. Ol coljoc ebꞌ ayoch dꞌa yalan̈ mebꞌail yuj vin̈. Axo ebꞌ ixtum anima, ol acꞌjoc syaelal ebꞌ yuj vin̈.
5 Yacꞌocabꞌem sbꞌa ebꞌ a chon̈abꞌ dꞌayach, yacbꞌan ayto ecꞌ cꞌu yedꞌ qꞌuen uj dꞌa masanil tiempo.
6 Yacꞌocabꞌ svachꞌcꞌolal vin̈ rey icha n̈abꞌ, ma icha yal acꞌval tzꞌacꞌanoch yaal lum luum yedꞌ an̈ an̈cꞌultac.
7 Ayocabꞌ vachꞌilal yedꞌ tojolal dꞌa yol stiempoal vin̈, masanto ol satel qꞌuen uj.
8 Yacꞌocabꞌ yajalil vin̈ dꞌa yibꞌan̈ masanil, schael yich dꞌa stiꞌ aꞌ mar, masanto dꞌa stiꞌ junxo aꞌ mar chiꞌ. Dꞌa stiꞌ aꞌ nivan Éufrates, masanto bꞌaj slajvicꞌoch lum luum tic.
9 A ebꞌ ayoch ajcꞌolal dꞌa vin̈, aton ebꞌ cajan dꞌa tzꞌinan luum, yacꞌocabꞌem sbꞌa ebꞌ dꞌa vin̈ dꞌa emnaquilal masanto tzꞌemcꞌoch tenan stiꞌ ebꞌ dꞌa sat luum.
10 Masanil ebꞌ vin̈ sreyal juntzan̈ chon̈abꞌ, aton Tarsis, juntzan̈ ay dꞌa stitac aꞌ mar, Sabá yedꞌ Seba, yacꞌocabꞌ silabꞌ ebꞌ yedꞌ yalcabar dꞌa vin̈.
11 Emocabꞌ cuman ebꞌ rey smasanil dꞌa vin̈. Acꞌjocabꞌ servil vin̈ yuj masanil nación.
12 Yujto a vin̈ ol colanel ebꞌ mebꞌaꞌ syal sbꞌa dꞌay, aton ebꞌ ayoch dꞌa tzapan majanil malaj mach scolani.
13 Ol ocꞌ scꞌol vin̈ yuj ebꞌ mebꞌaꞌ ilbꞌaj cꞌool. Ol coljoquel ebꞌ dꞌa yol scꞌabꞌ chamel yuj vin̈.
14 Ol coljoquel ebꞌ dꞌa yol scꞌabꞌ ebꞌ ixtum anima yedꞌ dꞌa yol scꞌabꞌ ebꞌ comonn̈ej sbꞌat dꞌa yibꞌan̈ ebꞌ yetanimail, yujto nivan yelcꞌoch sqꞌuinal ebꞌ mebꞌaꞌ chiꞌ dꞌa yichan̈ vin̈.
15 Ayn̈ejocabꞌ sqꞌuinal vin̈ rey chiꞌ. Acꞌjocabꞌ qꞌuen oro yic Sabá dꞌa vin̈. Cꞌanjocabꞌ sqꞌuinal vin̈ dꞌa Dios. Alchajn̈ejocabꞌ vachꞌ lolonel dꞌa vin̈.
16 Te vachꞌocabꞌ tzꞌaj ixim trigo dꞌa sat lum co luum tic. Yacꞌocabꞌ ixim dꞌa jolomtac vitz. Qꞌuibꞌocabꞌ ixim trigo icha tzꞌaj sqꞌuibꞌ te teꞌ dꞌa Líbano. Qꞌuibꞌocabꞌ sbꞌisul anima dꞌa co chon̈abꞌ tic icha an̈ an̈cꞌultac dꞌa sat luum.
17 Nachajocabꞌcot vin̈ rey dꞌa masanil tiempo. Ayn̈ejocabꞌ sbꞌinajnaquil vin̈ icha cꞌu. Masanilocabꞌ nación schaan vachꞌilal yuj vin̈. Yalocabꞌ ebꞌ to te vachꞌ yic vin̈.
18 Alchajocabꞌ vachꞌ lolonel dꞌa Jehová Dios, aton co Diosal a on̈ israel on̈ tic. An̈ej syal scꞌulan juntzan̈ tas sat co cꞌool quilani.
19 Alchajocabꞌ vachꞌ lolonel dꞌay dꞌa masanil tiempo. Ojtacajocabꞌel sbꞌinajnaquil dꞌa masanil yolyibꞌan̈qꞌuinal tic. Yicꞌocabꞌ icha chiꞌ.
20 Aton dꞌa tic ix lajvican slesal vin̈aj David, yuninal vin̈aj Isaí.