A slesal jun vin̈ icham vinac
71
Mamin Jehová, a dꞌayach tzin col in bꞌa, mocabꞌ in can dꞌa qꞌuixvelal uuj.2 Colin, colinel dꞌa yol scꞌabꞌ ebꞌ ajcꞌool yajoch dꞌayin, yujto tojol ach. Abꞌ val tas svalaꞌ, tzin a colani.
3 Ochan̈ ven̈uloc icha junoc n̈aqꞌueen bꞌaj syal in colan in bꞌa. Alaꞌ to tzin colchaji yujto icha in cuartel aji, icha in n̈aqꞌueen aji.
4 Ach in Diosal, colinel dꞌa ebꞌ chuc, dꞌa ebꞌ milumcham anima yedꞌ dꞌa ebꞌ ixtum anima.
5 Mamin Jehová Vajalil, toxonton yip ach in cꞌool yictax dꞌa in quelemal.
6 Yictax ix in alji dꞌa ix in nun, a dꞌayach svicꞌ vip. A ach ix in acꞌ aljoc. Ol ach in bꞌitejn̈ej.
7 Tzijtum mach sat scꞌol yilan tas tzin icꞌani, palta ach in Diosal, an̈ej dꞌayach tzin col in bꞌa.
8 Masanil tiempo, sval vachꞌ lolonel dꞌayach yuj snivanil elcꞌochi.
9 Man̈ in a patiquejeli, yujto icham vinaquinxo. Man̈ in actejcani yujto man̈xalaj vip.
10 A ebꞌ ayoch ajcꞌolal dꞌayin sgana in smilanchamoc, smol yetbꞌeyum ebꞌ, slajtian sbꞌa ebꞌ dꞌa in patic.
11 Syalan ebꞌ: Pechec, yamec. Man̈xo ayococh Dios yedꞌoc, man̈xalaj mach ol colanel ticnaic, xchi ebꞌ.
12 Ach in Diosal, man̈ najatoc tzach el dꞌa in tzꞌey. Cotan̈ dꞌa elan̈chamel, ochan̈ vedꞌoc.
13 A ebꞌ ayoch ajcꞌolal dꞌayin, chamocabꞌ ebꞌ yuj qꞌuixvelal. A ebꞌ tzꞌalan tas chuc dꞌa in patic yic tzin yixtan ebꞌ yalani, malajocabꞌ tzꞌajcan yelcꞌoch ebꞌ.
14 Palta, a inxo tic ach in Diosal, ayachn̈ej och yipoc in cꞌol dꞌa junjun rato. Ol ach in bꞌitej yedꞌ in tzalajcꞌolal.
15 Masanil tiempo ol valel yabꞌixal a tojolal yedꞌ a colval, vachꞌchom max nachaj vuuj smasanil.
16 Mamin Jehová Cajalil, a juntzan̈ tastac te satubꞌtac ix a cꞌulej, aꞌ ol in bꞌitej. Ol valel abꞌixal to a achn̈ej tojol ach.
17 Ach in Diosal, yictax in quelemal, ix in a cꞌaybꞌani. An̈ejtonaꞌ valanel juntzan̈ tastac nivac bꞌobꞌilcan uuj ticnaic.
18 Ach in Diosal, vachꞌchom icham inxo, sacxo xil in jolom, palta man̈ in actejcani yic ol yal valanel yabꞌixal a poder dꞌa ebꞌ toto ol aljoc.
19 Ach in Diosal, yelxo val te nivan a tojolal icha snajatil satchaan̈. Nivan tastac ix a cꞌulej. Malaj junoc mach icha ach tic.
20 Vachꞌchom tzijtum tas ix in icꞌani yedꞌ yaelal ix acꞌ dꞌayin, palta ol in acꞌxi pitzvoc. Ol in icꞌxiqꞌueta dꞌa sjulal lum luum.
21 Te nivan ol aj velcꞌoch uuj, ol acꞌanpax snivanil in cꞌool.
22 A inxo tic, ol ach in bꞌitej yujto tzaqꞌuelcꞌoch tas tzalaꞌ. Ol vacꞌan yuj diosal dꞌayach yedꞌ teꞌ arpa yedꞌ teꞌ chin̈bꞌil. Ach in Diosal, co Diosal ach a on̈ aj israel on̈ tic.
23 Ol ach in bꞌitej dꞌa tzalajcꞌolal, yujto ix in a coloꞌ.
24 Ol valel a tojolal dꞌa masanil qꞌuinal. A ebꞌ ix nibꞌan to ay tas ix in icꞌani, ix telvi ebꞌ, ix te qꞌuixvicanel ebꞌ.