Jun av yuj ilcꞌolal
Sbꞌit jun tic vin̈aj David. Sbꞌitej jun bꞌit tic vin̈ cuchbꞌum dꞌa bꞌit yedꞌ sjajil jun bꞌit scuchan An̈ Xumaac.
69
Ach in Diosal, colineli yujto ichato van in bꞌatcan dꞌa yich a aꞌ.2 Van in bꞌatcan dꞌa yich jun te sitzꞌatac te jul yich svabꞌi, man̈xa bꞌaj tzꞌemcꞌoch tecꞌtecꞌ voc. Ichato toxo ix in emcꞌoch dꞌa sjulal yich aꞌ, vanxo in scuchanbꞌat aꞌ.
3 Toxo ix te tzap in jaj vavaji, ix te qꞌue syail. Toxo ix qꞌue syail yol in sat yuj in maclan vil a javi ach in Diosal.
4 Ix ecꞌbꞌat sbꞌisul ebꞌ tzin chacanel dꞌa xil in jolom, vachꞌchom malaj in mul dꞌa ebꞌ. Toxo ix te qꞌuechaan̈ sbꞌisul ebꞌ sgana in smilanchamoc. Sgana ebꞌ svacꞌ meltzaj tastac to man̈ velcꞌaloc.
5 Ach in Diosal, ojtac val in pital. Max yal-laj in cꞌubꞌanel juntzan̈ in mul chiꞌ dꞌayach.
6 Mamin Jehová, Yajal ach dꞌa smasanil, a ebꞌ tzach acꞌanoch yipoc scꞌool, mocabꞌ qꞌuixvoc ebꞌ yuj in mul. Ach co Diosal a on̈ israel on̈ tic, a ebꞌ syaqꞌuem sbꞌa dꞌayach dꞌa smasanil scꞌool, mocabꞌ taccanqꞌue scꞌol ebꞌ yuj in chucal.
7 Uuj val, ix techaj yecꞌ juntzan̈ jixjon lolonel vuuj. Maxtzac yal-laj in cꞌol tzin chꞌox in sat yuj qꞌuixvelal.
8 Ichato man̈ in ojtacabꞌiloc yuj ebꞌ vucꞌtac, a na to junn̈ej in nun yedꞌ ebꞌ.
9 Te pitzꞌanoch in cꞌool in yaꞌilan a cajnubꞌ. Ayic sbꞌuchvaj ebꞌ dꞌayach, a in jun svabꞌ pax syail.
10 Ayic tzin oqꞌui, tzin och dꞌa tzecꞌojcꞌolal, sbꞌuchvaj ebꞌ dꞌayin.
11 Tato a pichul yic tzin chꞌoxanel in cuscꞌolal svacꞌochi, sqꞌue umnaj ebꞌ in stzetzani.
12 A inn̈ej tzin yal ebꞌ tzꞌem cꞌojan dꞌa spuertail chon̈abꞌ. A ebꞌ ucꞌum an̈, tzin yacꞌ bꞌinaj ebꞌ dꞌa sbꞌit.
13 A inxo pax Mamin Jehová, a dꞌayach tzin avaji. Ach in Diosal, ochan̈ vedꞌ ticnaic. Yuj a nivan vachꞌcꞌolal, tacꞌvan̈ dꞌayin. Yujto tzach colvajn̈ej vedꞌoc, yuj chiꞌ ochan̈ vedꞌoc.
14 Colinel dꞌa yol scꞌabꞌ ebꞌ tzin chacaneli. Ichato van in bꞌat dꞌa scal lum socꞌom, ma dꞌa scal a aꞌ jul yich, yuj chiꞌ man̈ in actejbꞌati.
15 Man̈ in a cha yicꞌbꞌat a aꞌ. Man̈ in a cha bꞌatcan dꞌa sjulal yich aꞌ, in sattacanemlaj taꞌ.
16 Mamin Jehová, tacꞌvan̈ dꞌayin. Vachꞌ ach a ach tic, ayn̈ej a vachꞌcꞌolal. Cotan̈ qꞌuelan dꞌayin yedꞌ a nivan oqꞌuelcꞌolal.
17 Man̈ in a patiquejel a in a checabꞌ in tic, tacꞌvan̈ dꞌayin dꞌa elan̈chamel yujto ay smay bꞌaj ay in ecꞌ tic.
18 Colineli, nitzcot a bꞌa dꞌa in tzꞌey. Colinel dꞌa ebꞌ ayoch ajcꞌolal dꞌayin.
19 Tic val ojtac ebꞌ tzꞌalan lolonel ya dꞌayin. Ix in ixtaxel yuj ebꞌ, qꞌuixavcꞌolal vaji, man̈xo in animaoc dꞌa sat ebꞌ. Ojtac val mach ebꞌ ayoch ajcꞌolal dꞌayin.
20 Ix ixtaxbꞌat in pensar yuj bꞌuchval lolonel. Man̈xo animaoc vaji, man̈xalaj vip svabꞌi. Nabꞌan̈ej ix in say mach tzꞌacꞌan snivanil in cꞌool yedꞌ mach tzꞌocꞌ scꞌool dꞌayin.
21 Ix yacꞌbꞌat veneno ebꞌ dꞌa scal in vael. Ayic ix tacji in tiꞌ, a vinagre ix yacꞌ ebꞌ vuqꞌuej.
22 Ochocabꞌ jun sqꞌuin̈ ebꞌ chiꞌ syaaliloc. Telvocabꞌ ebꞌ yuj jun sqꞌuin̈ chiꞌ.
23 Mocxobꞌ yal-laj yilan ebꞌ uuj. Luclonocabꞌ xubꞌ ebꞌ yuj man̈ ipal dꞌa masanil tiempo.
24 Acꞌcot yoval a cꞌol dꞌa yibꞌan̈ ebꞌ. Yamchajocabꞌ ebꞌ yuj a cꞌacꞌalcꞌolal.
25 Canocabꞌ tzꞌinan bꞌaj cajan ebꞌ. Man̈xaocabꞌ mach ol cajnaj dꞌay.
26 Yujto tzin spech bꞌeyecꞌ ebꞌ a in tzin acꞌ cus tic. Sbꞌuchvajpax ebꞌ dꞌayin a in tzin acꞌ echnaj tic.
27 Tzꞌacan tzutej acꞌancot yaelal dꞌa yibꞌan̈ ebꞌ icha smojal yuj chucal scꞌulej ebꞌ. Man̈xaocabꞌ yalan yic ebꞌ dꞌa colnabꞌil tzacꞌaꞌ.
28 Sucsat sbꞌi ebꞌ dꞌa yol chꞌan̈ libro yic qꞌuinal. Man̈ acꞌcanem sbꞌi ebꞌ dꞌa yol chꞌan̈ libro yic ebꞌ tojol sbꞌeybꞌal dꞌa ichan̈.
29 A inxo pax tic jun, penaay in, ayin och dꞌa cuscꞌolal. Ach in Diosal, icꞌ in qꞌue vaan, colin.
30 Ach in Diosal, ol ach in bꞌitej yedꞌ vachꞌ lolonel. Ol ach in bꞌitej dꞌa acꞌoj yuj diosal.
31 Mamin Jehová, ol ach te tzalaj yuj in bꞌit chiꞌ dꞌa yichan̈ pax to a junoc nocꞌ ecꞌum vacax svacꞌ in silabꞌoc dꞌayach.
32 Ayic ol yilan ebꞌ tzꞌixtaj yuj ebꞌ anima to ix in a coloꞌ, ol tzalajbꞌoc scꞌool ebꞌ. An̈ejtonaꞌ ol tzalajpax ebꞌ syaqꞌuem sbꞌa dꞌayach ach in Diosal.
33 Ach Jehová, tzabꞌ tas syal ebꞌ mebꞌaꞌ. Max a patiquejel-laj ebꞌ a chon̈abꞌ ayoch dꞌa preso.
34 Masanil tas pitzan dꞌa satchaan̈, dꞌa sat luum yedꞌ dꞌa yol aꞌ mar, bꞌitanocabꞌ dꞌayach.
35-36 Ach co Diosal, a ach ol a colel chon̈abꞌ Sion, ol a bꞌoanxi bꞌaj ixtaxnac juntzan̈ chon̈abꞌ dꞌa yol yic Judá. A ebꞌ yuninal ebꞌ a checabꞌ ol cajnaj dꞌa juntzan̈ chon̈abꞌ chiꞌ. Ataꞌ ol cajnaj ebꞌ, ol och ebꞌ aj chon̈abꞌil. A ebꞌ tzach xajanani, ol cajnaj ebꞌ dꞌay.