Bꞌit yujto ix yacꞌ ganar ebꞌ israel
Sbꞌit jun tic vin̈aj David.
68
Ayic syacꞌan oval Dios, sacleminac tzꞌaj yel ebꞌ ayoch ajcꞌolal dꞌay. A ebꞌ schichonoch scꞌol dꞌay, tzꞌel lemnaj ebꞌ dꞌa yichan̈.2 Icha val tzꞌaj satem teꞌ tabꞌ dꞌa scal icꞌ, icha chiꞌ tzꞌaj satem ebꞌ. Icha val yulaxbꞌat nocꞌ chaqꞌuibꞌ dꞌa scal teꞌ cꞌacꞌ, icha chiꞌ tzꞌaj satel ebꞌ scꞌulan chucal dꞌa yichan̈ Dios.
3 Axo ebꞌ vachꞌ sbꞌeybꞌal jun, ste tzalaj scꞌol ebꞌ dꞌa yichan̈ Dios. Sqꞌue val chennaj ebꞌ yuj tzalajcꞌolal.
4 Con̈ bꞌitanec dꞌa Dios yuj snivanil yelcꞌochi. Calec vachꞌ lolonel dꞌa Jehová, aton tzꞌecꞌ dꞌa yibꞌan̈ asun. Con̈ tzalajec dꞌa Jehová, con̈ tzalajec dꞌa yichan̈.
5 A Dios, cajanecꞌ dꞌa scajnubꞌ, aton bꞌaj tzꞌoch ejmelal dꞌay. Mamabꞌil yaj dꞌa ebꞌ man̈xalaj smam, Scolumal yaj pax dꞌa ebꞌ ix ix chamnacxo yetbꞌeyum.
6 A ebꞌ mebꞌaꞌ, a Dios tzꞌacꞌan bꞌaj scajnaj ebꞌ. A ebꞌ ayoch dꞌa preso, tzꞌel ebꞌ dꞌa libre yuuj, slajvi chiꞌ tzꞌicꞌjichaan̈ ebꞌ. Axo ebꞌ pit syutej sbꞌa dꞌay, a dꞌa tzꞌinan lum ol cajnaj ebꞌ.
7 Ach co Diosal, ayic ix ach bꞌey dꞌa yichan̈ a chon̈abꞌ dꞌa tzꞌinan luum,
8 ix ibꞌxiqꞌue lum luum, ix cot yaxn̈abꞌ dꞌa satchaan̈, ix ibꞌxiqꞌue tzalan Sinaí dꞌa ichan̈. A on̈ israel on̈ tic, co Diosal ach.
9 Ach co Diosal, man̈ jantacoc n̈abꞌ ix acꞌcoti yic syaxbꞌixi sat lum a macbꞌen tacjinac sat.
10 Ach co Diosal, aton taꞌ ix aj ebꞌ a chon̈abꞌ. Yuj a vachꞌcꞌolal, ix acꞌ svael ebꞌ mebꞌaꞌ.
11 Ach Cajalil, ayic alannac to toxo ix acꞌji ganar ebꞌ ajcꞌool, man̈xo jantacoc ebꞌ ix ix, ix alaneli.
12 Vanxo yel lemnaj ebꞌ vin̈ rey yedꞌ ebꞌ vin̈ soldado. A tas ix tocꞌjiecꞌ dꞌa ebꞌ ajcꞌool, ix pucchajecꞌ dꞌa ebꞌ ix ix dꞌa caltac pat,
13 aton juntzan̈ yechel nocꞌ uch ucꞌnac scꞌaxil dꞌa qꞌuen plata yedꞌ dꞌa qꞌuen oro. ¿Tas yuj ix ex can jayvan̈ ex tic dꞌa scal nocꞌ calnel yic max ex bꞌat dꞌa oval?
14 Ayic ix el lemnaj ebꞌ vin̈ rey yuj Dios Syal Yuj Smasanil, ix cot qꞌuen sacbꞌacom dꞌa yibꞌan̈ lum vitzal Salmón.
15 Yelxo val te chaan̈ steel lum vitzal Basán. Man̈ jantacoc yunetac vitz dꞌa sjolomtac luum.
16 Mach ex cajan ex dꞌa jolomtac vitz chiꞌ, ¿tas yuj yedꞌ e chichoncꞌolal tzeyilcot jun vitz sicꞌbꞌilel yuj Jehová Dios yic tzꞌoch yicoc? Ataꞌ ol cajnaj Dios chiꞌ dꞌa juneln̈ej.
17 A Dios, man̈ bꞌischajbꞌenoc scarruaje yic oval. A dꞌa Sinaí ix cot yedꞌ scarruaje chiꞌ, ix javi dꞌa scajnubꞌ.
18 Ach Dios, ix ach qꞌuecan dꞌa satchaan̈, ix icꞌanbꞌat ebꞌ ix yamchaj uuj. Ix a chaan silabꞌ dꞌa ebꞌ anima, ajun pax ebꞌ pit syutej sbꞌa dꞌayach ix yacꞌ yicoꞌ. Ach Jehová co Diosal, ix ach qꞌuecꞌoch cajan taꞌ.
19 Calec vachꞌ lolonel dꞌa Cajal co Diosal, aton co Columal. A tzon̈ tan̈van dꞌa junjun cꞌu.
20 A co Diosal, Colvajum toni. A Jehová Cajalil tzon̈ scolel dꞌa chamel.
21 A Dios ol macꞌanpoj sjolom ebꞌ ayoch ajcꞌolal dꞌay, aton sjolom ebꞌ an̈ejaꞌ scꞌulan chucal.
22 A Dios Cajal tzꞌalan dꞌayon̈: A ebꞌ ajcꞌol dꞌayex ay dꞌa jolom vitz Basán, ol vicꞌxicot ebꞌ dꞌayex. Ol vicꞌanpaxcot ebꞌ ay dꞌa sjulal yich aꞌ mar,
23 yic vachꞌ ol e bꞌon̈ eyoc dꞌa schiqꞌuil ebꞌ, ol slecꞌanpaxqꞌue nocꞌ e tzꞌiꞌ, xchi.
24 Ach Dios, co Diosal ach, masanil anima tzꞌilan a cꞌoch dꞌa a cajnubꞌ. Ach co Reyal, bꞌabꞌel ach yuj anima van sbꞌat n̈ililoc yic tzach yicꞌanchaan̈ ebꞌ.
25 Bꞌabꞌel ebꞌ sbꞌitani, axo ebꞌ acꞌum son, tzacꞌan ebꞌ. Axo dꞌa spatictac ebꞌ ayoch ebꞌ ix cobꞌestac tzꞌacꞌan cꞌan̈ pandereta.
26 Calec vachꞌ lolonel dꞌa Dios Cajal. Ex vetisraelal, calec vachꞌ lolonel dꞌay bꞌaj molanon̈ecꞌ tic.
27 Bꞌabꞌel sbꞌat ebꞌ yin̈tilal vin̈aj Benjamín, vin̈ tzacꞌan unin. Tzacꞌan ebꞌ yajal yic Judá, ebꞌ yajal yic Zabulón yedꞌ ebꞌ yic Neftalí.
28 Ach co Diosal, icha ajnac a chꞌoxanel a poder dꞌa yalan̈taxo, icha chiꞌ tzutej a chꞌoxanpaxel dꞌayon̈ ticnaic,
29 yuj svachꞌiloc a templo dꞌa Jerusalén, aton bꞌaj sjavi ebꞌ vin̈ rey yacꞌ silabꞌ dꞌayach.
30 Cachoch vaan ebꞌ anima icha nocꞌ oval nocꞌ ay dꞌa scaltac teꞌ aj. Cachoch vaan jun n̈ilan̈ oval vacax yedꞌ nocꞌ yuneꞌ, aton juntzan̈ nivac chon̈abꞌ stecꞌbꞌej sbꞌa dꞌa oval, yujto an̈ej bꞌeyumal snibꞌej ebꞌ. Pech saclem ebꞌ nivac chon̈abꞌ to sgana syacꞌ oval.
31 Ol cot ebꞌ aj Egipto stup alcabar dꞌayach. Ol smojbꞌejqꞌue scꞌabꞌ ebꞌ aj Etiopía dꞌayach ach co Diosal.
32 Ex yajal dꞌa juntzan̈ chon̈abꞌ, bꞌitanan̈ec dꞌa Dios. Bꞌitej bꞌit dꞌa Cajalil,
33 aton sbꞌeyecꞌ dꞌa satchaan̈, aton satchaan̈ aytaxon ecꞌ dꞌa yichbꞌanil. Abꞌec yel yav, aton yav te ay spoder.
34 Scham val eyalanel spoder Dios. A a ayoch co Reyaloc a on̈ israel on̈ tic. A spoder sqꞌuecꞌoch dꞌa satchaan̈.
35 Ach co Diosal, te satubꞌtac ilji dꞌa a cajnubꞌ. Tzacꞌ a poder dꞌayon̈ a on̈ israel a chon̈abꞌ on̈ tic. Alchajocabꞌ vachꞌ lolonel dꞌayach ach co Diosal.