Satubꞌtac yilji smunlajel Dios
A jun bꞌit tic scꞌan vin̈ cuchbꞌum dꞌa bꞌit.
66
E masanil ex cajan ex dꞌa yolyibꞌan̈qꞌuinal tic, bꞌitanan̈ec dꞌa Dios dꞌa tzalajcꞌolal.2 Bꞌitejec sbꞌinajnaquil. Bꞌitanan̈ec dꞌay yedꞌ juntzan̈ bꞌit man̈xo jantacoc svachꞌil.
3 Alec dꞌa Dios icha tic: Mamin a tas tza bꞌoꞌo, te satubꞌtac. A val dꞌa ichan̈ stelvican ebꞌ ayoch ajcꞌolal dꞌayach, yujto te nivan a poder.
4 Masanil ebꞌ anima dꞌa yolyibꞌan̈qꞌuinal tic syaqꞌuem sbꞌa dꞌayach, tzach sbꞌitan ebꞌ, xe chi dꞌay.
5 Cotan̈ec, ilec val tas sbꞌonac Dios. Satubꞌtac tas scꞌulej yuj co vachꞌiloc a on̈ anima on̈ tic.
6 Taquin̈ luum ajnac aꞌ mar yedꞌ aꞌ nivac aꞌ yuuj, axo taꞌ ecꞌnaccot ebꞌ co mam quicham. Tzalajocabꞌ co cꞌool dꞌa Dios.
7 A yedꞌ spoder syacꞌ yajalil dꞌa masanil tiempo. Ayn̈ejoch sat dꞌa junjun nación, yic vachꞌ max och ebꞌ syicꞌchaan̈ sbꞌa ajcꞌolal dꞌay.
8 Ex junjun nación, alec vachꞌ lolonel dꞌa co Diosal. Abꞌchajocabꞌ e bꞌitan dꞌay dꞌa vachꞌ lolonelal.
9 Yujto aꞌ tzꞌacꞌan co qꞌuinal, max on̈ schalaj telvoc.
10 Ach Dios, tic val ix il co pensar. Icha val sacbꞌitaj qꞌuen plata, icha val chiꞌ ix aj on̈ a sacbꞌitani.
11 Ix on̈ acꞌcan dꞌa teꞌ yaal. Yelxo val te al icatz ix acꞌ co cuchuꞌ.
12 A ebꞌ comon anima ix acꞌlabꞌej on̈ stecꞌani. Ix on̈ acꞌ ecꞌ dꞌa scal teꞌ cꞌacꞌ yedꞌ dꞌa yol aꞌ nivac aꞌ. Ix lajvi chiꞌ ix on̈ icꞌanbꞌat bꞌaj juncꞌolal tzon̈ aji.
13 Ol in och dꞌa yol a templo yuj vacꞌan in silabꞌ dꞌayach. Ichato val chiꞌ ol vacꞌanelcꞌoch in tiꞌ vacꞌnac dꞌayach,
14 aton tas valnac ayic ay in och dꞌa ilcꞌolal.
15 A nocꞌ nocꞌ bꞌaqꞌuech ol in n̈ustzꞌa dꞌa altar. Ol vacꞌ nocꞌ vacax, nocꞌ mam chiva yedꞌ pax nocꞌ chꞌac calnel in silabꞌoc dꞌayach, aton tic scha a cꞌool.
16 Cotan̈ec e masanil, mach ex ay yelcꞌoch Dios dꞌa e sat. Maclejec eyabꞌ dꞌayin, ol val dꞌayex jantac svachꞌcꞌolal dꞌayin.
17 Ix in cꞌan scolval vedꞌoc, ix valan vachꞌ lolonel dꞌay.
18 Qꞌuinaloc tato a chucal ix in nibꞌej in cꞌulej, maj am schalaj yabꞌ Dios Yajal dꞌa Smasanil tas ix in cꞌan dꞌay.
19 Palta ix yabꞌi tas ix in cꞌan chiꞌ dꞌay, ix scꞌanabꞌajej in lesal.
20 Alchajocabꞌ vachꞌ lolonel dꞌa Dios, yujto max spatiquejel in lesal, man̈ puraloclaj ix yacꞌ svachꞌcꞌolal dꞌayin.