Smoj val yalji vachꞌ lolonel dꞌa Dios
Sbꞌit jun tic vin̈aj David. Scꞌan jun bꞌit tic vin̈ cuchbꞌum dꞌa bꞌit.
65
Ach co Diosal, smoj val yalji vachꞌ lolonel dꞌayach dꞌa Sion. A moj val scaqꞌuelcꞌoch tas scaltej dꞌayach.2 Masanil ebꞌ anima sja dꞌayach yujto tzabꞌn̈ej slesal ebꞌ.
3 A jantac co chucal tzꞌacꞌan yajalil dꞌa quibꞌan̈, palta a achxo tza suc sat co mul chiꞌ.
4 Te vachꞌ quicoꞌ, yujto a ach ix on̈ a sicꞌcaneli yic vachꞌ ayon̈ecꞌ dꞌa a templo. Vachꞌ caj yuj svachꞌil tas ay dꞌa a cajnubꞌ, aton a templo te nivan yelcꞌochi.
5 Ach Dios co Columal, tza pactzitej co lesal yedꞌ tas satubꞌtac tza cꞌulej dꞌa stojolal. Masanil anima cajan dꞌa yolyibꞌan̈qꞌuinal tic, aton ebꞌ cajan dꞌa tic yedꞌ ebꞌ cajan dꞌa scꞌaxepal aꞌ mar, ol ach yacꞌoch ebꞌ yipoc scꞌool.
6 Te tzatz ix utejcan juntzan̈ lum nivac vitz yuj a poder yedꞌ ipalil.
7 A ach tzacꞌ numcꞌaj sat aꞌ mar. Ayic sqꞌue somnaj juntzan̈ nivac chon̈abꞌ, a ach tzacꞌ pax numcꞌajoc.
8 A ebꞌ cajan dꞌa juntzan̈ najatil luum, tzꞌibꞌxiqꞌue ebꞌ dꞌa yichan̈ tas satubꞌtac tza cꞌulej. Uuj val ay tzalajcꞌolal bꞌaj sjavi cꞌu, masanto bꞌaj tzꞌem cꞌu.
9 Ayachn̈ejoch ilan lum luum, tzacꞌ sn̈abꞌil luum, tzacꞌanpax qꞌuibꞌ tas tzꞌavchaj dꞌa luum. Tzacꞌ qꞌuibꞌ ixim trigo yuj a aꞌ tzꞌel yoc. Ichaton val chiꞌ, tzutej a bꞌoan lum luum tic.
10 A ach tzacꞌ yaxbꞌoc sat luum, tzacꞌ chꞌayxoc schꞌolquiltaquil luum, tzacꞌan cꞌunbꞌoc lum yuj yax n̈abꞌ, tzacꞌan pax a vachꞌcꞌolal yic satan tas tzꞌavchaj dꞌa sat luum.
11 Man̈ jantacoc sat avbꞌen syacꞌ dꞌa junjun abꞌil yuj n̈abꞌ tzacꞌcoti.
12 Syaxbꞌi an̈ an̈cꞌultac dꞌa tzꞌinan luum bꞌaj sva nocꞌ calnel. Axo tzalquixtac vachꞌ tzꞌaj yilji yuj avbꞌen.
13 Sbꞌudꞌjiel tzalquixtac yuj nocꞌ calnel. Axo opquixtac, sbꞌudꞌjicanel yuj ixim trigo. Yuj chiꞌ sbꞌitan ebꞌ anima smasanil, tzꞌel yav ebꞌ yuj tzalajcꞌolal.