Scꞌanchaj scolval Dios
Sbꞌit jun tic vin̈aj David. Scꞌan jun bꞌit tic vin̈ cuchbꞌum dꞌa bꞌit.
64
Ach in Diosal, tic val sval in bꞌa dꞌayach, abꞌ in lesal. Cꞌubꞌejel in qꞌuinal dꞌa ebꞌ ajcꞌol yajoch dꞌayin.2 Cꞌubꞌejinel dꞌa ebꞌ scꞌulan chucal. Colinel dꞌa ebꞌ snaan yacꞌ chucal dꞌayin dꞌa elcꞌaltac.
3 Ste cꞌasanbꞌi stiꞌ ebꞌ, icha sn̈icchajoch ye junoc qꞌuen espada. A tas syal ebꞌ dꞌayin te ya, lajan icha junoc jul-labꞌ.
4 Dꞌa cꞌubꞌeltaquil sjulvajbꞌat ebꞌ dꞌa ebꞌ malaj smul. Max xivlaj ebꞌ sjulvajbꞌati ayic man̈ naanoc.
5 Munil syiptzitej sbꞌa ebꞌ scꞌulan chucal. Snanonecꞌ scꞌol ebꞌ yacꞌanem yaal dꞌa elcꞌaltac. Malaj mach tzꞌilan ebꞌ yalani.
6 Scham val snaan ebꞌ tas syutej sbꞌoan chucal. Vachꞌxon̈ej syutej ebꞌ yacꞌan spensaril. A tas sna ebꞌ chiꞌ, cꞌubꞌeltac yaj dꞌa spensar ebꞌ.
7 A Dios ol acꞌan echnaj ebꞌ yedꞌ sjul-labꞌ. Satcꞌolal yaj ebꞌ ol satjoquel ebꞌ.
8 A tas syal ebꞌ chiꞌ ol acꞌan telvoc. Masanil ebꞌ ol ilan ebꞌ, ol ibꞌxoc ebꞌ yuj xivelal.
9 Ichato chiꞌ, masanil ebꞌ anima, ol xiv ebꞌ dꞌa Dios. Masanil tas bꞌobꞌil yuj Dios chiꞌ ol yalel ebꞌ. Masanil tastac scꞌulejnac Dios chiꞌ, ol snaubꞌtan̈ej ebꞌ.
10 A ebꞌ anima vachꞌ sbꞌeybꞌal, ol tzalaj ebꞌ yedꞌ Jehová, ol sayan pax colval ebꞌ dꞌay. Masanil ebꞌ anima vachꞌ, juncꞌolalxon̈ej ol aj ebꞌ.