Sco xajanej Dios yedꞌ smasanil co cꞌool
Sbꞌit jun tic vin̈aj David ayic ayecꞌ vin̈ dꞌa tzꞌinan luum dꞌa yol yic Judá.
63
Ach in Diosal, toxonton in Diosal ach. Tzach in nibꞌej dꞌa smasanil in cꞌool, tzach snibꞌej in pixan icha tzꞌaj snibꞌan n̈abꞌ lum luum taquin̈.2 In gana tzach viloch dꞌa a templo, ol cham val in cꞌool vilan a poder yedꞌ a tziquiquial.
3 Te nivan yelcꞌoch a vachꞌcꞌolal dꞌa yichan̈ bꞌaj pitzan in dꞌa yolyibꞌan̈qꞌuinal tic. Yuj chiꞌ, ol ach in bꞌitej.
4 Yacbꞌan pitzan in, ol val vachꞌ lolonel dꞌayach. Ol in mojbꞌejqꞌue in cꞌabꞌ dꞌayach dꞌa in lesal.
5 Vachꞌxon̈ej ol ajcan in cꞌool uuj, icha junoc mach syacꞌ val sgana yedꞌ junoc vael te vachꞌ. Yedꞌ in tzalajcꞌolal ol ach in bꞌitej.
6 A dꞌacꞌvalil ayic jichan inxo eqꞌui, tzach in naubꞌtan̈ani, ayn̈ejoch in pensar dꞌayach.
7 A ach ton tzach colvaj vedꞌoc, yuj chiꞌ malaj tas tzin naꞌ icha nocꞌ yunetac caxlan̈ dꞌa yalan̈ scꞌaxil snun.
8 Junn̈ej vaj edꞌoc sicꞌlabꞌil. Max in actejel-laj yedꞌ a vachꞌ cꞌabꞌ.
9 A ebꞌ sgana in smilanchamoc, ol bꞌatcan ebꞌ dꞌa yol sjulal bꞌaj smucchaj ebꞌ chamnac.
10 Ol miljoccham ebꞌ dꞌa qꞌuen espada, axo nocꞌ oques ol chianbꞌat ebꞌ.
11 A inxo pax rey in tic jun, ol vacꞌ tzalajbꞌoc in cꞌool edꞌoc ach in Diosal. Masanil ebꞌ tzach acꞌan bꞌinaj bꞌaj syacꞌ stiꞌ, ol tzalaj ebꞌ. Axo pax ebꞌ tzꞌesan jun, ol queecaxcan ebꞌ uuj.