An̈ejton Dios bꞌaj sco col co bꞌa
Sbꞌit jun tic vin̈aj David. Scꞌan vin̈aj Jedutún cuchbꞌum bꞌit.
62
An̈ejton dꞌa Dios tzꞌilchaj juncꞌolal vuuj. A dꞌay scot in colnabꞌil.2 An̈ej tzin colaneli, a tzꞌochpax ven̈uloc. Malaj bꞌaqꞌuin̈ ol in acꞌjoc ganar yujto aꞌ ayoch in colnabꞌiloc.
3 ¿Bꞌaqꞌuin̈ ol eyactej eyoch bꞌulan dꞌayin yic ol in e tecꞌancanem eyalani? Ichato toxo val tzin telvi icha junoc pat cꞌaxo, ma icha junoc macteꞌ toxo tzꞌecꞌ lecnajoc.
4 Axon̈ej tas tzꞌaj yixtaxel in bꞌinajnaquil tze naubꞌtan̈ej. E qꞌuinalxon̈ej e naanqꞌue es. Tze tzꞌac eyal vachꞌ lolonel dꞌayin, palta axo dꞌa e pensar, tzin e catabꞌej.
5 An̈ej dꞌa Dios tzꞌilchaj juncꞌolal vuuj. An̈ej ayoch yipoc in cꞌool.
6 An̈ej tzin colaneli, tzꞌochpax ven̈uloc. Man̈ ol in telvoclaj. Aꞌ ayoch in colnabꞌiloc.
7 A dꞌa Dios scot in colnabꞌil, yuj chiꞌ ay velcꞌochi. Aꞌ ayoch ven̈uloc yedꞌ in colnabꞌiloc.
8 Ex vetchon̈abꞌ, an̈ej Dios tzeyacꞌoch yipoc e cꞌool. Dꞌa smasanil e cꞌool, tzex lesalvi dꞌay, yujto a co colnabꞌil yaji.
9 A ebꞌ anima, juneln̈ej malaj jabꞌoc yelcꞌoch ebꞌ, vachꞌchom mebꞌaꞌ ebꞌ, ma bꞌeyum ebꞌ. Qꞌuinaloc tzꞌechtaj yalil ebꞌ dꞌa junoc echlabꞌ smasanil, toton max checlajlaj jabꞌoc yalil ebꞌ chiꞌ, yuj chiꞌ man̈ caqꞌuec ochlaj co pensar dꞌa ebꞌ.
10 Man̈ eyacꞌoch ixtoj anima, ma elcꞌal yipoc e cꞌool. Tato tzex och bꞌeyumal, man̈ eyacꞌoch e bꞌeyumal chiꞌ yipoc e cꞌool.
11-12 Man̈ jantacoc vabꞌan yalchaji to a Dios aljinaccan icha tic: A in Dios Yajal in tic, masanil syal vuuj, ayn̈ej pax in vachꞌcꞌolal. Tzin pactzitej dꞌa junjun anima icha syal tas tzꞌel scꞌulani, xchi Dios.