A ebꞌ anima chuc sbꞌeybꞌal
Aton sbꞌit vin̈aj David sbꞌitej ayic ix cꞌoch vin̈aj Doeg aj Edom yal dꞌa vin̈aj Saúl to ix ecꞌ vin̈aj David dꞌa spat vin̈aj sacerdote Abimelec. A jun bꞌit tic tzon̈ cꞌaybꞌani, scꞌan vin̈ cuchbꞌum dꞌa bꞌit.
52
Ach to jelan ach dꞌa oval, ¿tas yuj tzicꞌchaan̈ a bꞌa dꞌa a chucal? A svachꞌcꞌolal Dios ayn̈ejecꞌ dꞌa smasanil tiempo.2 An̈ej chucal a gana tza cꞌulej. A a tiꞌ tzacꞌlabꞌej dꞌa lolonel man̈ yeloc, icha val junoc qꞌuen cuchilubꞌ te jay ye syacꞌlabꞌej junoc anima smil-labꞌoc.
3 A chucal a gana dꞌa yichan̈ vachꞌil. A lolonel es a gana dꞌa yichan̈ lolonel yel.
4 Ach anima chabꞌ sat, a val lolonel yic tzꞌixtan anima a gana.
5 Palta a Dios ol ach satanel dꞌa juneln̈ej. Ol och yubꞌnaj dꞌayach, ol ach yicꞌancanel dꞌa a pat, ol yicꞌanel a qꞌuinal.
6 A ebꞌ scꞌanabꞌajan Dios ol yil jun tic ebꞌ, ol xiv ebꞌ dꞌay, palta ol bꞌuchvaj ebꞌ dꞌa jun vin̈ chuc chiꞌ.
7 Ol yalan ebꞌ: Ilec val vin̈ maj acꞌanoch Dios yipoc scꞌool. An̈ej val dꞌa nivac bꞌeyumal ix yacꞌoch scꞌol vin̈, ayn̈ejoch spensar vin̈ scꞌulan chucal, xcham ebꞌ.
8 A inxo tic, lajan in icha junoc teꞌ olivo te yaax, vachꞌ sqꞌuibꞌ dꞌa yamaqꞌuil stemplo Dios. An̈ej svachꞌcꞌolal Dios ol vacꞌoch yipoc in cꞌool.
9 Ach in Diosal, ol vacꞌn̈ej yuj diosal yuj a vachꞌcꞌolal dꞌayin. Tzach vacꞌn̈ejoch yipoc in cꞌool yujto vachꞌ ach. Ol valel abꞌixal dꞌa yichan̈ ebꞌ icxo, to toxonton vachꞌ ach.