Ach in Diosal, ocꞌoc val a cꞌool dꞌayin
Aton sbꞌit vin̈aj David ix sbꞌitej ayic ix tumaj vin̈ yuj vin̈aj Natán schecabꞌ Dios, yujto ix yicꞌ ix Betsabé vin̈ yetbꞌeyumoc.
51
Ach in Diosal yujto tzin a xajanej, ocꞌoc val a cꞌool dꞌayin. A yuj a nivan oqꞌuelcꞌolal, sucsat in mul.2 Bꞌic in el dꞌa masanil in mul, tzin a sacbꞌitani.
3 Yel toni ix och in mul, ix in ecꞌ dꞌa yibꞌan̈, max bꞌatlaj satcꞌolal junoc rato in mul chiꞌ vuuj.
4 Ix och val in mul chiꞌ dꞌayach. Ix in cꞌulej chucal dꞌa yol a sat. Yuj chiꞌ smoj val acꞌan in yaelal. Max yal-laj yalchaj chucal dꞌayach ayic tzin a chꞌolbꞌitani.
5 Val yel, yictax valjubꞌal chuc in. Toxonton chuc in atax yic cuchbꞌil into och yuj ix in nun.
6 Val yel tza xajanej mach sgana tojolal dꞌa smasanil scꞌool. Yuj chiꞌ acꞌ a jelanil dꞌayin.
7 N̈iccanel in mul yic tzin sacbꞌicaneli. Bꞌic in eli, yic vachꞌ sacxon̈ej tzin ajcan icha qꞌuen sacbꞌacom.
8 Acꞌxi in tzalajcꞌolal in cꞌanaꞌ yic tzꞌel in cuscꞌolal yuj bꞌaj ix acꞌ in yaelal sicꞌlabꞌil.
9 Man̈xo a nacot in mul chiꞌ, tza sucan sat masanil in chucal.
10 Ach in Diosal, tojolbꞌitej in pensar. A junoc acꞌ bꞌeybꞌal tzacꞌ dꞌayin yic tzin cꞌanabꞌajej yedꞌ smasanil in cꞌool.
11 Man̈ in icꞌcanel dꞌa ichan̈, man̈ icꞌpaxel a Santo Espíritu dꞌayin.
12 Acꞌxi in tzalajcꞌolal yuj in colnabꞌil. Acꞌ vip yic bꞌecan in cꞌool ach in cꞌanabꞌajani,
13 yic vachꞌ tzin cꞌaybꞌej ebꞌ chuc yic sbꞌeybꞌalej a bꞌeybꞌal ebꞌ yic smeltzajoch ebꞌ dꞌa yol a cꞌabꞌ.
14 Ach in Diosal, ix acꞌ in colnabꞌil, man̈xo a cha in mil anima, colinel dꞌa in mul yic ol valan a tojolal dꞌa bꞌitalil.
15 Mamin, jac in tiꞌ yic ol ach in bꞌitani.
16 Tato a ofrenda, ma silabꞌ n̈usbꞌil tza nibꞌej, tzam vacꞌlaj, ocxo jun, max a nibꞌej paxlaj.
17 A tas a gana, aton ebꞌ scus scꞌol yuj smul. Ach in Diosal, max a patiquejel-laj anima syiqꞌuem sbꞌa yujto sna sbꞌa yuj smul.
18 Acꞌ a vachꞌcꞌolal dꞌa Sion. Yuj svachꞌil a cꞌool, bꞌoxiqꞌue smuroal Jerusalén.
19 Ichato val chiꞌ dꞌa tzalajcꞌolal ol aj a chaan silabꞌ a gana tzꞌacꞌji dꞌayach, aton nocꞌ nocꞌ sn̈usji. Ichato chiꞌ ol acꞌjoc nocꞌ vacax silabꞌil dꞌayach dꞌa altar.